އެމެރިކާގެ މިނިވަންކަމަށް 250 އަހަރު ފުރުމުގެ މުނާސަބަތުގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އެމެރިކާގެ ރައީސް ޑޮނަލްޑް ޖޭ. ޓްރަމްޕަށާއި އެ ގައުމުގެ ސަރުކާރާއި ރައްޔިތުންނަށް ތަހުނިޔާ ފޮނުއްވައިފިއެވެ.
ރައީސުލްޖުމްހޫރިއްޔާ ފޮނުއްވި ތަހުނިޔާގެ ސިޓީފުޅުގައި، މިއަހަރަކީ ދެ ގައުމުގެ ދެމެދުގައި ހާރިޖީ ގުޅުން ގާއިމުކުރިތާ 60 އަހަރު ފުރޭ އަހަރުކަން ފާހަގަކުރައްވައި، މިއީ ދެ ގައުމަށްވެސް ވަރަށް ތާރީހީ އަދި ހާއްސަ އަހަރެއްކަމަށް ވިދާޅުވިއެވެ. ވޭތުވެދިޔަ ހަ އަށްޑަހަ އަހަރުގެ ތެރޭގައި ދެ ގައުމުގެ ގުޅުން ބަދަހިވެފައިވަނީ އެކަކު އަނެކަކަށް ކުރާ އިހުތިރާމާއި، ސުލްހައާއި ތަނަވަސްކަން ގާއިމުކުރުމަށް ކުރާ ގުޅިފައިވާ މަސައްކަތްތަކުގެ މައްޗަށްކަން އެމަނިކުފާނު ފާހަގަކުރެއްވިއެވެ.
ރައީސް މުއިއްޒު ވިދާޅުވި ގޮތުގައި، ދިވެހިރާއްޖެއިން އެމެރިކާއާއެކު އޮންނަ ގުޅުމަށް ވަރަށް ބޮޑު އަހަންމިއްޔަތުކަމެއް ދެއެވެ. ވަކިން ހާއްސަކޮށް ސަލާމަތީ އަދި ދިފާއީ ދާއިރާއިންނާއި، ވިޔަފާރިއާއި އިގުތިސާދީ ތަރައްގީގެ އިތުރުން ތައުލީމީ ދާއިރާއިން ދެ ގައުމުގެ މަސްލަހަތު ހިމެނޭ ކަންކަމުގައި ގުޅުން އިތުރަށް ބަދަހިކުރުމަށް ރާއްޖެއިން ދެމިއޮންނާނެކަމުގެ ޔަގީންކަން އެމަނިކުފާނު ދެއްވިއެވެ.
ސިޓީފުޅު ނިންމަވާލައްވަމުން ރައީސުލްޖުމްހޫރިއްޔާ ވިދާޅުވީ، ކުރިއަށް އޮތް ތަނުގައި ދެ ގައުމުގެ ރައްޔިތުންގެ މެދުގައި އޮތް އެކުވެރިކަން ފުޅާކުރުމަށްޓަކައި ރައީސް ޓްރަމްޕާއެކު ގާތުން މަސައްކަތްކުރެއްވުމަށް އުންމީދުކުރައްވާ ކަމަށެވެ.