ފައިގެ ނިޔަފަތިތައް ބޯވުމާއި، ރީނދޫވުމާއި، ނުވަތަ ފަސޭހައިން ބިންދައިގެންދާ ގޮތްވުމަކީ ހުރިހާ އުމުރެއްގެ މީހުންނަށްވެސް ކުރިމަތިވާ ވަރަށް އާންމު މައްސަލައެކެވެ. މިއީ އާންމުކޮށް “އޮނިކޯމައިކޯސިސް” (Onychomycosis) ނުވަތަ ފަންގަސް އިންފެކްޝަނެއްގެ ސަބަބުން ދިމާވާ ސިއްހީ މައްސަލައެކެވެ. ނިޔަފަތީގެ މި ޖަރާސީމު އުފެދެނީ ފައިގެ ނިޔަފަތީގެ ވަށައިގެންވާ ހަންގަނޑުގައި ހެދިފައި ހުންނަ ކުދިކުދި ރެދުތަކުގެ ތެރެއަށް ފަންގަސް ވަދެގެން ދިޔުމުންނެވެ. ތެތުމަނާ މާހައުލުތަކާއި، ގޭތެރޭގައި ހުސްފަޔާ ހިނގުމަކީ މިފަދަ ޖަރާސީމުތައް އަށަގަތުމަށް މަގުފަހިވާ ކަމެކެވެ.
ފަންގަސް އިންފެކްޝަން ދެނެގަތުމާއި އޭގެ އަލާމާތްތައް
ފައިގެ ނިޔަފަތީގައި ފަންގަސް އަށަގަންނަނީ ވަރަށް މަޑުމަޑުންނެވެ. އެންމެ ފުރަތަމަ ފެންނަން ފަށާނެ އަލާމާތްތަކުގެ ތެރޭގައި ނިޔަފަތީގެ ކުލަ ރީނދޫ، ހުދު ނުވަތަ މުށިކުލައަށް ބަދަލުވުން ހިމެނެއެވެ. މީގެ އިތުރުން ނިޔަފަތި އާދަޔާ ހިލާފަށް ބޯވުމުގެ ސަބަބުން ކަނޑަން އުނދަގޫވުމާއި، ނިޔަފަތީގެ ކައިރިފަށްތައް ކުނޑިވެ ބިންދައިގެން ދިއުމަކީ ވެސް މިކަމުގެ ނިޝާނެކެވެ. ބައެއް ފަހަރު ނިޔަފަތި އޭގެ މަސްގަނޑާ ވަކިވެ، ނިޔަފަތި ދަށުން ނުބައި ވަހެއް ދުވުމަކީ ވެސް އެކަށީގެންވާ ކަމެކެވެ. މިކަމުގެ ސަބަބުން ފައިގެ އިނގިލިތަކުގެ ބައްޓަމަށް ބަދަލު އައުމާއި، ބޫޓަށް އަރައިގެން ހުންނައިރު އުނދަގޫތަކެއް އިހުސާސް ކުރަން ޖެހިދާނެއެވެ.
މި އިންފެކްޝަން ފެށެނީ ނިޔަފަތީގެ ކުޑަ ތަންކޮޅަކުން ކަމަށްވާތީ، ކުރީކޮޅުގައި މިކަން ދެނެގަނެވިއްޖެނަމަ ގޭގައި ދެވޭ ފަރުވާއިން މިކަން ހައްލު ކުރެވިދާނެއެވެ. ފަންގަސްއަކީ ނިޔަފަތި އުފެދިފައިވާ “ކެރަޓިން” ކިޔާ ޕްރޮޓީން ކައިގެން ދިރިއުޅޭ އެއްޗަކަށް ވާތީ، އޭގެ ސަބަބުން ނިޔަފަތީގެ ވަރުގަދަކަން ކެނޑިގެންދެއެވެ. ގިނަ މީހުން މިއީ ހަމައެކަނި ޖަރާސީމެއް ނުވަތަ މިލައެއް ކަމަށް ހީކުރި ނަމަވެސް، މިއީ ފަންގަސްގެ ސަބަބުން ކުރިމަތިވާ ސިއްހީ ހާލަތެކެވެ.
ގޭގައި ދެވިދާނެ ފަރުވާތައް
ފަންގަސް އިންފެކްޝަނަށް ފަރުވާ ކުރުމުގައި ގުދުރަތީ ތަކެތި ބޭނުންކޮށްގެން ގޭގައި ތައްޔާރުކުރެވޭ ފަރުވާތަކަކީ ވަރަށް ނަތީޖާ ރަނގަޅު ކަންކަމެވެ. މީގެ ތެރެއިން އެންމެ ފާހަގަކޮށްލެވޭ އެއް ފަރުވާއަކީ ކަރަންފުލާއި އޮލިވް އޮއިލް ބޭނުންކޮށްގެން ކުރެވޭ ފަރުވާއެވެ.
ކަރަންފުލާއި އޮލިވް އޮއިލް ފަރުވާ
ކަރަންފުލަކީ އޭގައި އެންޓިސެޕްޓިކް މާއްދާތައް އެކުލެވޭ އެއްޗަކަށް ވުމުން، ބެކްޓީރިއާ އާއި ފަންގަސް ނައްތާލުމަށް އެހީތެރިވެދެއެވެ. ހަމައެހެންމެ، އެކްސްޓްރާ ވާޖިން އޮލިވް އޮއިލް އަކީވެސް ޖަރާސީމާ ދެކޮޅަށް މަސައްކަތްކުރާ މުހިންމު މާއްދާތަކެއް އެކުލެވޭ ތެލެކެވެ.
