މެދުއިރުމަތީގައި އުފެދުނު ހަމަނުޖެހުންތަކާ ގުޅިގެން ރާއްޖެއަށް ކުރަމުންދިޔަ ޝެޑިއުލް ދަތުރުތައް މެދުކަނޑާލާފައި އޮތުމަށްފަހު، ހަތަރު މަސް ދުވަހުގެ މެދުކެނޑުމަކަށްފަހު އެމިރޭޓްސް އެއާލައިނުން އަލުން ރާއްޖެއަށް ދަތުރުތައް ފަށައިފިއެވެ. މި ބަދަލާއެކު އެމިރޭޓްސްއިން ވަނީ ރާއްޖޭގެ އިތުރުން އަވަށްޓެރި ސްްރީލަންކާއަށްވެސް އެ އެއާލައިންގެ އޮޕަރޭޝަންތައް އަލުން ފަށާފައެވެ.
އަލުން ފެށި މި ދަތުރުތަކަކީ ދުބާއީ އާއި މާލެއާ ދެމެދު ކުރާ EK652 ފްލައިޓްގެ އިތުރުވުމެކެވެ. ކޮންމެ ދުވަހަކު ބާއްވާ މި ދަތުރުތަކުގައި ބޭނުންކުރަނީ ބޯއިން 777 މަރުކާގެ ބޯޓުތަކެވެ. މި ފްލައިޓް ދުބާއީއިން ފުރައިގެން މާލެއަށް ޖެއްސުމަށްފަހު ދެން ދަތުރުކުރާނީ ކޮލަމްބޯއަށެވެ. އަދި އެނބުރި ދުބާއީއަށް ކުރާ EK653 ފްލައިޓް ކުރިއަށްދާނީ ކޮލަމްބޯއިން މާލެއަށް ޖެއްސުމަށްފަހުއެވެ.
މެދުއިރުމަތީގެ ވައިގެ ސަރަހައްދުތައް ބަންދުކުރުމާ ގުޅިގެން އެ ސަރަހައްދުގެ އެއާޕޯޓުތަކުން 30,000 އަށްވުރެ ގިނަ ފްލައިޓް ކެންސަލްކުރަން ޖެހުނުއިރު، މިއީ އެމިރޭޓްސްގެ އިތުރުން ގަތަރު އެއާވޭސް އާއި އިއްތިހާދު އެއާވޭސްއަށްވެސް ބޮޑެތި ގޮންޖެހުންތަކެއް ކުރިމަތިވި ދަނޑިވަޅެކެވެ. ނަމަވެސް، އެމިރޭޓްސްއިން މިހާރު ދަނީ ރައްކާތެރިކަން ކަށަވަރުކޮށްފައިވާ އައު ވައިގެ މަގުތަކެއް ބޭނުންކޮށްގެން އެއާލައިންގެ ވިއުގަ އަލުން ބިނާކުރަމުންނެވެ. އެގޮތުން މިހާތަނަށް 110 އަށްވުރެ ގިނަ މަންޒިލްތަކަށް ދަތުރުތައް ވަނީ ފަށާފައެވެ.
ރާއްޖެއަށް އެންމެ ގިނަ ފަތުރުވެރިން ގެންނަ އެއް އެއާލައިން ކަމަށްވާ އެމިރޭޓްސްގެ ދަތުރުތައް އަލުން ފެށުމަކީ ރާއްޖޭގެ ފަތުރުވެރިކަމަށް ލިބޭނެ ބޮޑު ކުރިއެރުމެކެވެ. މިކަމުގެ ސަބަބުން މެދުއިރުމައްޗާއި ޔޫރަޕް އަދި އެމެރިކާ ފަދަ ބައްރުތަކުން ރާއްޖެއަށް ދަތުރުކުރާ ފަރާތްތަކަށް ކަނެކްޓިވިޓީ އިތުރަށް ފުޅާވެގެންދާނެއެވެ. ފަތުރުވެރިކަމުގެ ދާއިރާގެ މާހިރުން ދެކޭގޮތުގައި މިއީ ދެ ގައުމުގެ ދެމެދުގައި އޮންނަ ވިޔަފާރީގެ ގުޅުންވެސް އިތުރަށް ވަރުގަދަވެގެންދާނެ ކަމެކެވެ.
ހަނގުރާމައިގެ ސަބަބުން ރާއްޖެއަށް ކުރިމަތިވި ގޮންޖެހުންތަކުން އަރައިގަތުމަށް ސަރުކާރާއި ދާއިރާގެ ހިއްސާދާރުން ގުޅިގެން ކުރި މަސައްކަތުން، މިހާރު ގިނަ އެއާލައިންތަކެއްގެ ދަތުރުތައް ވަނީ އާންމު ހާލަތަށް ރުޖޫއަވެފައެވެ. އެމިރޭޓްސްއިން ރާއްޖެއާއި ލަންކާއަށް ހިދުމަތް ދޭތާ ތިން ދަހަރަށްވުރެ ގިނަ ދުވަސް ވެފައިވާއިރު، މި ދަތުރުތައް އަލުން ފެށުމަކީ ލަންކާގެ އެކްސްޕޯޓް ދާއިރާއަށްވެސް ލިބިގެންދާނެ ވަރަށް ބޮޑު ލުޔެކެވެ.