ރާއްޖޭގައި މިހާރު ފެތުރެމުންދާ ހިމަބިހި ނުވަތަ މީސަލްސް ކޮންޓްރޯލް ކުރުމަށް ކުރަމުންދާ މަސައްކަތަށް އެހީތެރިވުމުގެ ގޮތުން، ޔުނައިޓެޑް ނޭޝަންސް އިންޓަރނޭޝަނަލް ޗިލްޑްރަންސް އެމަޖެންސީ ފަންޑް (ޔުނިސެފް) އިން ރާއްޖެއަށް 28,000 ޑޯޒްގެ މީސަލްސް ރުބެއްލާ (އެމްއާރް) ވެކްސިނާއި ސިއްޙީ ސާމާނު ހަދިޔާކޮށްފިއެވެ.
މި ތަކެތި ހަދިޔާކުރުމަށް މިއަދު ސިއްޙީ ވުޒާރާގައި ބޭއްވި ރަސްމިއްޔާތެއްގައި، ދިވެހި ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ސިއްޙަތާއި، އާއިލާއާއި، އިޖުތިމާއީ އެހީއާ ބެހޭ ވަޒީރު ޤީލާ އަލީއެވެ. ޔުނިސެފްގެ ފަރާތުން ސޮއިކުރެއްވީ އެ ޖަމިއްޔާއިން ރާއްޖެއަށް ކަނޑައަޅުއްވާފައި ހުންނަވާ މަންދޫބު ޑރ. އެޑްވާޑް އަޑާއީއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޤީލާ އަލީ ވިދާޅުވީ، ޔުނިސެފުން ލިބުނު މި އެހީއަކީ ބަލިމަޑުކަމުން ރައްކާތެރިވުމަށް ލިބުނު ވަރުގަދަ ހަތިޔާރެއް ކަމަށެވެ. "މިއަދު އަޅުގަނޑުމެންނަށް ލިބުނު 28,000 ޑޯޒުގެ މީސަލްސް ރުބެއްލާ ވެކްސިނާއި އެއާ ގުޅޭ ސާމާނަކީ މި ބަލިމަޑުކަމުން ރައްކާތެރިވުމަށް ލިބުނު އެންމެ ވަރުގަދަ ހަތިޔާރު" ކަމަށް ވަޒީރު ފާހަގަކުރެއްވިއެވެ. އަދި މިއީ ދެ ފަރާތުގެ ދެމެދުގައި އޮތް ބަދަހި ގުޅުން ރަމްޒުކޮށްދޭ ކަމެއްކަންވެސް އެކަމަނާ ފާހަގަކުރެއްވިއެވެ.
ރާއްޖޭގައި ހިމަބިހި ފެތުރުން ހުއްޓުވުމަށްޓަކައި ލެބޯޓްރީ ޓެސްޓްތައް އިތުރުކުރުމާއި، ކޮންޓެކްޓް ޓްރޭސިންގްގެ މަސައްކަތްތައް ބާރުމިނުގައި ކުރިއަށްދާކަމަށް ވަޒީރު ވިދާޅުވިއެވެ. މިހާތަނަށް ހިންގި ވެކްސިން ޕްރޮގްރާމްގެ ދަށުން 5,400 އަށްވުރެ ގިނަ މީހުންނަށް ވެކްސިން ދީފައިވާކަން ފާހަގަކުރައްވައި، ސިއްޙީ ދާއިރާގެ މުވައްޒަފުން ކުރައްވާ ބުރަ މަސައްކަތަށް ވަޒީރު ވަނީ ޝުކުރު އަދާކުރައްވާފައެވެ.
މިދިޔަ މެއި މަހުން ފެށިގެން ރާއްޖެއިން މިހާތަނަށް 121 މީހަކު މި ބައްޔަށް ޕޮޒިޓިވްވެފައިވާއިރު، އޭގެ ތެރެއިން 55 ކޭސް ފެނިފައިވަނީ ހަމައެކަނި މިދިޔަ ހަފުތާގައެވެ. އެޗްޕީއޭގެ ތަފާސްހިސާބުތަކުން ދައްކާގޮތުގައި މިހާތަނަށް ޖުމްލަ 5,495 މީހުންނަށް ވަނީ ވެކްސިން ދީފައެވެ. ވަޒީރު ވަނީ ބަލީގެ އެއްވެސް އަލާމާތެއް ހުރިނަމަ، އަމިއްލަ ނަފްސާއި މުޖުތަމައުގެ ސަލާމަތަށްޓަކައި ވީހާވެސް އަވަހަކަށް ވެކްސިން ޖެހުމަށް އިލްތިމާސް ކުރައްވާފައެވެ.
ޔުނިސެފްގެ އިތުރުން، ދާދިފަހުން އިންޑިއާ ސަރުކާރުންވެސް ވަނީ ރާއްޖެއަށް 20,000 ޑޯޒްގެ ވެކްސިނާއި 3 ޓަނުގެ ސިއްޙީ އާލާތްތައް ހަދިޔާކޮށްފައެވެ. ބައިނަލްއަގުވާމީ ފަރާތްތަކުން ލިބޭ މި އެހީތަކާއެކު ރާއްޖޭގައި ހިމަބިހި ކޮންޓްރޯލް ކުރުމުގެ މަސައްކަތް ވަނީ އިތުރަށް ވަރުގަދަވެފައެވެ.