ސަރުކާރު ހިއްސާވާ ކުންފުނިތަކުގެ ތެރެއިން މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން އަމިއްލަ އިސްނެގުމުގައި އާންމުކުރަންޖެހޭ މައުލޫމާތު އާންމުކުރި ފުރަތަމަ ކުންފުންޏަކަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ވެއްޖެއެވެ. މިކަން ހާމަކުރެއްވީ އިންފޮމޭޝަން ކޮމިޝަނަރު އާހިދު ރަޝީދު ސޯޝަލް މީޑިއާގައި ހިއްސާކުރެއްވި މެސެޖެއްގައެވެ.
އިންފޮމޭޝަން ކޮމިޝަނަރު ވިދާޅުވީ، ޤާނޫނުގެ ދަށުން އަމިއްލަ އިސްނެގުމުގެ މަތިން އާންމުކުރަންޖެހޭ ހުރިހާ މައުލޫމާތެއް އެޗްޑީސީން މިހާރު އާންމުކޮށްފައިވާ ކަމަށެވެ. މިއީ ސަރުކާރު ހިއްސާވާ ކުންފުންޏަކުން މި ލަނޑުދަނޑި ހާސިލުކުރި ފުރަތަމަ ފަހަރުކަން ފާހަގަކުރައްވައި، އެހެން ކުންފުނިތަކުންވެސް އެޗްޑީސީ ނަމޫނާއަކަށް ބަލައިގެން މައުލޫމާތު ހާމަކުރުމަށް އާހިދު ގޮވާލެއްވިއެވެ.
ސަރުކާރު ހިއްސާވާ ކުންފުނިތަކަކީ ރައްޔިތުންގެ ފައިސާ ހިމަނައިގެން ހިންގާ އަދި ރައްޔިތުންނަށް މުހިންމު ޚިދުމަތްތަކެއް ފޯރުކޮށްދޭ ތަންތަންކަން ފާހަގަކުރައްވައި، އިންފޮމޭޝަން ކޮމިޝަނަރު ވިދާޅުވީ ކުންފުނިތަކުން ރައްޔިތުންނަށް ދޭންޖެހޭ މައުލޫމާތު އާންމުކުރުމަކީ ނުހަނު މުހިންމު ކަމެއް ކަމަށެވެ.
މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނު ތަންފީޒުކުރަން ފެށިފަހުން، ސަރުކާރުގެ ހުރިހާ ވުޒާރާއަކުން މައުލޫމާތު ހާމަކޮށްފައިވަނީވެސް މި ސަރުކާރުގައެވެ. އެގޮތުން ރައީސުލްޖުމްހޫރިއްޔާގެ އޮފީސް ހިމެނޭހެން ސަރުކާރުގެ 16 ވުޒާރާއަކުން ޤާނޫނުން ލާޒިމުކުރާ މައުލޫމާތު އާންމުކޮށްފައިވާ ކަމަށް ކޮމިޝަނަރު ވިދާޅުވިއެވެ.
މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ 37 ވަނަ މާއްދާގެ ދަށުން، ދައުލަތުގެ އިދާރާތަކުން އަމިއްލަ އިސްނެގުމަށް 13 ބާވަތެއްގެ މައުލޫމާތު ހާމަކުރަންޖެހެއެވެ. މީގެ ތެރޭގައި އިދާރާގެ މަސައްކަތްތަކާއި، ވާޖިބުތަކާއި، ޚިދުމަތްތަކުގެ ތަފްސީލުގެ އިތުރުން، ޝަކުވާ ހުށަހަޅާނެ ނިޒާމާއި، ތަނުގެ ވެރިންގެ މައުލޫމާތު ހިމެނެއެވެ.
މީގެއިތުރުން، ރައްޔިތުންނަށް އަސަރު ފޯރާފަދަ ނިންމުންތަކާއި ނިންމުންތައް ނިންމުމަށް އޮންނަ މަރުހަލާތަކުގެ ތަފްސީލުވެސް މަދުވެގެން އަހަރަކު އެއްފަހަރު ނުވަތަ އެއަށްވުރެ އަވަސް މުއްދަތެއްގައި އާންމުކުރުމަށް ޤާނޫނު ލާޒިމުކުރެއެވެ.