ދިވެހިރާއްޖޭގެ އިގްތިސާދީ ހާލަތު ގޯސްވެ، ގައުމު ދަރުވާލުމުގެ މޭސްތިރިއަކީ ނިމިދިޔަ ސަރުކާރުގެ މާލީ ވަޒީރު އިބްރާހިމް އަމީރު ކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ތުހުމަތު ކުރައްވައިފިއެވެ. ވަޒީރު މިހެން ވިދާޅުވީ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، މިހާރުގެ އިގްތިސާދީ ހާލަތާ ގުޅޭގޮތުން އެމްޑީޕީން ދެއްކި ވާހަކަތަކަށް ރައްދު ދެއްވަމުންނެވެ.
އެމްޑީޕީން ދާދި ފަހުން ބޭއްވި ޕެނަލް ޑިސްކަޝަނެއްގައި، ޑޮލަރުގެ ތާށިކަން ކުރިމަތިވަނީ މި ސަރުކާރުން ކުރާ ބޭކާރު ހަރަދުތަކުގެ ސަބަބުން ކަމަށް އަމީރު ވިދާޅުވެފައިވާތީ، އެކަމަށް ރައްދު ދެއްވަމުން ސައީދު ވިދާޅުވީ ރާއްޖެ މިހާ ހިސާބަށް ވައްޓާލި ބޭފުޅަކީ އަމީރު ކަމަށެވެ. “އެ ހިސާބަށް ރާއްޖެ ވައްޓާލުމުގެ ޓޯޓަލް ޑިޒައިންގެ މޭސްތިރިއަކީ އަމީރް. ސޯލިހަށް ލަފާ އަރުވާނީ އަމީރް،” ސައީދު ވިދާޅުވިއެވެ.
ސައީދު އިތުރަށް ފާހަގަކުރެއްވި ގޮތުގައި، 19 ވަނަ ރައްޔިތުންގެ މަޖިލީހުގައި އަމީރުގެ އަމިއްލަ ޕާޓީގެ މެންބަރުން ވެސް ވަނީ އޭނާގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައެވެ. އެގޮތުން އެމްޑީޕީ ދެ ފެކްޝަނަކަށް ބެހުނުއިރު، އޭރު އަމީރަށް ފާޑުވިދާޅުވި ބައެއް ބޭފުޅުން މިހާރު އެމްޑީޕީގެ ޕެނަލްތަކުގައި ތިއްބެވިކަން އޭނާ ފާހަގަކުރެއްވިއެވެ.
ޚާއްސަކޮށް، ކުރީގެ މެންބަރު އިލްޔާސް ލަބީބް އޭރު ދެއްކެވި ވާހަކަތަކަށް ސައީދު އަލިއަޅުވާލެއްވިއެވެ. އިލްޔާސްއަކީ އެމްޑީޕީ ސަރުކާރުގައި ބޯދާ ގޮތަށް ފައިސާ ޗާޕްކުރުމާ ދެކޮޅަށް އެންމެ ބާރަށް އަޑުއުފުއްލެވި އެކަކު ކަމަށާއި، ފައިސާ ޗާޕްކުރުމުގެ ސަބަބުން ދިވެހި ރުފިޔާގެ އަގު ވެއްޓިފައިވާ ކަމަށް އޭރު އިލްޔާސް ވިދާޅުވި ކަމަށް ސައީދު ހަނދާންކޮށްދެއްވިއެވެ.
މީގެ އިތުރުން، އޭރުގެ ގަވަރުނަރު އަލީ ހާޝިމްއާ އެކު މާލިއްޔަތު ކޮމިޓީގައި ކުރެވުނު ސުވާލުތަކަށް ވެސް އެކަށީގެންވާ ޖަވާބެއް ދެއްވާފައިނުވާ ކަމަށް ސައީދު ވިދާޅުވިއެވެ. ފައިސާ ޗާޕްކުރާ ސަބަބާ ގުޅޭގޮތުން ސުވާލުކުރުމުން އޭރުގެ މާލީ އިދާރާތަކުން ހަނު ތިބި ކަމަށް އޭނާ ތުހުމަތު ކުރެއްވިއެވެ.
ވަޒީރު ސައީދު ވިދާޅުވީ ރައްޔިތުން މިހާރު ބޭނުންވަނީ ސިޔާސީ ވާހަކަތަކަށްވުރެ ބޮޑަށް މި މައްސަލަތަކުގެ ހައްލު ކަމަށެވެ. އިދިކޮޅު ފަރާތްތަކުން ހައްލެއް ދެއްކުމުގެ ބަދަލުގައި ސިޔާސީ ވާހަކަ ދައްކަމުންދާއިރު، މި ސަރުކާރުން ދަނީ އިގްތިސާދީ ދަތިތަކުން އަރައިގަތުމަށް އަމަލީ ގޮތުން ގިނަ މަސައްކަތްތަކެއް ކުރަމުން ކަމަށް އޭނާ ވިދާޅުވިއެވެ.