ރާއްޖޭގައި ގައުމީ ފެންވަރުގައި ގަރލް ގައިޑް ދުވަހެއް ފާހަގަކުރަން ފެށި ފުރަތަމަ އަހަރުގެ ޚާއްސަ ރަސްމިއްޔާތު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ޝަރަފުވެރިކޮށްދެއްވައިފިއެވެ. މި ރަސްމިއްޔާތުގައި ދައުލަތުގެ ވަޒީރުންނާއި ގަރލް ގައިޑް އެސޯސިއޭޝަންގެ އިސްވެރިންގެ އިތުރުން މާލޭގެ ސްކޫލްތަކުގެ ސްޓާސް، ލިޓިލް މެއިޑް، ގައިޑްސް އަދި ޔަންގް ލީޑަރުން ބައިވެރިވެފައިވެއެވެ.
މި ރަސްމިއްޔާތުގައި ވާހަކަދައްކަވަމުން މޯލްޑިވްސް ގަރލް ގައިޑް އެސޯސިއޭޝަންގެ ޗީފް ކޮމިޝަނަރ އާއިޝަތު ނަޝީދާ ވިދާޅުވީ، ގައިޑް ހަރަކާތަކީ ހަމައެކަނި އިތުރު ހަރަކާތެއް ނޫން ކަމަށާއި، މިއީ އަންހެން ކުދިން ބާރުވެރިކުރުވައި ދިރިއުޅުމުގެ މުހިންމު ހުނަރުތައް ދަސްކޮށްދޭ މުހިންމު ބިންގަލެއް ކަމަށެވެ. “ގަރލް ގައިޑް ހަރަކާތަކީ ޒުވާން އަންހެން ކުދިން ބާރުވެރިކުރުވައި ދިރިއުޅުމުގެ މުހިންމު ހުނަރުތައް އަށަގަންނަވައި، ކްލާސްރޫމްތަކުން ކިޔަވައިދޭ ފިލާވަޅުތަކާއި އެއްވަރަށް ދިރިއުޅުމަށް ބޭނުންވާ ހުނަރުތައް ދަސްކޮށްދޭ ހަރުފަތެއް،” އޭނާ ވިދާޅުވިއެވެ.
މި ރަސްމިއްޔާތުގެ ތެރެއިން ގައިޑިންގ ދާއިރާއިން ފާހަގަކޮށްލެވޭ ކާމިޔާބީތައް ހޯދާފައިވާ ފަރާތްތަކުގެ އަގުވަޒަންކޮށްފައިވެއެވެ. އެގޮތުން 47 ލީޑަރަކަށް ގައިޑަރސް ވޮރަންޓް ބެޖާއި ހަނދާނީ ލިޔުން ހަވާލުކުރިއިރު، 14 ފަރާތަކަށް ސަރވިސް އެވޯޑު އަދި ގައިޑިންގ ހަރަކާތްތަކަށް އެހީތެރިވި 5 ފަރާތަކަށް ސްޕެޝަލް ރިކޮގްނިޝަން އެވޯޑް ވަނީ ދީފައެވެ. މީގެ އިތުރުން އޭޝިއާ ޕެސިފިކް އެވޯޑް ހާސިލްކުރި 7 މެންބަރަކަށް އެވޯޑް ހަވާލުކޮށްދެއްވީ ރައީސުލްޖުމްހޫރިއްޔާއެވެ.
މި ހަފުލާގައި ގަރލް ގައިޑް އެސޯސިއޭޝަންގެ އަހަރީ މަޖައްލާގެ އިތުރުން “ކޮމިއުނިޓީ ސަރވިސް ޓޫލް ކިޓް” ވެސް ވަނީ އިފްތިތާޙްކޮށްފައެވެ. މި ޓޫލް ކިޓް އިފްތިތާޙްކޮށްދެއްވީ ޗީފް ގައިޑްގެ މަގާމުގައި ހުންނެވި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ. 1948 ވަނަ އަހަރު އުފެދުނު މި އެސޯސިއޭޝަނަކީ ރާއްޖޭގެ އަންހެން ކުދިންގެ ކުރިއެރުމަށް މެދުކެނޑުމެއްނެތި މަސައްކަތްކުރަމުން އަންނަ ޖަމިއްޔާއެކެވެ.