ހުޅުމާލޭގައި 100 މެޓްރިކް ޓަނުގެ ކަންނެލި ބަންދުކުރާ ފެކްޓްރީއެއް ގާއިމުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅުގެ ދަށުން، އެ މަސައްކަތް މިދިޔަ ހަފުތާގައި ބަޔަކާ ހަވާލުކޮށްފި އެވެ. މިކަން ހާމަކުރެއްވީ ފިޝަރީޒް، އެގްރިކަލްޗާ އެންޑް އޯޝަން ރިސޯސަސް މިނިސްޓަރު އަހުމަދު ޝިޔާމެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ މެންބަރު މައުރޫފް ޒާކިރު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ޝިޔާމް ވިދާޅުވީ، ކަންނެލި މަސްވެރިންނަށް ދިމާވެފައިވާ ދަތިތަކަށް ހައްލެއް ހޯދައިދިނުމަށް ގާއިމުކުރާ މި ފެކްޓްރީގެ މަސައްކަތް ކުރިއަށް އޮތް 18 މަސްދުވަހުގެ ތެރޭގައި އެއްކޮށް ނިންމާލެވޭނެ ކަމަށެވެ. މިއީ ކަންނެލި މަސްވެރިން ސަރުކާރުގައި އެދެމުންދާ އެންމެ މުހިންމު އެއް ކަންތައް ކަމަށްވެސް މިނިސްޓަރު ފާހަގަކުރެއްވި އެވެ.
މިނިސްޓަރު ވިދާޅުވީ މާލެ ސަރަހައްދާއި ރިސޯޓްތައް ގިނަ ސަރަހައްދުތަކުގައި ހަރަކާތްތެރިވާ މަސްވެރިންނަށް މަސްވިއްކުމުގައި ބޮޑެތި ގޮންޖެހުންތަކެއް ހުރި ކަމަށެވެ. އެގޮތުން މިފްކޯއިން މިދިޔަ އަހަރު ކަންނެލި ގަންނަން ފެށި ނަމަވެސް، އަދި ގަންނަނީ 10 އާއި 15 ކިލޯއިން މަތީގެ ކަންނެލި ކަމަށް ޝިޔާމް ވިދާޅުވި އެވެ.
“ހުޅުމާލޭގައި ކަންނެލިމަސް ބަންދުކުރާނެ ފެކްޓްރީއެއް ގާއިމުކުރުމަށްޓަކައި އަޅުގަނޑުމެން މިވަނީ ބަޔަކާ މިދިޔަ ހަފްތާގައި ހަވާލުކޮށްފަ. އަޅުގަނޑުމެން މި ބަލަނީ ކުރިޔަށް އޮތް 18 މަސްދުވަހުގެ ތެރޭގައި އަޅުގަނޑުމެންނަށް މުޅި މަސައްކަތް އެއްކޮށް ނިންމާލެވޭނެ ކަމަށް،” މިނިސްޓަރު ވިދާޅުވި އެވެ.
މީގެ އިތުރުން، މަހާއި މަހުގެ ބާވަތްތައް އިޝްތިހާރުކޮށް ޕްރޮމޯޓް ކުރުމަށް ސަރުކާރުން ވަކި ކުންފުންޏެއް އުފައްދާފައިވާކަން މިނިސްޓަރު ފާހަގަކުރެއްވި އެވެ. އެ ކުންފުނީގެ މައިގަނޑު މަގްސަދަކީ ދިވެހި މަސްވެރިން ބާނާ މަހަށް ރާއްޖެއާއި ބައިނަލްއަގުވާމީ ބާޒާރުން ރަނގަޅު ފުރުސަތުތަކެއް ހޯދައިދިނުމެވެ. ނަމަވެސް މިކަމުގައި އަދިވެސް އެންމެ އެދެވޭ ހައްލެއް ނުލިބޭކަން މިނިސްޓަރު ގަބޫލުކުރައްވަ އެވެ.
ހުޅުމާލޭގައި މިފަދަ ފެކްޓްރީއެއް ބިނާކުރާނެކަން ރައީސުލްޖުމްހޫރިއްޔާ އެންމެ ފުރަތަމަ އިއުލާން ކުރެއްވީ މިއަހަރުގެ ރިޔާސީ ބަޔާން އިއްވަވަމުންނެވެ. މި މަޝްރޫއު ނިމުމުން ކަންނެލި މަސްވެރިންނަށް ދާއިމީ ހައްލެއް ލިބިގެންދާނެ ކަމުގެ ޔަގީންކަން ސަރުކާރުން ވަނީ ދީފަ އެވެ.