ޚަތީބުން ތަމްރީނުކުރުމުގެ މުހިންމު މަސައްކަތް މިހާރުން މިހާރަށް ނުކޮށްފިނަމަ، ދީނީ ގޮތުންނާއި އިޖުތިމާއީ ގޮތުން އިއާދަނުކުރެވޭނެ ފަދަ ބޮޑެތި ގެއްލުންތަކަކާ ކުރިމަތިލާން ޖެހިދާނެ ކަމުގެ އިންޒާރު އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ދެއްވައިފިއެވެ. ވަޒީރު މިހެން ވިދާޅުވީ ޒުވާން ޚަތީބުން ތަމްރީނުކުރުމުގެ ހަތަރުވަނަ ބުރު ނިންމުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ވަޒީރު ފާހަގަކުރެއްވި ގޮތުގައި ރާއްޖޭގެ ގިނަ ރަށްތަކަކަށް މިހާރުވެސް އިމާމުންނާއި ޚުތުބާ ކިޔާނެ މީހުން ނެތުމުގެ ދަތިކަން ވަނީ ކުރިމަތިވެފައެވެ. މި މައްސަލައަށް ދާއިމީ ހައްލެއް ހޯދުމަށްޓަކައި ޒުވާން ޖީލެއް ބިނާކުރުމަކީ ކޮންމެހެން ކުރަންޖެހޭ ކަމެއް ކަމަށާއި، އެ ވުޒާރާއިން މިހާރު ކުރިއަށްގެންދާ ޕްރޮގްރާމްތަކަކީ މި އަމާޒަށް ވާސިލްވުމަށް ކުރެވޭ މުހިންމު މަސައްކަތްތަކެއް ކަމަށް ވިދާޅުވިއެވެ.
ޚަތީބުންގެ ޝަޚުސިއްޔަތާ ގުޅޭގޮތުން ވާހަކަދައްކަވަމުން ޑރ. ޝަހީމް ވިދާޅުވީ، ޚަތީބުންނަކީ މުޖުތަމައުގެ ތެރޭގައި ނަމޫނާ ބަޔަކަށް ވާންޖެހޭނެ ކަމަށެވެ. “ޚަތީބުން ވާންވާނީ ފޭރާން އެޅުމާއި، އަޚުލާގާއި، މުއާމަލާތު ކުރުމުގައިވެސް އެހެން މީހުންނަށް މިސާލު ދައްކާ ބަޔަކަށް،” ވަޒީރު ވިދާޅުވިއެވެ. މީގެ އިތުރުން އިމާމުވެ ނަމާދުކުރުމާއި ބަންގިގޮވުމަކީ ދީނީ ގޮތުން ލިބޭނެ އެންމެ މަތިވެރި ޝަރަފުކަންވެސް އެމަނިކުފާނު ފާހަގަކުރެއްވިއެވެ.
ޚުތުބާ ކިޔުމުގެ ފެންވަރު މަތިކުރުމަށް ބާރުއަޅުއްވަމުން ވަޒީރު ވިދާޅުވީ، ކޮންމެ ޚަތީބަކީވެސް ވަގުތަށް ކަމޭހިތާ، ޚުތުބާ ކިޔުމުގެ ކުރިން އެކަމަށް ފުރިހަމައަށް ތައްޔާރުވާ މީހަކަށް ވާންޖެހޭނެ ކަމަށެވެ. ވަކިން ހާއްސަކޮށް ޚުތުބާގައި ހިމެނޭ އާޔަތްތަކާއި ހަދީސްތައް ތަޖުވީދުގެ ހަމަތަކުން ރީތިކޮށް ކިޔުމަށް އާދަކުރުމަކީ ކޮންމެހެން މުހިންމު ކަމެއް ކަމަށް ވިދާޅުވިއެވެ.
މި ޕްރޮގްރާމްގެ ކާމިޔާބީއަށް އަލިއަޅުވާލައްވަމުން ވަޒީރު ހާމަކުރެއްވި ގޮތުގައި، ޒުވާން ޚަތީބުން ތަމްރީނުކުރުމުގެ މަޝްރޫއުގެ ދަށުން މިހާތަނަށް 600 އަށްވުރެ ގިނަ ޒުވާނުން ވަނީ ސަނަދު ހާސިލްކޮށްފައެވެ. އަދި މިހާރު ރާއްޖޭގައި ތިބި ހާފިޒުންގެ އަދަދު 310 އަށް އަރާފައިވާކަންވެސް އެމަނިކުފާނު އުފަލާއެކު ފާހަގަކުރެއްވިއެވެ.
ނިމިގެންދިޔަ ހަތަރުވަނަ ބުރުގައި ރާއްޖޭގެ އެކި ސަރަހައްދުތަކުން 82 ޒުވާނުން ބައިވެރިވެ ތަމްރީނު ފުރިހަމަކޮށްފައިވެއެވެ. އިސްލާމީ ކަންތައްތަކާ ބެހޭ ވުޒާރާގެ އަމާޒަކީ މިފަދަ ޕްރޮގްރާމްތަކުގެ ޒަރީއާއިން ރާއްޖޭގެ މިސްކިތްތަކަށް ދިމާވެފައިވާ އިމާމުންގެ ދަތިކަން މުޅިން ހައްލުކުރުމެވެ.