ރާއްޖޭގެ އިގްތިސާދީ ކުރިއެރުމަށް އޮތް އެންމެ ބޮޑު އެއް ހުރަސްކަމުގައިވާ، މާލޭ ވިޔަފާރި ބަނދަރު ތޮއްޖެހުމުގެ މައްސަލައަށް ޒަމާންތަކެއްވީިއިރުވެސް ހައްލެއް ހޯދިފައި ނުވި ނަމަވެސް މިހާރު މި ސަރުކާރުން އެކަން ވެސް ބަދަލުކުރަމުން ގެންދާ ކަމަށް އިކޮނޮމިކު މިނިސްޓަރު މުހައްމަދު ސައީދު ވިދާޅުވެއްޖެއެވެ.
ވިޔަފާރިވެރިންނަށާއި، އާންމު ރައްޔިތުންނަށް އެމްޕީއެލް ބަދަރުން މުދާބޭލުމަށް ދަތިވަމުންންދާތީ އެކަމަށް ހައްލު ހޯދުމަށް ތިލަފުށީގައި ބަދަރެއް ގާއިމުކުރުމުގެ މަސައްކަތަށް އިޝާރާތްކުރައްވާ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ކުރިއެރުމަށް ބޮޑެތި ހުރަސްތައް ފުނިޖެހެމުން އައިކަން ސަރުކާރުތަކަށް ފެނުނުކަމަށެވެ. އެފަދަ ގޮންޖެހުމަކަށް ވެފައިއޮތް ބޮޑު އެއްމައްސަލަ އަކީ މާލޭ ވިޔަފާރި ބަނދަރު ތޮއްޖެހި މުދާބޭލުމަށް ދިމާވަމުންދާ ދަތިތައް ކަމުގައި ފާހަގަކުރައްވާ ވަޒީރު ވިދާޅުވީ ފާއިތުވެ ދިޔަތާގައި ސަރުކާރުތައް އައިސް ގޮސް ޒަމާން ބަދަލުވި އިރުވެސް މިމައްސަލަ އޮތީ އޮތް ހިސާބެއްގައި ތާށިވެފައި ކަމަށެވެ.
އޭރު ސަރުކާރުތަކުގައި އެ މައްސަލައިގެ ޙައްލު ހޯދިފައެއް ނެތް ނަމަވެސް، މިއަދު އެކަންވެސް އެދަނީ ބަދަލުވަމުން ކަމަށާ އެކަމުގެ މަސައްކަތުގެ ޢަމަލީ ސިފަޖެހެމުންދާ ކަންވެސް ފާހަގަކުރައްވާ ވަޒީރު ވިދާޅުވެފައިވަނީ ،ރައީސް ޑރ. މުހައްމަދު މުޢިއްޒުގެ ސަރުކާރުން ގެންދަވަނީ އެ ބޮޑު މައްސަލައަށް ދާއިމީ ޙައްލެއް ހޯއްދަވަމުން ކަމަށެވެ.
ރިޔާސީބަޔާނުގައި އެމަނިކުފާނު ވިދާޅުވި ފަދައިން ތިލަފުއްޓަށް މާލޭ ވިޔަފާރި ބަނދަރު ބަދަލު ކުރުމުގެ މަސައްކަތް ނޮވެންބަރު 2027އަށް ނިންމުމުގެ މަސައްކަތް ދަނީ ކުރިއަށް ކަމަށާ އަދި އޭގެ އިތުރަށް ވަގުތީ އެތައް އިންތިޒާމް ތަކެއް ހަމަޖެހި ހައްލުތަކެއްވެސް އެދަނީ ހޯދެމުން ކަމަށް ވެސް ވަޒީރު ވިދާޅުވިއެވެ.
ވަޒީރު މިފަދައިން ވިދާޅުވެފައިވާއިރު، މާލޭ ވިޔަފާރި ބަނދަރު ތޮއްޖެހުން ކުޑަކުރުމަށް އަދުގެ ރައީސް މުހައްމަދު މުއިއްޒުގެ ސަރުކާރުން ކުރަމުންދާ މަސައްކަތުގެ ދަށުން، "އެމް.ވީ ސެލެސްޓިއާ" ނަމަކަށް ކިޔާ މުދާ އުފުލާ ބޯޓަށް ކޮންޓޭނަރު ބަރުކުރުމުގެ މަސައްކަތް ތިލަފުށީ ބަނދަރުގައި ކާމިޔާބުކަމާއެކު އިއްޔެ ނިންމާލައިފައިވެއެވެ.
މި އޮޕަރޭޝަންގައި އެ ބޯޓަށް ޖުމްލަ 372 ޓީ.އީ.ޔޫ (TEUs) ގެ ކޮންޓޭނަރު ބަރުކޮށްފައިވަނީ 24 ގަޑިއިރަށްވުރެ ކުރު މުއްދަތެއްގެ ތެރޭގައެވެ.