މާލޭގެ ސަލްޓަން ޕާކުގައި އީ-ސްޕޯޓްސް އޭރިއާއެއް ޤާއިމްކުރުމަށް ބޭނުންވާ މަސައްކަތްތައް ކޮށްދޭނެ ފަރާތެއް ހޯދުމަށް މިނިސްޓްރީ އޮފް ފައިނޭންސް އިން މިއަދު އިޢުލާންކޮށްފިއެވެ. މި މަޝްރޫޢަކީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ އެދިލެއްވުމުގެ މަތިން ކުރިއަށްގެންދާ މަސައްކަތެކެވެ.
މާލީ ވުޒާރާއިން ހާމަކުރި ގޮތުގައި، މި މަސައްކަތަށް ޝައުޤުވެރިވާ ފަރާތްތަކަށް ބީލަން ހުށަހެޅުމުގެ ފުރުޞަތު މިހާރު ވަނީ ހުޅުވާލާފައެވެ. މި ބީލަން ކުރިއަށްގެންދިއުމުގައި ޢިމާރާތްކުރުމުގެ ދާއިރާގެ ގަވާއިދުތަކާއި، ނޭޝަނަލް ޓެންޑަރުގެ އުސޫލުތަކުގެ އިތުރުން ފޮރިން ޑައިރެކްޓް އިންވެސްޓްމަންޓް ޕޮލިސީއަށް ރިޢާޔަތްކުރެވޭނެއެވެ. މި މަޝްރޫޢުގެ ބީލަންތައް ކުރިއަށްދާނީ ނޭޝަނަލް ކޮމްޕެޓިޓިވް ބިޑިންގ އުޞޫލުގެ ދަށުން ދައުލަތުގެ މާލިއްޔަތު ގަވާއިދާ އެއްގޮތްވާ ގޮތުގެ މަތިންނެވެ.
މި ބީލަމުގައި ބައިވެރިވާން އެދޭ ފަރާތްތަކުން 500 ރުފިޔާގެ ރަޖިސްޓްރޭޝަން ފީއެއް ދައްކަންޖެހޭއިރު، ބިޑް ސެކިއުރިޓީގެ ގޮތުގައި 36,500 ރުފިޔާ ހުށަހަޅަންޖެހެއެވެ. ފައިނޭންސް މިނިސްޓްރީން ބުނީ ބީލަން ހުށަހެޅުމުގެ ސުންގަޑިއަކީ އަންނަ މަހުގެ 15 ވަނަ ދުވަހުގެ މެންދުރު 13:00 ކަމަށެވެ. އަދި ހުށަހަޅާ ބީލަންތައް ހުޅުވުން އޮންނާނީ އަންނަ މަހުގެ 16 ވަނަ ދުވަހުއެވެ.
ސަލްޓަން ޕާކަކީ މާލޭގައި އާއިލާތަކާއި ކުޑަކުދިންގެ މެދުގައި ވަރަށް މަޤްބޫލު ތަނަކަށްވާއިރު، އެ ތަނުގެ އާބާތުރަ ފިލުވުމުގެ ބޮޑު މަޝްރޫޢެއް ސަރުކާރުން ވަނީ މިދިޔަ އޮގަސްޓު މަހު ފަށާފައެވެ. މި މަސައްކަތުގެ ދަށުން ޕާކުގެ ޓްރީހައުސް، ވޯކްވޭތައް، އަދި ކުޅޭ ސަރަޙައްދުތައް ވަނީ މަރާމާތުކޮށްފައެވެ. މީގެއިތުރުން ސީސީޓީވީ ކެމެރާތަކާއި ބެންޗުތައް ބެހެއްޓުމުގެ މަސައްކަތްވެސް ވަނީ ނިންމާފައެވެ.
ސަރުކާރުގެ އަމާޒަކީ މާލޭގެ މައިޒާންތައް ޒަމާނީ ފެންވަރަށް ތަރައްޤީކުރުމެވެ. އެގޮތުން ސަލްޓަން ޕާކުގެ އިތުރުން ރަސްފަންނު ސަރަޙައްދު ތަރައްޤީކުރުމުގެ މަސައްކަތްވެސް އެމްޓީސީސީ އާއި އެމްޑަބްލިޔުއެސްސީއާ ހަވާލުކޮށްގެން މިހާރު ދަނީ ބާރުސްޕީޑުގައި ކުރިއަށް ގެންދަމުންނެވެ.