ޖަލުތަކުގައި ހުކުމް ތަންފީޒުކުރާ ޤައިދީންނަކީ އަނބުރާ މުޖުތަމައަށް ނުކުންނައިރު، އެހެން ބައެއްގެ ދަށުގައި މަސައްކަތް ކުރުމުގެ ބަދަލުގައި އަމިއްލަ ކޮންސްޓްރަކްޝަން ކުންފުނިތައް އުފައްދައި ހިންގޭނެ ފެންވަރުގެ ބަޔަކަށް ހެދުމުގެ މުހިންމުކަން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ފާހަގަކުރައްވައިފިއެވެ. ވަޒީރު މިހެން ވިދާޅުވީ އައްސޭރި ޖަލުގެ އޮފިސަރުންނާއި ޤައިދީން ގުޅިގެން ބިނާކުރި އެ ޖަލުގެ އައު އޮފީސް އިމާރާތް ހުޅުވުމަށް ބޭއްވި ރަސްމިއްޔާތުގައެވެ.
އައްސޭރި ޖަލުގައި އަލަށް ބިނާކުރި އޮފީސް އިމާރާތަކީ ޖަލު އޮފިސަރުންނާއި ޤައިދީންގެ އަމިއްލަ މަސައްކަތުން ނިންމާފައިވާ ތަނެކެވެ. މީގެ ކުރިން 400 އަކަފޫޓުގެ ކުޑަ ޖާގައެއްގައި ހިންގަމުން އައި އޮފީސް، މިހާރު ވަނީ ކްލާސް ރޫމަކާއި މީޓިން ރޫމެއް ހިމެނޭހެން ޖާގަ ތަނަވެސް އައު އިމާރާތަކަށް ބަދަލުވެފައެވެ. މޯލްޑިވްސް ކަރެކްޝަނަލް ސާވިސްއިން ބުނި ގޮތުގައި މި ބަދަލާއެކު މުވައްޒަފުންނަށް މަސައްކަތް ކުރުމުގައި ބޮޑެތި ލުއިތަކެއް ލިބިގެންދާނެއެވެ.
ރަސްމިއްޔާތުގެ ތެރެއިން ވާހަކަދައްކަވަމުން ވަޒީރު އިޙްސާން ވިދާޅުވީ، ޤައިދީންގެ ކިބައިގައި ހުރި ފަންނުވެރިކަން މި އިމާރާތުން ފެނިގެންދާ ކަމަށެވެ. އަދި ހަމައެކަނި މަސައްކަތް ދަސްކޮށްދިނުމުގެ ބަދަލުގައި، ޕްރޮޖެކްޓްތައް މެނޭޖްކުރާނެ ގޮތާއި، ފައިސާ ބެލެހެއްޓުމާއި، ތަކެތި ހޯދާނެ ގޮތުގެ ތަމްރީނުތައް ޤައިދީންނަށް ދިނުމަށް ވަޒީރު އިރުޝާދު ދެއްވިއެވެ.
“އަޅުގަނޑުމެން ބޭނުންވޭ މި ބޭފުޅުންގެ އަމިއްލަ ކުންފުނިތައް އުފެދެން. މި ބޭފުޅުންގެ އަމިއްލަ ފަންނުން، ލީޑު ކުރާ ކޮންޓްރެކްޓް ގްރޫޕްތައް ފެންނަން،” ވަޒީރު ވިދާޅުވިއެވެ.
މި ޒިޔާރަތުގެ ތެރެއިން އައްސޭރި ޖަލުގެ އައު ބަދިގެ އިމާރާތުގެ ބިންގާވެސް ވަނީ އަޅާފައެވެ. މީގެ އިތުރުން، އެކި ތަމްރީނު ޕްރޮގްރާމްތައް ފުރިހަމަކުރި ޤައިދީންނަށް ސެޓްފިކެޓް ހަވާލުކޮށް، އައު ޤިރާތު ކޯހެއް ވެސް ވަނީ އިފްތިތާޙްކޮށްފައެވެ. ޖަލުގެ އިޖްތިމާޢީ ގުޅުން ބަދަހިކުރުމުގެ ގޮތުން 7 ޓީމެއް ބައިވެރިވާ ފުޓްސަލް މުބާރާތެއްވެސް ވަނީ ފައްޓަވައިދެއްވާފައެވެ.