މާލޭ މާލޭ ވިޔަފާރި ބަނދަރު ތޮއްޖެހުން ކުޑަކުރުމަށް ފަށަފައިވާ “އެމް.ވީ ސެލެސްޓިއާ”ގެ މަސައްކަތް ކާމިޔާބުކަމާއެކު ނިންމާލައިފިއެވެ.
މިކަން ހާމަކުރައްވާ އެމްޕީއެލުން އެކްސްގައި ކުރެއްވި ޕޯސްޓެއްގައި ވިދާޅުވީ، ވިޔަފާރިވެރިންނަށާއި، އާންމު ރައްޔިތުންނަށް އެމްޕީއެލް ބަނދަރުން މުދާ ބޭލުމަށް ދަތިވާތީއާ އެކު މާލޭ ވިޔަފާރި ބަނދަރު ތޮއްޖެހުން ކުޑަކުރުމަށް އަދުގެ ރައީސް މުހައްމަދު މުއިއްޒުގެ ސަރުކާރުން ކުރަމުންދާ މަސައްކަތުގެ ދަށުން، “އެމް.ވީ ސެލެސްޓިއާ” ނަމަކަށް ކިޔާ މުދާ އުފުލާ ބޯޓަށް ކޮންޓޭނަރު ބަރުކުރުމުގެ މަސައްކަތް ތިލަފުށީ ބަނދަރުގައި ކާމިޔާބުކަމާއެކު އިއްޔެ ނިންމާލައިފައިވާ ކަމަށެވެ.
މި އޮޕަރޭޝަންގައި އެ ބޯޓަށް ޖުމްލަ 372 ޓީ.އީ.ޔޫ (TEUs) ގެ ކޮންޓޭނަރު ބަރުކޮށްފައިވަނީ 24 ގަޑިއިރަށްވުރެ ކުރު މުއްދަތެއްގެ ތެރޭގައި ކަމަށާ މެއި 2026 ގައި ތިލަފުށީ ބަނދަރުގައި ޓްރަޔަލް އޮޕަރޭޝަންތައް ފެށި ފަހުން، “އެމް.ވީ ސެލެސްޓިއާ” އަކީ އެ ބަނދަރުގައި ކާމިޔާބުކަމާއެކު ބަނދަރުކުރި ހަތަރުވަނަ ބޯޓުކަން އެމް.ޕީ.އެލްއިން ހާމަކުރައްވާފައިވެއެވެ.
މާލޭ ބަނދަރަށް ދިމާވެފައިވާ ބާރުބޮޑުވުމުގެ މައްސަލައަށް ހައްލެއް ހޯދުމަށް ތިލަފުށީ ބަނދަރުގެ ބޭނުން މިހާރު އަންނަނީ ހިފަމުންނެވެ.
ފާއިތުވި ސަރުކާރުތަކަށް ހައްލުނުކުރެވި އޮތް މި މައްސަލައަށް ރައީސް ޑރ މުއިއްޒުގެ ސަރުކާރުން އެޓެންޑުވެ ހަލުވިކަމާ އެކު ހައްލު ހޯދުމުގެ މަސައްކަތް ގެންދަނީ ކުރިއަށެވެ. ސަރުކާރުގެ އަމާޒަކީ، ނޮވެމްބަރު 2027ގެ ނިޔަލަށް ތިލަފުށީ ބަނދަރުގެ މަސައްކަތް އެއްކޮށް ނިންމާލުމެވެ. މި މަޝްރޫއަކީ ރާއްޖޭގެ އިގްތިސާދީ ކުރިއެރުމަށް ހުރަސްއަޅާފައިވާ ބަނދަރު ތޮއްޖެހުމުގެ މައްސަލައަށް އޮތް އެންމެ ފުރިހަމަ އަދި ދާއިމީ ހައްލު ކަމަށް ސަރުކާރުން ފާހަގަކުރެއެވެ.
މި މަސައްކަތް ނިމުމުން، މުދާ ބޭލުމުގައި ދިމާވާ ދަތިތައް ނެތިގޮސް، ވިޔަފާރިތަކަށް ބޮޑު ލުޔެއް ލިބިގެންދާނެއެވެ. މިއީ ރާއްޖޭގެ އުމްރާނީ ތަރައްގީގެ ތާރީޚުގައި ކުރިއަށްދާ އެންމެ މުހިންމު އެއް މަޝްރޫއެވެ.