ފީފާ ވޯލްޑް ކަޕްގެ ގަދަ 32 ގެ ބުރުގައި ސެނެގާލްއާ ދެކޮޅަށް ކުޅުނު މެޗުގެ ފަހު ވަގުތު ކާމިޔާބުކުރި ލަނޑުތަކާއެކު، 3-2 އިން މޮޅުވެ ބެލްޖިއަމް މުބާރާތުގެ ކުރިއަށް އޮތް ބުރަށް ދަތުރުކޮށްފިއެވެ. މިއީ 2-0 އިން ސެނެގާލް ކުރީގައި އޮއްވައި، ބެލްޖިއަމްއިން ހައިރާންކުރުވަނިވި ގޮތަކަށް ފަހަތުން އަރައި ހޯދި މޮޅެކެވެ.
މެޗުގެ ކުރީކޮޅު ސެނެގާލްގެ ފަރާތުން ފެނުނީ ވަރަށް ހަލުވި ކުޅުމެކެވެ. މެޗުގެ 25 ވަނަ މިނެޓުގައި ހަބީބް ދިއާރާ ވަނީ ސެނެގާލަށް ލީޑު ނަގައިދީފައެވެ. ދެވަނަ ހާފު ފެށިގެން ހަ މިނެޓު ތެރޭގައި އިސްމާއިލާ ސާރް ވަނީ އިތުރު ލަނޑެއް ޖަހައި ސެނެގާލްގެ ލީޑު ފުޅާކޮށްދީފައެވެ. ސާރްގެ މި ލަނޑާއެކު އޭނާ ވަނީ ވޯލްޑް ކަޕްގެ އެއް މުބާރާތެއްގައި އެންމެ ގިނަ ލަނޑު ޖެހި އެފްރިކާ ކުޅުންތެރިޔާގެ ރެކޯޑާ (4 ލަނޑު) އަރާ ހަމަކޮށްފައެވެ.
ބެލްޖިއަމްގެ ކޯޗު މެޗުގެ ކުރީކޮޅު ކެވިން ޑި ބްރުއިނާ އާއި ޖެރެމީ ޑޯކޫ ބޭލުމުން އެ ޓީމު މެޗުން ބަލިވާނެ ކަމަށް ބެލެވުނެވެ. ނަމަވެސް 86 ވަނަ މިނެޓުގައި ރޮމެލޫ ލުކާކޫ ޖެހި ލަނޑުން ބެލްޖިއަމްއަށް އުންމީދު އާވިއެވެ. އޭގެ ތިން މިނެޓު ފަހުން ޔޫރީ ޓީލަމަންސް ބޮލުން ޖެހި ލަނޑާއެކު ބެލްޖިއަމްއިން ނަތީޖާ އެއްވަރުކުރިއެވެ.
މެޗުގެ ފުރިހަމަ ވަގުތު ހަމަވިއިރު 2-2 އިން ދެ ޓީމު އެއްވަރުވެފައި އޮތުމުން ކުޅުނު އިތުރު ވަގުތުގެ ފަހު މިނުޓަގި ބެލްޖިއަމްއަށް ޕެނަލްޓީއެއް ލިބުނެވެ. ވީއޭއާރް ބެލުމަށްފަހު ދިން މި ޕެނަލްޓީ 125 ވަނަ މިނެޓުގައި ކާމިޔާބުކޮށްދިނީ ޓީލަމަންސްއެވެ. މިއީ ވޯލްޑް ކަޕްގެ ތާރީޚުގައިވެސް އެންމެ ލަހުން ޖެހި ލަނޑެވެ.
މި ނަތީޖާއާއެކު ބެލްޖިއަމް ވެފައިވަނީ 2018 ވަނަ އަހަރުގެ ވޯލްޑް ކަޕަށްފަހު، ދެ ލަނޑުގެ ލީޑެއްގައި އޮތް ޓީމެއް ބަލިކޮށް ނޮކައުޓް ބުރުގެ މެޗަކުން މޮޅުވި ފުރަތަމަ ޓީމަށެވެ. މީގެ ކުރިން 2018 ގައި ޖަޕާން އަތުންވެސް ބެލްޖިއަމް މޮޅުވީ ދެ ލަނޑު ފަހަތުގައި އޮވެގެންނެވެ.
ބެލްޖިއަމް ދެން ބައްދަލުކުރަން ޖެހޭނީ ޔޫއެސްއޭ ނުވަތަ ބޮސްނިއާ-ހެރްޒެގޮވީނާ މޮޅުވާ ޓީމަކާއެވެ.