ކ. ގިރިފުށީގެ ބިން ހިއްކުމާއި ބަނދަރު ތަރައްގީކުރުމުގެ ބޮޑު މަޝްރޫއު ކުރިއަށްދާ ސަރަހައްދަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ޒިޔާރަތްކުރައްވައި، މަސައްކަތްތައް ހިނގަމުންދާ ގޮތް ބައްލަވާލައްވައިފިއެވެ. ރައީސް މި ސަރަހައްދަށް ވަޑައިގެންނެވީ އެ ރަށުގައި ބޭއްވި އެމްއެންޑީއެފްގެ 72 އަދި 73 ވަނަ އަސާސީ ތަމްރީނު ކޯހުގެ ދަރިވަރުން ހުވާކުރުމުގެ ރަސްމިއްޔާތަށް ފަހުގައެވެ.
މި މަޝްރޫއަކީ ދިވެހި އަސްކަރިއްޔާގެ ގާބިލްކަން އިތުރުކުރުމަށް ރައީސް ޑރ. މުއިއްޒު ގެންގުޅުއްވާ އިސްތިރާޖީ ސިޔާސަތުގެ ދަށުން ކުރިއަށްގެންދާ މުހިންމު މަސައްކަތެކެވެ. މިދިޔަ ޖޫން މަހުގެ 20 ވަނަ ދުވަހު ރަސްމީކޮށް ފެށި މި މަޝްރޫއުގެ މަގްސަދަކީ ސިފައިންގެ ތަމްރީނުތަކަށް ބޭނުންވާ ވަސީލަތްތައް ފުޅާކޮށް، ގައުމީ ދިފާއީ ބާރުގެ ހުނަރުވެރިކަން އިތުރުކުރުމެވެ.
މި މަޝްރޫއުގެ ދަށުން ގިރިފުށީގެ މިހާރުގެ ބޮޑުމިނަށް 13.3 ހެކްޓަރުގެ ބިން އިތުރުކުރުމަށް ވަނީ ހަމަޖެހިފައެވެ. މިއާއެކު މިހާރު އޮތް 5.7 ހެކްޓަރުގެ ބިމާއެކު، ތަމްރީނުތަކަށް ބޭނުންކުރާނެ ބޮޑު ސަރަހައްދެއް އަސްކަރިއްޔާއަށް ލިބިގެންދާނެއެވެ. މީގެ އިތުރުން، މިހާރު ބޭނުންކުރާ 100 މީޓަރުގެ ފަޔަރިން ރޭންޖުގެ ބަދަލުގައި 300 މީޓަރުގެ ޒަމާނީ ސްމޯލް އާމްސް ރޭންޖެއް މި މަޝްރޫއުގެ ދަށުން ގާއިމުކުރެވޭނެއެވެ.
އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއުގައި ބިން ހިއްކުމުގެ އިތުރުން، އައްސޭރިފަށުގެ ހިމާޔަތަށް ބޮޑުގަލުގެ ރިވެޓްމަންޓް ޖެހުމާއި، ރަށް ގިރުން ހުއްޓުވުމަށް ބޭރުތޮށްޓާއި ގްރޮއިންސް ޖެހުން ހިމެނެއެވެ. އަދި ދަތުރުފަތުރުގެ ލުއިފަސޭހަކަމަށްޓަކައި 40 މީޓަރުގެ ޖެޓީއަކާއި 12 މީޓަރުގެ ޖެޓީއެއްގެ އިތުރުން އެލް-ބްލޮކް ކީ-ވޯލްއެއް ވެސް ތަރައްގީކުރާނެއެވެ.
އެމްޓީސީސީން މައުލޫމާތު ދޭ ގޮތުގައި، ޖުމްލަ 182.79 މިލިއަން ރުފިޔާގެ މި މަޝްރޫއުގެ ދަށުން 375,512 ކިއުބިކް މީޓަރުގެ ބިން ހިއްކުމާއި، 2,712 މީޓަރުގެ ރިވެޓްމަންޓް ޖެހުމާއި، 101 މީޓަރުގެ އެއްގަމު ތޮށިލުމުގެ މަސައްކަތް ކުރާނެއެވެ. އަދި 1,135 އަކަ މީޓަރުގެ ޕޭވްމަންޓަކާއި ބްރިޖެއް ހެދުން ވެސް މި މަސައްކަތުގެ ތެރޭގައި ހިމެނެއެވެ.
އަހަރެއްހުގެ ދުވަހުގެ ތެރޭގައި ނިންމުމަށް ހަމަޖެހިފައިވާ މި މަޝްރޫއު ނިމުމުން، އެމްއެންޑީއެފްގެ އަސްކަރީ ތަމްރީނުތަކަށާއި ކެޑޭޓް ކޯޕްސްގެ ހަރަކާތްތަކަށް ބޭނުންކުރާ ގިރިފުށީގެ ވަސީލަތްތައް ވަރަށް ބޮޑަށް ފުރިހަމަވެގެންދާނެ ކަމަށް ބެލެވެއެވެ.