އުޒްބެކިސްތާނުން އިސްލާމީ ސިވިލައިޒޭޝަންއާ ގުޅޭގޮތުން ބޭއްވި ފުރަތަމަ ބައިނަލްއަޤްވާމީ ފޯރަމަކީ، މިއަދުގެ ދުނިޔެއަށް ކުރިމަތިވެފައިވާ ގޮންޖެހުންތަކާ މެދު މަޝްވަރާކުރުމަށް ހުޅުވުނު މުހިންމު ދޮރެއް ކަމަށް އިސްލާމީ ކަންތައްތަކާއި އައުޤާފާއި ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. އުޒްބެކިސްތާނުގެ މީޑިއާއަކަށް ދެއްވި ބަސްދީގަތުމެއްގައި ވަޒީރު ވަނީ އެ ޤައުމުން އިސްލާމީ އުންމަތަށް ދައްކަމުންދާ ރީތި ނަމޫނާއަށް ތައުރީފު ކުރައްވާފައެވެ.
ވަޒީރު ޝަހީމް ވިދާޅުވީ، އިސްލާމީ ސިވިލައިޒޭޝަން އާލާކުރުމަށާއި ތާރީޚީ މުއްސަނދި ތަރިކަތައް ހިމާޔަތްކުރުމަށް އުޒްބެކިސްތާނުން ނުހަނު މުހިންމު މަސައްކަތްތަކެއް ކުރަމުންދާ ކަމަށެވެ. މި ފޯރަމަކީ ދުނިޔޭގެ ޢިލްމުވެރިންނާއި ފިކުރުވެރިން އެއްތަންވެ، އިސްލާމީ އުންމަތަށް ކުރިމަތިވާ މައްސަލަތަކަށް ހައްލު ހޯދުމަށް ލިބުނު ރަނގަޅު ފުރުސަތެއްގެ ގޮތުގައި އެމަނިކުފާނު ސިފަކުރެއްވިއެވެ.
އުޒްބެކިސްތާނަކީ ޢިލްމާއި ހިކުމަތުގެ ގޮތުން މުއްސަނދި ތާރީޚެއް އޮތް ބިމެއްކަން ފާހަގަކުރައްވަމުން، ވަޒީރު ވިދާޅުވީ ދިވެހިރާއްޖެއާއި އުޒްބެކިސްތާނަކީ އިސްލާމީ އުންމަތުގެ ބައިވެރިންގެ އިތުރުން އިސްލާމީ އެއްބާރުލުން ބަދަލުކުރާ ޖަމިއްޔާ (އޯއައިސީ) ގެ މެންބަރު ދެ ޤައުމު ކަމަށެވެ. މި ގުޅުމުގެ ސަބަބުން ދެ ޤައުމުގެ ދެމެދުގައި އޮތް އެކުވެރިކަން އިތުރަށް ބަދަހިވެގެންދާނެ ކަމަށް ވަޒީރު ވިދާޅުވިއެވެ.
ރާއްޖެއަކީ ދުނިޔޭގެ ފަތުރުވެރިކަމުގެ މަޤްބޫލު މަންޒިލަކަށް ވާއިރު، އުޒްބެކިސްތާނުގެ ގިނަ އަދަދެއްގެ ޒުވާނުންނާއި ފަތުރުވެރިން ރާއްޖެއަށް ޒިޔާރަތްކުރާކަން ވަޒީރު ފާހަގަކުރެއްވިއެވެ. “ފަތުރުވެރިންނަށް މަރުޙަބާ ކިއުމަކީ ދިވެހިންނަށް ލިބޭ ވަރަށް ބޮޑު އުފަލެއް،” ވަޒީރު ވިދާޅުވިއެވެ.
މީގެއިތުރުން، އުޒްބެކިސްތާނުގެ ޤުދުރަތީ ރީތިކަމާއި ތާރީޚީ ތަންތަން ބަލައިލުމަށް ފަތުރުވެރިކަން ކުރިއެރުވުމުގައި ރާއްޖޭގެ ފަރާތުން ފުރިހަމަ އެއްބާރުލުން ލިބޭނެ ކަމުގެ ޔަޤީންކަންވެސް ވަޒީރު ޑރ. ޝަހީމް ވަނީ ދެއްވާފައެވެ.