މި އަހަރު ބޭއްވުމަށް ހަމަޖެހިފައިވާ ދިވެހީންގެ އުފެއްދުންތެރިކަމުގެ މައުރަޒުގައި ބައިވެރިވުމުގެ މުއްދަތު އަންނަ އޯގަސްޓު މަހުގެ ނިޔަލަށް ހަމަވާނެތީ، ވީހާވެސް އަވަހަށް ރަޖިސްޓްރީވުމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން އިލްތިމާސް ކޮށްފި އެވެ. މި މައުރަޒުގައި ބައިވެރިވުމަށް ފޯމު ހުށަހެޅުމުގެ އެންމެ ފަހު ސުންގަޑިއަކީ އޯގަސްޓު 31 އެވެ.
ބީސީސީން ހާމަކޮށްފައިވާ ގޮތުގައި، މިހާތަނަށް 300 އަށްވުރެ ގިނަ ފަރާތަކުން ވަނީ މައުރަޒުގައި ބައިވެރިވުމަށް ޝައުގުވެރިކަން ފާޅުކޮށް ރަޖިސްޓްރީކޮށްފައެވެ. މިއީ 2025 ވަނަ އަހަރު ބޭއްވި އެކްސްޕޯގައި ބައިވެރިވި 240 ފަރާތާ އަޅާބަލާއިރު ބޮޑު ކުރިއެރުމެކެވެ. މިއަހަރުގެ މައުރަޒު ކުރިއަށްދާނީ އޮކްޓޯބަރު މަހުގެ 23 އިން 31 ގެ ނިޔަލަށެވެ.
މި އަހަރުގެ މައުރަޒު ފަރުމާކޮށްފައިވަނީ 16 ދާއިރާއަކުން 73 ގިންތިއެއްގެ އުފެއްދުންތަކާއި ހިދުމަތްތައް ދައްކާލެވޭ ގޮތަށެވެ. މައުރަޒުގައި ބައިވެރިވުމުގެ ފުރުސަތު އުމުރުން 13 އަހަރުން މަތީގެ ފަރުދުންނަށާއި، ކުދި އަދި މެދު ފަންތީގެ ވިޔަފާރިތަކުގެ އިތުރުން ސަރުކާރު ހިއްސާވާ ކުންފުނިތަކާއި، ތައުލީމީ މުއައްސަސާތަކާއި ކައުންސިލްތަކަށް ވަނީ ހުޅުވާލާފައެވެ. މީގެ އިތުރުން ނުކުޅެދުންތެރިކަން ހުންނަ ފަރާތްތަކަށް ހާއްސަ ކެޓަގަރީއެއްވެސް ވަނީ ހިމަނާފައެވެ.
ބީސީސީން ބުނި ގޮތުގައި މި މައުރަޒަކީ ދިވެހި ހުނަރުވެރިންގެ މަސައްކަތްތައް މާކެޓުކޮށް، ކުރިއެރުވުމަށް ލިބޭ ރަނގަޅު ފުރުސަތެކެވެ. “އަޅުގަނޑުމެންގެ އަމާޒަކީ މި އަހަރުގެ މައުރަޒަކީ އުފެއްދުންތެރިންގެ އުފެއްދުންތަކާއި ހިދުމަތްތައް ދައްކާލުމަށާއި މާކެޓުކުރުމަށް ލިބޭ އެންމެ ފަހި ފުރުސަތަށް ހެދުން،” އެ ކުންފުނިން ބުނެފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 2026 ވަނަ އަހަރަކީ އުފެއްދުންތެރިކަމުގެ ގައުމީ އަހަރުގެ ގޮތުގައި ކަނޑައަޅުއްވާފައިވާތީ، މި އަހަރުގެ މައުރަޒަކީ އެ ލަނޑުދަނޑިއަށް ވާސިލުވުމަށް އެޅޭ މުހިންމު ފިޔަވަޅެއްގެ ގޮތުގައި ބީސީސީން ދެކެއެވެ. މި މައުރަޒަކީ ބީސީސީއާއި އިގުތިސާދީ ތަރައްގީއާއި ވިޔަފާރިއާ ބެހޭ ވުޒާރާ ގުޅިގެން ކުރިއަށްގެންދާ ހަރަކާތެކެވެ.
މައުރަޒުގައި ބައިވެރިވާން ބޭނުންވާ ފަރާތްތަކަށް ފަސޭހަކަމާއެކު ރަޖިސްޓްރީ ކުރެވޭނެ އިންތިޒާމު މިހާރު ވަނީ ހަމަޖައްސާފައެވެ. އެގޮތުން expo.mv ޕޯޓަލް މެދުވެރިކޮށް އޮންލައިންކޮށް ހުރިހާ މައުލޫމާތެއް ހުށަހެޅޭނެ ކަމަށް ބީސީސީން މައުލޫމާތުދެއެވެ.