ފްރާންސްގެ ބަޖެޓް އެއާލައިންއެއް ކަމަށްވާ "ފްރެންޗްބީ" އިން ރާއްޖެއަށް ދަތުރުތައް ފެށުމަށް ތައްޔާރުވެއްޖެއެވެ. އޭވިއޭޝަން ދާއިރާގެ ހަބަރުތައް ގެނެސްދޭ "އޭވިއޭޓާސް މޯލްޑިވްސް" އިން ރިޕޯޓްކޮށްފައިވާ ގޮތުގައި، މި އެއާލައިނުން ދަތުރުތައް ކުރާނީ ފްރާންސުގެ ވެރިރަށް ޕެރިހާއި ސްރީލަންކާގެ ކޮލަމްބޯ މެދުވެރިކޮށް ވެލާނާ އިންޓަނޭޝަނަލް އެއާޕޯޓަށެވެ.
މި ދަތުރުތައް ރަސްމީކޮށް ފެށުމަށް ތާވަލުކޮށްފައިވަނީ އަންނަ ޑިސެމްބަރު މަހުގެ 19 ވަނަ ދުވަހުއެވެ. މި އައު ރޫޓަކީ އެ އެއާލައިންގެ ވިއުގަ ފުޅާކުރުމަށް އެޅޭ މުހިންމު ފިޔަވަޅެއްގެ ގޮތުގައި ވަނީ ފާހަގަކޮށްފައެވެ.
ފްރެންޗްބީގެ ސީއީއޯ، މާކް އެންޓޮއިން ބްލޮންޑޯ ވިދާޅުވީ، "މި ނިންމުމަކީ އެއާލައިންގެ ކުރިއެރުމަށް ވަރަށް މުހިންމު ނިންމުމެއް" ކަމަށެވެ. އަދި ރާއްޖެއަކީ ދުނިޔޭގެ މަޝްހޫރު ރިސޯޓް ޓޫރިޒަމްގެ މަންޒިލެއްގެ ގޮތުގައި ބޮޑު މަގުބޫލުކަމެއް ހޯދަމުން އަންނަ ގައުމެއްކަން އޭނާ ފާހަގަކުރެއްވިއެވެ.
ދަތުރުތައް ބާއްވާނެ ގޮތުގެ ތާވަލު
މި އެއާލައިނުން ދަތުރުތައް ކުރާނީ ޕެރިސް އޯލީ އެއާޕޯޓުން ކޮލަމްބޯއަށް، އަދި ކޮލަމްބޯއިން ރާއްޖެއަށެވެ. ދަތުރުތައް ބަހާލާފައިވަނީ ދެ މަރުހަލާއަކަށެވެ:
- ޑިސެމްބަރު 19 އިން ޖެނުއަރީ 10 އަށް: ކޮންމެ ހަފްތާއެއްގެ ހޯމަ އަދި ހޮނިހިރު ދުވަހު.
- ޖެނުއަރީ 11 އިން މާޗް 7 އަށް: ކޮންމެ ހަފްތާއެއްގެ ބުރާސްފަތި އަދި ހޮނިހިރު ދުވަހު.
އަގުތަކަށް ބަލާއިރު، އިކޮނޮމީ ކްލާހުގެ ޓިކެޓެއްގެ އަގު އުޅެނީ 649 ޔޫރޯގައެވެ. އަދި ޕްރީމިއަމް ކްލާހުގެ ޓިކެޓެއް 1,399 ޔޫރޯއަށް ލިބޭނެ ކަމަށް އޭވިއޭޓާސް މޯލްޑިވްސްއިން މައުލޫމާތުދެއެވެ.