ބޮޑުތަކުރުފާނުމަގު ތަރައްޤީ ކުރުމުގެ މަޝްރޫޢުގެ ދަށުން ހެންވޭރު ފެރީ ޓާމިނަލުން ފެށިގެން ޚާރިޖީ ވުޒާރާއާ ހަމައަށް ތާރުއަޅާ ނިންމާލައިފިއެވެ.
ބޮޑުތަކުރުފާނުމަގު ތަރައްޤީ ކުރުމުގެ މަޝްރޫޢުގެ ތެރެއިން މިހާރު މަސައްކަތް ކުރަމުން ދަނީ، ފުރަތަމަ ފިޔަވަހީގައި ހިމެނޭ 5 ސެގްމެންޓުގެ މަސައްކަތުގެ ތެރެއިން، ސެގްމެންޓު 4 އަދި 5ގައި ތާރު އަޅަން ފެށީ ރޭގައެވެ. އެގޮތުން ރަސްމީ ފާލަމުން ފެށިގެން ހެންވޭރު ފެރީ ޓާމިނަލާ ހަމައަށް އޮންނަ ސަރަޙައްދުގެ ތެރެއިން، ހެންވޭރު ފެރީޓާމިނަލްއިން ފެށިގެން ޚާރިޖީ ވުޒާރާއާ ހަމައަށް މިއަދު ހެނދުނާ ހަމައަށް ތާރުއަޅާ ވަނީ ނިންމާފައެވެ.
މަސައްކަތް ކުރިއަށް ގެންދާ ކުންފުނި، އެމްޓީސީސީއިން ހާމަކުރެއްވި ގޮތުގައި، ޚާރިޖީ ވުޒާރާއިން ފެށިގެން ރަސްމީ ފާލަމާ ހަމައަށް އޮންނަ ސަރަޙައްދުގައި ތާރު އެޅުމުގެ މަސައްކަތް އަންނަ ހަފުތާ ތެރޭގައި ފަށާނެއެވެ. އެމްޓީސީސީން ވިދާޅުވީ މަގު ހުޅުވާލުމަށް ނިންމާފައިވަނީ އެއްކޮށް ތާރު އަޅާ ނިންމުމަށްފަހުގައި ކަމަށެވެ.
މަގު ތަރައްޤީ ކުރުމުގެ މަޝްރޫޢުގެ ތެރެއިން އެ ސަރަޙައްދުގެ އެއްގަމު ތޮށި ތަރައްޤީ ކޮށްފައިވަނީ، މަގު އިތުރަށް ފުޅާކޮށްގެންނެވެ. މި މަގު ތަރައްޤީ ކުރަނީ، ޒަމާނީ ފެން ހިންދާ ނިޒާމަކާއެކުއެވެ.
ބޮޑުތަކުރުފާނުމަގުގެ މި މަޝްރޫޢު ކުރިން ޖޫން މަހަށް ނިންމުމަށް އަމާޒު ހިފި ނަމަވެސް، އެކި ސަބަބުތަކާ ހުރެ މަޝްރޫޢު ނިމޭނެ ކަމަށް މިހާރު ލަފާކުރެވެނީ މި މަހުގެ 26 ވަނަ ދުވަހަށެވެ.
މީގެކުރިން މި މަޝްރޫޢުގެ ދަށުން ޢިއްޒުއްދީން މަގުން ފެށިގެން ހެންވޭރު ޓާމިނަލާ ހަމައަށް ވަނީ ތާރުއަޅައިގެން ތަރައްޤީކޮށްފައެވެ. މިހާރު ކުރިއަށްދާ މަސައްކަތްތައް ނިމުމުން، ހެންވޭރު ޓާމިނަލުން ފެށިގެން މާލޭ ނޯތު ހާބަރާ ހަމައަށް މުޅި ސަރަޙައްދު ޒަމާނީ ފެންވަރަށް ތަރައްޤީވެގެންދާނެއެވެ.