ނުކުޅެދުންތެރިކަން ހުންނަ ފަރާތްތަކުގެ ޙައްގުތައް ކަށަވަރުކުރުމަށް ދައުލަތާ އެކު އެންމެން އަތުގުޅާލުމަށް ނުކުޅެދުންތެރިަކން ހުންނަ ފަރާތްތަކުގެ ބަލަދުވެރިފަރާތް ކަމަށްވާ، ހެލްތު މިނިސްޓްރީ އާއި ނުކުޅެދުންތެރިކަން ހުންނަ މީހުންގެ ޙައްޤުތައް ހިމާޔަތްކުރާ ކައުންސިލުން ގޮވާލައިފިއެވެ.
މިފަދައިން އިލްތިމާސްކޮށްފައިވަނީ، ނުކުޅެދުންތެރިކަން ހުންނަ ފަރާތްތަކުގެ ފޮޓޯއާއި ވީޑިއޯ ފަދަ ޕޯސްޓްތަކަށް، އާންމުންގެ ބައެއް ފަރާތްތަކުން އެ ބޭފުޅުންގެ ކަރާމާތަށް އުނިކަން ލިބޭފަދަ އަދި މަލާމާތް ރައްދުވާފަދަ ބަހުރުވައަކުން ފާޑުކިޔަމުންދާތީ ނެރުނު ބަޔާނެއްގައެވެ.
އެ ބަޔާނުގައި ވަނީ، ނުކުޅެދުންތެރިކަން ހުންނަ ފަރާތްތަކުގެ ޕޯސްޓްތަކަށް، އާންމުންގެ ތެރެއިން ބަޔަކު ވަނީ އެ ފަރާތްތަކުގެ ކަރާމާތަށް އުނިކަން ލިބޭފަދަ އަދި މަލާމާތް ރައްދުވާފަދަ ބަހުރުވައަކުން ފާޑުކިޔުމަކީ ނުހަނު ކަންބޮޑުވާ ކަމެއް ކަން ހާމަކުރައްވާފައެވެ. އަދި އެކަން އެންމެ ހަރުކަށި އިބާރާތުން ކުށްވެރިކޮށްފައިވެއެވެ.
ނުކުޅެދުންތެރިކަން ހުންނަ ފަރާތްތަކަކީ، ދިވެހިރާއްޖެ ބައިވެރިވެފައިވާ އެންމެހާ، ބައިނަލްއަޤުވާމީ މުޢާހަދާތަކުންނާއި “ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 35 ވަނަ މާއްދާއިން ޚާއްޞަ ރައްކާތެރިކަން ލިބިގެންވާ ފަރާތްތަކެއްކަން ފާހަގަކުރައްވާ އެ ބަޔާނުގައި ވަނީ، ނުކުޅެދުންތެރިކަން ހުންނަ ފަރާތްތައް ރައްކާތެރިކުރުމާއި، މާލީ އެހީތެރިކަން ފޯރުކޮށްދިނުމުގެ ޤާނޫނުގެ ދަށުން، ނުކުޅަދެންތެރިކަން ހުންނަ ފަރާތްތަކުގެ ކަރާމާތަށް އިޙްތިރާމްކުރުމާއި، އަމިއްލަވަންތަކަމާއި، އިޖުތިމާޢީ ހަރަކާތްތަކުގައި ބައިވެރިވުމުގެ ހަމަހަމަ ފުރުޞަތު މިނިވަންކަމާއެކު ލިބުމަކީ، އެފަރާތްތަކަށް ލިބިގެންވާ ހައްޤެއް ކަމަށްވެސް ވިދާޅުވެފައެވެ.
ނުކުޅެދުންތެރިކަން ހުންނަ ފަރާތްތަކަށް މަލާމާތާއި، ފުރައްސާރަ ރައްދުވާފަދަ ބަހުރުވަ ބޭނުންކޮށް، އެފަރާތްތައް މުޖުތަމައުއިން އެކަހެރި ކުރުވާ ފަދަ އަމަލުތައް ސޯޝަލް މީޑިއާގެ މަންސަތަކުގައި ދައުރުކުރުމަކީ، ނުކުޅެދުންތެރިކަން ހުންނަ ފަރާތްތައް ޝާމިލްވާ މުޖުތަމައުއެއް ބިނާކުރުމަށް ހުރަސްއެޅޭ ކަމެއް ކަމަށް ވެސް ބަޔާނުގައި ފާހަގަކުރައްވާފައިވެއެވެ.
މީގެ އިތުރުން މިނިސްޓްރީ އާ ނުކުޅެދުންތެރިކަން ހުންނަ މީހުންގެ ހައްޤުތައް ހިމާޔަތްކުރާ ކައުންސިލުން ވަނީ މިފަދަ ކަންތައްތައް ތަކުރާރު ނުކުރުމަށާއި ނުކުޅެދުންތެެރިކަން ހުންނަަ ފަރާތްތަކުގެ ހައްޤުތައް ކަށަވަރުކުރުމަށް ދަޢުލަތުން ކުރާ ބުރަ މަސައްކަތުގައި އެންމެހާ ފަރާތްތަކުން އަތުގުޅާލާ، އެކުގައި މަސައްކަތް ކުރުމަށް އިލްތިމާސްކޮށްފައެވެ.