ދިވެހިރާއްޖޭގައި ޕޯސްޓުމޯޓަމް ހެދުމުގެ ޚިދުމަތް ރާއްޖޭގައި ފެށުމަށްޓަކައި ވާންޖެހޭ އެންމެހާ ތައްޔާރީތައް މިހާރު ވަމުންދާ ކަމަށް ހެލްތު މިނިސްޓަރު ގީލާ އަލީ މިއަދު ވިދާޅުވެއްޖެއެވެ.
މަސައްކަތް ފަށަފައިވަނީ، މާލެ ސިޓީ ގްރޫޕް އޮފް ހޮސްޕިޓަލްސް އިން އިސްނަގައިގެންނެވެ. އެކަން ހާމަކުރައްވާ ވަޒީރު ގީލާ ވިދާޅުވީ މި މަޝްރޫއުގެ ދަށުން ގާއިމްކުރާ ޔުނިޓުގެ ސަބަބުން، މާލެ ސަރަހައްދުގެ އިތުރުން މުޅި ރާއްޖެއަށް ބޭނުންވާ ކްލިނިކަލް ފޮރެންސިކް ހިދުމަތްތަކާއި މެޑިކޯ ލީގަލް ޕޯސްޓްމޯޓަމްގެ ހިދުމަތްތައް ހަރުދަނާ ނިޒާމެއްގެ ތެރެއިން ލިބިގެންދާނެ ކަމަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާ މެމްބަރުންގެ ސުވާލުތަކަށް ޖަވާބު ދެއްވަން ވަޑައިގެން އިންނަވާ ވަޒީރު ގީލާ ވިދާޅުވީ ރާއްޖޭގައި މި ޚިދުމަތަކީ ޚާއްސަ ހާލަތްތަކުގައި ދެވޭ ޚިދުމަތެއްކަމަށާ ފާއިތުވީ 10 އަހަރު ތެރޭގައި 23 ހަށިގަނޑެއް ޕޯސްޓްމޯޓަމް ހަދަން ރާއްޖެއިން ބޭރަށް ފޮނުވި ކަމަށެވެ. އަދި މި ޚިދުމަތް ހޯދުމަށް އިންޑިއާގެ ޓްރިވެންޑްރަމްއަށް ހަށިގަނޑު ފޮނުވައިގެން ވެސް 55،000 ރުފިޔާ އަރާ ކަމަށް ގީލާ ވިދާޅުވިއެވެ.
ވަޒީރު މިފަދައިން ވިދާޅުވިއިރު މިއީ ނިސްބަތުން ބޮޑު އަދަދެއްކަން ފާހަގަކޮށްލެވެއެވެ. އެގޮތުން ފާއިތުވި 10 އަހަރުތެރޭ ޕޯސްޓްމޯޓަމް ހަދަން ފޮނުވި 23 ހަށިގަނޑަށް ދައުލަތުން ވަނީ 1.2 މިލިއަން ރުފިޔާ ޚަރަދުކޮށްފައެވެ.
މިނިސްޓަރު ގީލާ ވިދާޅުވި ގޮތުގައި މި މަސައްކަތަށް ބޭނުންވާ ބަޖެޓާއި ބިން މިހާރު ވަނީ ކަނޑައެޅިފައެވެ. އަދި ޕޯސްޓްމޯޓަމް ފަދަ ހައްސާސް ހިދުމަތެއް ރާއްޖޭގައި ފަށާއިރު، އެކަމަށް ބޭނުންވާ ގާނޫނީ އޮނިގަނޑު ހަރުދަނާކުރުމުގެ ގޮތުން “ފޮރެންސިކް ޕެތޮލޮޖީގެ ހިދުމަތް ދިނުމުގެ ގަވާއިދު” މިހާރު އޮތީ ގެޒެޓްކުރުމުގެ މަރުހަލާގައެވެ.
މި ސަރުކާރުން ދަނީ ރާއްޖޭގައި ފުރަތަމަ ފަހަރަށް ލެވަލް ދޭއް ގެ ފޮރެންސިކް މެޑިކަލް ޔުނިޓެއް ގާއިމްކުރުމުގެ މަސައްކަތް ކުރަމުންދާއިރު މިއީ ރާއްޖޭގެ ސިއްހީ ދާއިރާއަށް ލިބިގެންދާނެ އިތުރު ކުރިއެރުމެކެވެ.
މި ސަރުކާރުގެ އަމާޒަކީ މި ހިދުމަތް ރާއްޖޭގައި ގާއިމްކޮށް، ރައްޔިތުންގެ އިތުބާރު ލިބިފައިވާ، ފެންވަރު ރަނގަޅު ވަސީލަތްތަކާއެކު ދެމެހެއްޓެނިވި ގޮތެއްގައި މި ހިދުމަތް ފޯރުކޮށްދިނުން ކަމަށް ގީލާގެ ވާހަކަފުޅުގައި ފާހަގަކުރެއްވިއެވެ