އައިޖީއެމްއެޗްގައި މަސައްކަތް ކުރަމުންދިޔަ ފިލިޕީންސްގެ ނަރުސް މޭރީ ގްރޭސް މަރާލި މައްސަލާގައި، އޭނާގެ ފިރިމީހާ މާވިން އެސް.ވައި. ވަރގަސް އާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ކުށް ސާބިތުވެ، ދިގު މުއްދަތުގެ ޖަލު ހުކުމްތަކެއް ކްރިމިނަލް ކޯޓުން އިއްވައިފިއެވެ. މި ދެ މީހުންގެ މައްޗަށް ކުށް ސާބިތުވާ ކަމަށް ކޯޓުން ކަނޑައަޅާފައިވަނީ މިދިޔަ ޖޫން މަހުގެ 22 ވަނަ ދުވަހުއެވެ.
މާވިންގެ މައްޗަށް 25 އަހަރުގެ ހުކުމެއް
މޭރީ ގްރޭސް އެނގިހުރެ މަރާލުމުގެ ކުށް ސާބިތުވި މާވިން އެސް.ވައި. ވަރގަސް 25 އަހަރަށް ޖަލަށްލުމަށް ޤާޒީ މުޒައްމިލް ނާސިރު ވަނީ ހުކުމް ކުރައްވާފައެވެ. މި ކުށުގެ އަސާސީ އަދަބަކީ 10 އަހަރު ކަމަށް ވީނަމަވެސް، ދައުލަތުން އެދުނު ގޮތަށް އަދަބުގެ ދަރަޖަ މަތިކުރަން ޤާޒީ ނިންމެވީ، މޭރީގެ އެއްވެސް ކުށެއް ނެތި އޭނާ މަރާލުމާއި، އެ މަރު ފޮރުވަން މާވިން މަސައްކަތް ކޮށްފައިވާތީއެވެ. މީގެ އިތުރުން، މި އަމަލުގެ ސަބަބުން އެމީހުންގެ ދަރިފުޅު މަންމަގެ ލޯބިން މަހުރޫމްވެފައިވާކަން ހުކުމުގައި ފާހަގަކޮށްފައިވެއެވެ.
މާވިން މިހާތަނަށް ބަންދުގައި ހަތަރު އަހަރާއި ހަ މަހަށްވުރެ ގިނަ ދުވަސް ހޭދަކޮށްފައިވާތީ، އޭނާ ދެން ތަންފީޒު ކުރަން ޖެހޭނީ 20 އަހަރާއި ތިން މަހާއި ފަސް ދުވަހުގެ ޖަލު އަދަބެކެވެ.
ލަމްހާގެ މައްޗަށް 15 އަހަރުގެ ހުކުމެއް
މޭރީ މަރާލުމުގައި ބައިވެރިވިކަން ސާބިތުވި ދިވެހި ނަރުސް ހަލީމަތު ލަމްހާ 15 އަހަރާއި ހަތަރު މަހަށް ޖަލަށްލުމަށް ކޯޓުން ވަނީ ހުކުމްކޮށްފައެވެ. ލަމްހާގެ މައްޗަށް އަދަބު ކަނޑައެޅުމުގައި ވެސް ދައުލަތުން ވަނީ އެންމެ ބޮޑު އަދަބަށް އެދިފައެވެ. އެއީ މާވިންއާއެކު އޮތް ގުޅުން ކުރިއަށް ގެންދިއުމުގެ ބޭނުމުގައި، ދުރާލާ ރާވައިގެން ހިންގި ރަހުމުކުޑަ އަމަލަކަށް ވާތީއެވެ.
ލަމްހާ އަދަބަށް ލުއި ދިނުމަށް އެދުނު ނަމަވެސް، ޤާޒީ ނިންމެވީ އޭނާގެ އަމަލުތަކަށް ބަލާއިރު އަދަބު ލުއިކޮށްދޭން ޖެހޭ އެއްވެސް ހާލަތެއް ނެތް ކަމަށެވެ. ލަމްހާ މިހާތަނަށް ބަންދުގައި ހޭދަކުރި މުއްދަތު އުނިކުރުމުން، އޭނާ ދެން ޖަލުގައި ހޭދަކުރަން ޖެހޭނީ 11 އަހަރާއި ބައެވެ.
މި ހުކުމާއެކު، އައިޖީއެމްއެޗްގެ ތެރޭގައި ހިނގައިދިޔަ މި ހިތާމަވެރި ހާދިސާގެ ޝަރީޢަތް ކްރިމިނަލް ކޯޓު މަރުހަލާގައި މިވަނީ ނިމުމަކަށް އައިސްފައެވެ.