މި ފަރުވާ ތައްޔާރުކުރާނެ ގޮތް:
* 2 ސަމްސާ މުގުރާފައި ހުރި ކަރަންފޫ
* 6 ސަމްސާ އޮލިވް އޮއިލް
މުގުރާފައި ހުރި ކަރަންފުލާއި އޮލިވް އޮއިލް ތަވާއަކަށް އަޅާފައި މަޑުގިނީގައި 5 ވަރަކަށް މިނިޓަށް ކައްކާލުމަށް ފަހު ކުޑަ ފުޅިއަކަށް އަޅާށެވެ. އެއަށްފަހު، ކަފަބުރަކުން ފައިގެ ނިޔަފަތިތަކުގައި އުނގުޅާލާށެވެ. 30 މިނިޓް ފަހުން ހޫނުފެނުން ދޮވެލުމަށް ފަހު ތުވާއްޔަކުން ރަނގަޅަށް ފެން ހިއްކާލާށެވެ. ދުވާލަކު ދެ ފަހަރު މިގޮތަށް އަމަލުކުރުމުން ބޮޑު ތަފާތެއް ފެންނާނެއެވެ.
މީގެ އިތުރުން، ކޮންމެ ދުވަހަކު 10 އާއި 15 މިނެޓާ ދެމެދުގެ ވަގުތަކަށް ތާފަނާ ފެނުގެ ތެރެއަށް ފައިލައިގެން އިނުމަށް ސިއްހީ މާހިރުން ލަފާދެއެވެ. މީގެ ސަބަބުން ހަރުވެފައި ހުންނަ ނިޔަފަތިތައް މަޑުވެ، ކަނޑަން ފަސޭހަވެގެންދެއެވެ. ފެނުން ފައި ނެގުމަށްފަހު، އެންމެ މުހިންމުކަމަކީ އިނގިލިތަކުގެ ދެމެދާއި ނިޔަފަތިތައް ރަނގަޅަށް ހިއްކުމެވެ. ތެތްކަން ހުރުމަކީ ފަންގަސް އިތުރަށް އާލާވުމަށް ލިބޭ ފުރުސަތެކެވެ\
ފަންގަސް އިންފެކްޝަނަކީ ފަސޭހަވާން ވަރަށް ގިނަ ދުވަސް ނަގާ ކަމެކެވެ. އާންމުކޮށް އައު ނިޔަފަތިއެއް ފަޅައި، ބަލިޖެހިފައިވާ ބައި އެއްކޮށް ބޭރުވުމަށް 9 މަހާއި 18 މަހާ ދެމެދުގެ މުއްދަތެއް ނަގާފާނެއެވެ. އެހެންކަމުން، މިއީ ވަރަށް ބޮޑަށް ކެތްތެރިވާންޖެހޭ ކަމެކެވެ.
މިކަމުން ރައްކާތެރިވުމަށްޓަކައި ދާއިމީ ގޮތެއްގައި އާދަކުރަންޖެހޭ ބައެއް ކަންތައްތައް ހުރެއެވެ:
1. ފައި ހިކިކޮށް ބެހެއްޓުން: ފައި އަބަދުވެސް ސާފުކޮށް އަދި ހިކިކޮށް ބެހެއްޓުމަކީ އެންމެ މުހިންމު ކަމެވެ.
2. އިސްޓާކީނު ބަދަލުކުރުން: ކޮންމެ ދުވަހަކު އިސްޓާކީނު ބަދަލުކުރުމާއި، ވައި ދައުރުވާ ފަދަ ފަސޭހަ ފައިވާން ނުވަތަ ބޫޓަށް އެރުމަށް ސަމާލުކަން ދޭންވާނެއެވެ.
3. ހުސްފަޔާ ނުހިނގުން: ހާއްސަކޮށް އާންމު ފާޚާނާތަކާއި މޫދު، ސްވިމިންގ ޕޫލް ކައިރީގައި ހުސްފަޔާ ހިނގުމުގެ ބަދަލުގައި ފައިވާނަކަށް އެރުން މުހިންމެވެ.
4. އާލާތްތައް ވަކިކުރުން: ބަލިޖެހިފައިވާ ނިޔަފަތި ކަނޑަން ބޭނުންކުރާ ދަތި ފަދަ ތަކެތި ަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަހަމައެކަނި އެ ނިޔަފަތިތަކަށް ބޭނުންކުރާ އެއްޗަކަށް ހަދަންވާނެއެވެ.
އެހެންނަމަވެސް، ގޭގައި ކުރާ ފަރުވާއިން އެދެވޭ ނަތީޖާއެއް ނުފެންނަނަމަ ނުވަތަ މިކަން އިތުރަށް ގޯސްވާނަމަ ޑޮކްޓަރެއްގެ އެހީތެރިކަން ހޯދުން ވަރަށް މުހިންމެވެ. ހާއްސަކޮށް ހަކުރުބަލި ހުންނަ މީހުންނާއި، ލޭ ދައުރުވުމުގެ މައްސަލަ ހުންނަ މީހުން ނިޔަފަތީގެ އިންފެކްޝަނަކަށް ފަރުވާ ހޯދުން ލަސްކޮށްގެން ނުވާނެއެވެ. ނިޔަފަތި ވަށައިގެންވާ ހަންގަނޑު ރަތްވެ، ދުޅަވެ، ނުވަތަ ދޮސްގަންނަ ނަމަ އެއީ ސީރިއަސް މައްސަލައެކެވެ. ފައިގެ ނިޔަފަތިތަކަކީ ތިބާގެ އާންމު ސިއްހަތުގެ އެއް ބައި ކަމަށް ދެކިގެން، ރަނގަޅު އާދަތަކާއެކު ފައި ބެލެހެއްޓުމަކީ ދުޅަހެޔޮ ދިރިއުޅުމަކަށް ކޮންމެހެން ބޭނުންތެރި ކަމެކެވެ.