މި ސަރުކާރުން ކުރިއަށްގެންދާ ބޯހިޔާވަހިކަމުގެ ފުރަތަމަ މަޝްރޫއުގެ ދަށުން ފްލެޓާއި ގޯއްޗަށް އެދި ހުށަހަޅާފައިވާ ފޯމުތައް ޗެކްކުރުމުގެ މަސައްކަތް ކުރިއަށްދާއިރު، އެއްވެސް ފަރާތަކަށް ނާޖައިޒު ފައިދާއެއް ލިބޭނެ ފަދަ ކަމެއް ހިނގުމަށް ފުރުސަތު ނުދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
"ނޭޝަން ޗެޓް" ޕޮޑްކާސްޓުގެ ދެވަނަ އެޕިސޯޑުގައި ވާހަކަފުޅު ދައްކަވަމުން ރައީސް ވިދާޅުވީ، މީގެ ކުރިން ބޯހިޔާވަހިކަމުގެ މަޝްރޫއުތައް ކުރިއަށް ގޮސްފައިވާ ގޮތުން ރައްޔިތުންގެ މެދުގައި ބޮޑެތި ޝަކުވާތަކާއި ތުހުމަތުތަކެއް ހުރި ކަމަށެވެ. ވަކިން ހާއްސަކޮށް ނުފޫޒުގަދަ ފަރާތްތަކުން ބޭނުންވާ ބަޔަކަށް ގޯއްޗާއި ފްލެޓް ބަހާލާ ކަމުގެ ޝަކުވާއަކީ އަބަދުވެސް އިވޭ އަޑެއްކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވި ގޮތުގައި މި ސަރުކާރުގެ އެންމެ ބޮޑު އަމާޒަކީ އެފަދަ ކަންބޮޑުވުންތަކަށް ނިމުމެއް ގެނެސް، ބޯހިޔާވަހިކަމުގެ މަޝްރޫއުތަކަކީ ނުފޫޒުން އެއްކިބާވެފައިވާ ދެފުށް ފެންނަ މަސައްކަތްތަކެއްގެ ގޮތުގައި ރައްޔިތުންނަށް ޔަގީންކޮށްދިނުމެވެ. އެގޮތުން މިހާރު ކުރިއަށްދާ ކްރޮސް ވެރިފިކޭޝަންގެ މަރުހަލާގައި ވަކި މީހަކަށް ނުވަތަ އާއިލާއަކަށް އިސްކަންދިނުމުގެ އެއްވެސް ޖާގައެއް ނޯންނާނެ ކަމުގެ ޔަގީންކަން އެމަނިކުފާނު ދެއްވިއެވެ.
"އެއީ އަޅުގަނޑު ގަބޫލު ކުރަނީ ބޯހިޔާވަހިކަމަކީ އެންމެ ޒަރޫރީ އެންމެ މުހިންމު ކަންތައް. ހުރިހާ ކަމެއްގެ ތެރެއިން ވެސް އެންމެ މުހިންމީ އެމީހަކަށް ރަނގަޅު ދިރިއުޅެވޭނެ ގެދޮރެއް ލިބިފައި އޮތުން. އެހެންމަ އެވަރުގެ ބޮޑު ކަމެއްގެ ތެރޭގަ އެއްވެސް ވަރެއްގެ ނާޖައިޒު ކަމެއް އަދި އެއްވެސް ކަމެއްގަ، ކުޑަކަމެއްގަ ވެސް ހިނގައިގެން ނުވާނެ ކަމަށް ގަބޫލު ކުރަނީ" ރައީސް ވިދާޅުވިއެވެ.
މީގެ އިތުރުން، ފްލެޓާއި ގޯތި ހަވާލުކުރުމުގައި އެއްވެސް ކަހަލަ ތަރުތީބެއް ނުވަތަ ވަކި ބަޔަކަށް އިސްކަންދޭ އުސޫލެއް ނުގެންގުޅުއްވާނެ ކަމަށާއި، އެންމެ ބޮޑު އިސްކަމެއް ދެއްވާނީ އެންމެ ބޮޑަށް ބޯހިޔާވަހިކަމަށް ބޭނުންވެފައިވާ ހައްގުވެރި ފަރާތްތަކަށް އެ ފުރުސަތު ހޯދައިދިނުމަށް ކަމަށްވެސް ރައީސް ވިދާޅުވިއެވެ.
މި ސަރުކާރުގެ "ބޯހިޔާވަހިކަން އެންމެނަށް" ސިޔާސަތުގެ ދަށުން މާލެ ސަރަހައްދުން ގޯއްޗާއި ފްލެޓަށް އެދި ހުށަހެޅުމަށް ހުޅުވާލި ފުރުސަތުގައި ޖުމްލަ 58,505 ފޯމު ވަނީ ހުށަހަޅާފައެވެ. މީގެ ތެރޭގައި ހިމެނެނީ ފްލެޓަށް އެދި ހުށަހެޅި 35,930 ފޯމާއި ގޯއްޗަށް އެދި ހުށަހެޅި 22,575 ފޯމެވެ.