ދިވެހިރާއްޖެ ޑިޖިޓަލް އިގްތިސާދަކަށް ބަދަލުކުރުމަށް ރައީސުލްޖުމްހޫރިއްޔާ ގެންގުޅުއްވާ ‘މޯލްޑިވްސް 2.0’ ވިޝަން ހާސިލްކުރުމުގައި، ސައިބަރ ރެޒިލިއަންސް ނުވަތަ ސައިބަރ ނުރައްކާތަކުން އަރައިގަތުމުގެ ގާބިލްކަން ވަރުގަދަކުރުމަށް ހާއްސަ އިސްކަމެއް ދޭންޖެހޭ ކަމަށް ނޭޝަނަލް ސެކިއުރިޓީ އެޑްވައިޒަރ (އެންއެސްއޭ) ރިޓަޔަރޑް ލެފްޓިނެންޓް ކަރނަލް އިބްރާހީމް ލަޠީފް ވިދާޅުވެއްޖެއެވެ.
އޮސްޓްރޭލިއާ ސަރުކާރުގެ އެހީތެރިކަމާއެކު ކުރިއަށްގެންދިޔަ "ސައިބަރ ސެކިއުރިޓީ އެންޑް ސައިބަރ ރެޒިލިއަންސް އޮސްޓްރޭލިއާ އެވޯޑްސް ފެލޯޝިޕް 2026" ނިންމުމަށް ބޭއްވި ރަސްމިއްޔާތުގައި ވާހަކަދައްކަވަމުން ލަތީފް ވިދާޅުވީ، ސައިބަރ ސެކިއުރިޓީއަކީ މިހާރު ހަމައެކަނި ޓެކްނޮލޮޖީއާ ގުޅުންހުރި ކަމެއް ނޫން ކަމަށެވެ. އޭގެ ބަދަލުގައި އެއީ ގައުމީ ސަލާމަތާއި، ރައްޔިތުންގެ އިތުބާރާއި، އަދި ދައުލަތް ހިންގުމުގެ މުޅި ނިޒާމާ ލާމެހިފައިވާ މުހިންމު އިސްތިރާޖީ ދާއިރާއެއްކަން އޭނާ ފާހަގަކުރެއްވިއެވެ.
މި ފެލޯޝިޕް ޕްރޮގްރާމަކީ ސަރުކާރުގެ ކަމާގުޅުންހުރި އިދާރާތަކުގެ ފަންނީ ގާބިލްކަން އިތުރުކުރުމަށް ލިބުނު ބޮޑު ކުރިއެރުމެއްގެ ގޮތުގައި އެންއެސްއޭ ސިފަކުރެއްވިއެވެ. ލަތީފް ވިދާޅުވި ގޮތުގައި، ޑިޖިޓަލް ވަސީލަތްތަކަށް ބަރޯސާވާ މިންވަރު އިތުރުވަމުންދާއިރު، އިގްތިސާދީ ކުރިއެރުން ދެމެހެއްޓުމަށްޓަކައި ސައިބަރ ރައްކާތެރިކަން ކަށަވަރުކުރުމަކީ މަޖުބޫރު ކަމެކެވެ.
މި ރަސްމިއްޔާތުގައި އޮސްޓްރޭލިއާއިން ރާއްޖެއަށް ކަނޑައަޅާފައި ހުންނަވާ ހައިކޮމިޝަނަރ ޑޭވިޑް ޖެސަޕް ވެސް ބައިވެރިވެވަޑައިގެންނެވިއެވެ. ޖެސަޕް ވިދާޅުވީ އާޓިފިޝަލް އިންޓެލިޖެންސް (އޭއައި) ފަދަ އައު އީޖާދުތަކާއެކު ސަރުކާރުގެ އިދާރާތަކަށް ކުރިމަތިވާ ނުރައްކާތައް އިތުރުވަމުންދާ ކަމަށެވެ. "މިފަދަ ނުރައްކާތަކަށް ގައުމުތަކުން ގުޅިގެން ތައްޔާރުވާން ޖެހޭ،" ހައިކޮމިޝަނަރ ވިދާޅުވިއެވެ. އަދި މި ދާއިރާއިން ރާއްޖެއަށް އެހީތެރިކަން ފޯރުކޮށްދިނުމުގައި އޮސްޓްރޭލިއާ ދެމިއޮންނާނެ ކަމުގެ ޔަގީންކަން އޭނާ ދެއްވިއެވެ.
އޮސްޓްރޭލިއާގެ އެޑިތު ކޯވާން ޔުނިވާރސިޓީ (އީސީޔޫ) އާ ގުޅިގެން ކުރިއަށްގެންދިޔަ މި ފެލޯޝިޕް ޕްރޮގްރާމް، ސަރުކާރުގެ އެކި ވުޒާރާތަކަށް ނިސްބަތްވާ 15 ފަންނީ މާހިރުން ވަނީ ފުރިހަމަކޮށްފައެވެ. މި ތަމްރީނުގެ ސަބަބުން ރާއްޖޭގެ ޑިޖިޓަލް އިންފްރާސްޓްރަކްޗަރ ރައްކާތެރިކުރުމަށް ބޭނުންވާ މުހިންމު ހުނަރުތަކާއި މައުލޫމާތު ބައިވެރިންނަށް ލިބިގެންގޮސްފައިވެއެވެ.