ތިން މަހުގެ ދަރިފުޅު ގޮވައިގެން އީޔޫގެ ބައްދަލުވުމަކަށް ވަޑައިގެންނވި ސްވިޑަންގެ މިނިސްޓަރަށް ސަމާލުކަން!

ލަގްޒެމްބާގްގައި ބޭއްވުނު ޔޫރަޕިއަން ޔޫނިއަން (އީޔޫ) ގެ ތިމާވެއްޓާ ބެހޭ ވަޒީރުންގެ މަޖިލީހަށް، ސްވިޑަންގެ ކްލައިމެޓް މިނިސްޓަރު ރޮމީނާ ޕޫރްމޮޚްތާރީ އޭނާގެ ތިން މަހުގެ ދަރިފުޅު ގޮވައިގެން ވަޑައިގަތުމުން ގިނަ ބައެއްގެ ސަމާލުކަން އެކަމަށް ހުއްޓިއްޖެއެވެ. މިއީ އީޔޫގެ ވަޒީރުންގެ ފެންވަރުގެ ރަސްމީ ބައްދަލުވުމަކަށް ތުއްތު ކުއްޖަކު ގެންދިޔަ ފުރަތަމަ ފަހަރު ކަމަށް އެ އިދާރާގެ އޮފިޝަލުން ވަނީ ކަށަވަރުކޮށްދީފައެވެ.

އުމުރުން 30 އަހަރުގެ ޕޫރްމޮޚްތާރީ ބައްދަލުވުމަށް ވަޑައިގަތީ އޭނާގެ ތުއްތު ދަރިފުޅު އާދަމް އުރާލައިގެން ހުރެއެވެ. އޭނާ ވިދާޅުވި ގޮތުގައި މި އަމަލުގެ ބޭނުމަކީ ވަޒީފާއާއި އާއިލީ ޒިންމާއާ ދެމެދު އަންހެނުން އިޚްތިޔާރު ކުރަން ނުޖެހޭނެކަން ދުނިޔެއަށް ދައްކުވައިދިނުމެވެ. “އަޅުގަނޑު ބޭނުންވީ މިސާލެއް ދައްކަން. އަންހެނަކަށް ވީތީ މަސައްކަތާއި އާއިލާއާ ދެމެދު ވަކި ގޮތެއް ނިންމަން މަޖުބޫރުވެގެން ނުވާނެ،” ރޮއިޓާސްއަށް ދެއްވި ބަސްދީގަތުމެއްގައި މިނިސްޓަރު ވިދާޅުވިއެވެ.

މިނިސްޓަރު ޕޫރްމޮޚްތާރީ އަކީ ސްވިޑަންގެ ތާރީޚުގައި ވެސް ސަރުކާރުގެ ވަޒީރުކަމާ ހަވާލުވި އެންމެ ޒުވާން ބޭފުޅާއެވެ. އޭނާ މި ބައްދަލުވުމުގައި ބައިވެރިވެވަޑައިގަތީ ވިހެއުމާ ގުޅިގެން ދޭ ޗުއްޓީ ނިންމަވައި ވަޒީފާއަށް ނުކުމެވަޑައިގަތްތާ މާގިނަ ދުވަސްތަކެއް ނުވަނީހެވެ. މިހާރު ޗުއްޓީގައި ހުންނެވީ އޭނާގެ ފިރިކަލުންނެވެ. ސްވިޑަންގެ ގާނޫނުތައް އޮންނަ ގޮތުން ދަރިން ބެލުމަށް ބަފާބެއިންނަށް ވެސް ދިގު މުއްދަތުގެ މުސާރަ ލިބޭ ޗުއްޓީ ލިބެއެވެ.

ސްވިޑަންގެ ބެލެނިވެރިންނަށް ޖުމްލަ 16 މަސްދުވަހުގެ މުސާރަ ލިބޭ ޗުއްޓީ ލިބޭއިރު، އޭގެ ތެރެއިން 90 ދުވަހަކީ ކޮންމެ ބެލެނިވެރިއަކަށް ވަކިން ޚާއްޞަ ކުރެވިފައިވާ ދުވަސްތަކެކެވެ. މިއީ ބައްޕައިން ދަރިން ބެލުމުގައި ބައިވެރިވުން އިތުރުކުރުމަށް ބާރުއެޅުމުގެ ގޮތުން ހަމަޖައްސާފައިވާ އުސޫލެކެވެ. ޕޫރްމޮޚްތާރީ ވިދާޅުވީ މިފަދަ ސިޔާސަތުތަކުގެ ސަބަބުން މަސައްކަތުގެ މާހައުލުގައި މުވައްޒަފުން ބާންއައުޓްވުން ނުވަތަ ނަފްސާނީ ގޮތުން ބަލިކަށިވުން ކުޑަކޮށްދޭ ކަމަށެވެ.

ޕޮލެންޑްގެ ޑެޕިއުޓީ ކްލައިމެޓް މިނިސްޓަރު ކްރިސްޓޯފް ބޮލެސްޓާ ވިދާޅުވީ، ސިޔާސީ ބައްދަލުވުމެއްގައި ތުއްތު ކުއްޖަކު އިނުމަކީ އެއްވެސް ދަތިކަމެއް ނޫން ކަމަށާއި، އެއީ ދިރިއުޅުމުގެ ބައެއް ކަމަށް ގަބޫލުކުރަންޖެހޭ ކަމަށެވެ. މިއީ ސްވިޑަންގައި ކުރިއަށް އޮތް އިންތިޚާބުގެ ތެރޭގައި ވެސް ބޮޑު ބަހުސަކަށް ވެފައިވާ މައުޟޫޢެކެވެ.