ފުލުހުންގެ އެންމެ މުހިއްމު އެއް އަމާޒަކީ، މަސްތުވާތަކެތީގެ ނުރައްކާތެރި ވަބާއިން ދިވެހި މުޖުތަމައު ސަލާމަތްކުރުން ކަމަށް ކޮމިޝަނަރަ އޮފް ޕޮލިސް އަހުމަދު މުހައްމަދު ވިދާޅުވެއްޖެއެވެ.
ސީޕީ މިފަދައިން ވިދާޅުވެފައިވަނީ، މަސްތުވާތަކެތި ތަހުލީލު ކުރުމަށް ބޭނުންކުރާ ޒަމާނީ ވަސީލަތްތަކެއް ފުލުހުންގެ މުއައްސަސާއާ ހަވާލުކުރުމަށް އިއްޔެ ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
މަސްތުވާތަކެތި ހުރިތޯ ބަލައި ތަހުލީލުކުރުމަށް ބޭނުންކުރާ 150 "ފީލްޑް ޓެސްޓިންގ ކިޓް" އެމެރިކާގެ ސްޓޭޓް ޑިޕާޓްމަންޓުގެ ބިއުރޯ އޮފް އިންޓަނޭޝަނަލް ނާކޮޓިކްސް އެންޑް ލޯ އެންފޯސްމަންޓް އެފެއާޒްގެ އެހީތެރިކަމާއެކު، ޔޫ.އެން.އޯ.ޑީ.ސީ މެދުވެރިކޮށް ދިވެހި ފުލުހުންނަށް ފޯރުކޮށްދީފައިވާވުމަށް އިޝާރަތްކުރައްވާ ސީޕީ ވިދާޅުވީ، މަސްތުވާތަކެތީގެ ސަބަބުން ވޭތުވެދިޔަ އަހަރުތަކުގައި ގައުމަށް ބޮޑެތި ގެއްލުންތަކެއް ލިބި، އެތައް ޒުވާނުންނެއްގެ މުސްތަގުބަލު ވަނީ ބަދަލުވެފައެވެ. އަދި މި ވަބާގެ ނޭދެވޭ އަސަރުތައް ޖީލުތަކަކަށް ދެމިގެންގޮސްފައިވާކަން ފާހަގަކުރައްވާ ސީޕީ ވަނީ މިފަދަ ވިއުގަތައް ރޫޅާލުމަށްޓަކައި ބައިނަލްއަގުވާމީ ގުޅުންތަކާއި، ތަމްރީނުލިބިފައިވާ އޮފިސަރުންގެ އިތުރުން ސައިންސާއި ޓެކްނޮލޮޖީގެ ބޭނުން ހިފުން މުހިންމު ކަމެއްގެ ގޮތުގައި ސިފަކުރައްވާފައެވެ.
ފޯރުކޮށްދިން އާލަތްތަކަކީ ހަމައެކަނި ފޯރުކޮށްދެވުނު އާލާތްތަކެއް ނޫން ކަމަށާ އެއީ ފުލުހުންގެ މެދުގައި އޮތް އިތުބާރާއި، މަސްތުވާތަކެތި ނައްތާލުމަށް ގުޅިގެން ކުރާ މަސައްކަތުގެ ރަމްޒެއްގެ ގޮތުގައި ވެސް ސީޕީ ސިފަކުރެއްވިއެވެ.
ގާތްގަނޑަކަށް 24,000 އެމެރިކާ ޑޮލަރުގެ އަގުހުރި މި އާލާތްތަކަކީ މަސްތުވާތަކެތީގެ އޮޕަރޭޝަންތަކުގައި ހަރަކާތްތެރިވާ ފުލުހުންނަށް، ޝައްކުކުރެވޭ ބާވަތްތަކާއި ކެމިކަލްތައް ވަގުތުން ދެނެގަތުމަށް މަގުފަހިވެގެންދާނެ ވަސީލަތްތަކެކެވެ.