ފީފާ ވޯލްޑް ކަޕްގެ ގްރޫޕް "ޑީ" ގައި ކުޅުނު ފޯރިގަދަ ކުރިމަތިލުމުގައި، މުބާރާތް ބާއްވާ އެއް ގައުމު ކަމަށްވާ އެމެރިކާގެ މައްޗަށް 3-2 އިން ތުރުކީން ކުރި ހޯދައިފިއެވެ.
މި މެޗަށް ނުކުތްއިރުވެސް ތުރުކީ އޮތީ މުބާރާތުން ކަޓާފައެވެ. އެއީ ކުރިން ކުޅުނު ދެ މެޗުން އޮސްޓްރޭލިއާ އަދި ޕެރަގުއޭ އަތުން ބަލިވުމުންނެވެ. ނަމަވެސް ރޭގެ މެޗުގެ 98 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ކާން އައިހާން ކާމިޔާބުކޮށްދިން ލަނޑާއެކު، ތުރުކީން ވަނީ ފަޚުރުވެރި މޮޅަކާއެކު މުބާރާތާ ވަކިވެފައެވެ.
މެޗުގެ ވަރަށް ކުރީކޮޅު، ތިންވަނަ މިނެޓުގައި އޮސްޓިން ޓްރަސްޓީ ވަނީ ލަނޑެއް ޖަހައި އެމެރިކާއަށް ކުރި ހޯދައިދީފައެވެ. ނަމަވެސް ވިންޗެންޒޯ މޮންޓެލާގެ އިރުޝާދުގެ ދަށުން ކުޅެމުންދިޔަ ތުރުކީން ވަނީ އަރުދާ ގުލާ އަދި ބަރިޝް ޔިލްމާޒްގެ ލަނޑުތަކުން މެޗުގެ ނަތީޖާ އަނބުރާލާފައެވެ.
ދެވަނަ ހާފު ފެށުނުތަނާހެން ސެބަސްޓިއަން ބާހަލްޓާ ވަނީ ލަނޑެއް ޖަހައި އެމެރިކާއަށް ނަތީޖާ ހަމަހަމަކޮށްދީފައެވެ. މި ހާފުގައި އެމެރިކާގެ ތަރި ކްރިސްޓިއަން ޕުލިސިޗް އަނިޔާއިން ސަލާމަތްވެ ކުޅެން ނުކުމެފައިވާއިރު، އޭނާ ފޮނުވާލި ބޯޅައެއް ގޯލުގެ އަރިމަތީ ދަނޑިއަށްވެސް ވަނީ އަމާޒުވެފައެވެ.
އެމެރިކާއަށް މެޗުން ނަތީޖާއެއް ނެރެވޭތޯ މަސައްކަތް ކުރަމުން ދަނިކޮށް، މެޗުގެ އެންމެ ފަހު ސިކުންތުކޮޅުގެ ތެރޭގައި ތުރުކީގެ އައިހާން ވަނީ ކޭން އުޒުން ހުރަސްކޮށްދިން ބޯޅައެއް ގޯލުގެ ތެރެއަށް ފޮނުވާލައި މޮޅު ކަށަވަރުކޮށްދީފައެވެ.
މިއީ މި މުބާރާތުގައި މައުރީސިއޯ ޕޮޗެޓީނޯގެ އިރުޝާދުގެ ދަށުން ކުޅޭ އެމެރިކާ ބަލިވި ފުރަތަމަ މެޗެވެ. އެހެންނަމަވެސް، ގްރޫޕްގެ އެއްވަނަ ޓީމުގެ ގޮތުގައި އެމެރިކާ ވަނީ ގަދަ 32 ގެ ބުރަށް ދަތުރުކޮށްފައެވެ. ތުރުކީން މުބާރާތް ނިންމާލީ ކުރިން ކުޅުނު ދެ މެޗުގައި 62 ހަމަލާ އުފައްދައިގެންވެސް ލަނޑެއް ނުޖެހި އޮތުމަށްފަހު، ފަހު މެޗުގައި މޮޅު ކުޅުމެއް ދައްކައި އިތުބާރު ހޯދުމަށްފަހުގައެވެ.