ރީތިވުމަށްޓަކައި ބޭނުންކުރާ ތަފާތު އުކުޅުތަކާއި އުފެއްދުންތައް ޒަމާނާ އެކު ބަދަލުވަމުންދިޔަ ނަމަވެސް، ދުޅަހެޔޮ ހަމަކީ ދުވަހަކުވެސް އޭގެ ބަދަލު ނުވާނޭ ކަމެކެވެ. ކޮންމެ އަހަރަކުވެސް އެތައް އާ އުފެއްދުންތަކެއް ބާޒާރަށް ނެރެ، އޭގެ ސަބަބުން ހަންގަނޑު އޮމާންވެ، ރޫތައް ފިލައި، ވަގުތުން އުޖާލާކަން ގެނެސްދޭނެ ކަމަށް ވަޢުދުވެއެވެ. ނަމަވެސް، ހަމުގެ ޚާއްޞަ ޑޮކްޓަރުން ނުވަތަ ޑާމަޓޮލޮޖިސްޓުން ވިދާޅުވާ ގޮތުގައި، ހަގީގީ ރީތިކަން ލިބެނީ ސޯޝަލް މީޑިއާގައި ފެންނަ ކޮންމެ ޓްރެންޑެއްގެ ފަހަތުން ދިއުމަކުން ނޫނެވެ. އޭގެ ބަދަލުގައި، ދިރިއުޅުމުގެ ކޮންމެ މަރުހަލާއެއްގައިވެސް ހަންގަނޑު ރައްކާތެރިކޮށް ބެލެހެއްޓުމަށް އާދަކުރާ ސާދާ އަދި ދާއިމީ އުސޫލުތަކަކުންނެވެ.
އުމުރުން ދުވަސްވަމުންދާ ވަރަކަށް ހަންގަނޑަށް ބޮޑެތި ބަދަލުތަކެއް އާދެއެވެ. ފުރާވަރުގެ ކުއްޖެއްގެ ހަންގަނޑަށް އެކަށީގެންވާ ފަރުވާއަކީ އުމުރުން 40 ނުވަތަ 60 އަހަރުގެ މީހަކަށް އެންމެ ރަނގަޅު ގޮތް ކަމުގައި ނުވެދާނެއެވެ. ހޯރމޯންތަކަށް އަންނަ ބަދަލުތަކާއި، ދިރިއުޅުމުގެ އާދަކާދަތަކާއި، އަވިން ލިބޭ ގެއްލުމާއި، ކާނާގެ ބާވަތްތަކުގެ އިތުރުން ނިދުމާއި ނަފްސާނީ ދުޅަހެޔޮކަމަކީ ހަންގަނޑުގެ ސިއްހަތަށް ސީދާ އަސަރުކުރާ ކަންކަމެވެ. ހަމުގެ މާހިރުން ފާހަގަކުރައްވާ ގޮތުގައި، ހަންގަނޑަށް އަންނަ ރޫތަކާއި ލައްތަކަށް ފަރުވާ ދިނުމަށްވުރެ، އެކަންކަމުން ރައްކާތެރިވުމަށް ކުރިއާލައި ފިޔަވަޅު އެޅުން މާ މުހިންމެވެ.
ފުރާވަރުގެ ކުއްޖެއްގެ ހަންގަނޑަށް އެކަށީގެންވާ ފަރުވާއަކީ އުމުރުން 40 ނުވަތަ 60 އަހަރުގެ މީހަކަށް އެންމެ ރަނގަޅު ގޮތް ކަމުގައި ނުވެދާނެ
ޅައުމުރުގައި ހަންގަނޑު ރައްކާތެރިކުރުމުގެ މުހިންމުކަން
ގިނަ ބަޔަކަށް ގަބޫލުކުރެވެނީ ހަމުގެ ފަރުވާއަކީ ހަމައެކަނި އުމުރުން ދުވަސްވާން ފެށުމުން ނުވަތަ ރޫތައް ފާޅުވާން ފެށުމުން ފަށަންޖެހޭ ކަމެއްގެ ގޮތުގައެވެ. ނަމަވެސް ޑާމަޓޮލޮޖިސްޓުން މިކަމާ ދެކޮޅު ހައްދަވައެވެ. އެ ބޭފުޅުން ވިދާޅުވާ ގޮތުގައި ހަންގަނޑަށް ލިބޭ ގެއްލުންތައް ރަނގަޅު ކުރުމަށްވުރެ، އެ ގެއްލުންތަކުން ރައްކާތެރިވުން މާ ފަސޭހައެވެ. އަވިން ރައްކާތެރިވުމާއި، މަޑުމައިތިރިކޮށް ހަންގަނޑު ސާފުކުރުމާއި، އެކަށީގެންވާ ވަރަށް ފެން ބޭނުންކުރުމަކީ ކުޑަކުދިންގެ އުމުރުން ފެށިގެންވެސް ސަމާލުކަން ދޭންޖެހޭ ކަންކަމެވެ.
ބޯޑް-ސެޓިފައިޑް ޑާމަޓޮލޮޖިސްޓެއް ކަމަށްވާ ޑރ. އެމިލީ ކާޓާ ވިދާޅުވެފައިވަނީ، "އެންމެ ރަނގަޅު އެންޓި-އޭޖިންގ ފަރުވާއަކީ އަގުބޮޑު ކްރީމެއް ނޫން" ކަމަށެވެ. އޭގެ ބަދަލުގައި އެއީ ގެއްލުން ލިބުމުގެ ކުރިން ހަންގަނޑު ރައްކާތެރިކުރުމެވެ. ފުރާވަރު އުމުރުގައި ހަންގަނޑުން ތެޔޮ އުފައްދާ މިންވަރު އިތުރުވުމުގެ ސަބަބުން ބައެއް ކުދިން ގަދައަށް މޫނު އުނގުޅުމާއި ބާރުގަދަ ކެމިކަލްތައް ބޭނުންކުރެއެވެ. ނަމަވެސް މާހިރުން ލަފާދެއްވަނީ ދުވާލަކު ދެ ފަހަރު މަޑުމައިތިރި ފޭސްވޮޝްއަކުން މޫނު ދޮވުމަށާއި، ތެޔޮ ނުހިމެނޭ މޮއިސްޗަރައިޒާއަކާއި ސަންސްކްރީން ބޭނުންކުރުމަށެވެ. މާ ގިނައިން މޫނު ދޮވުމަކީ ހަންގަނޑު ހަލާކުވެ، ބްރޭކްއައުޓްސް އިތުރުވާ ކަމެކެވެ.
އުމުރުން 20ގެ {20 އިން 29 އާ ހަމައަށް) އަހަރުގެ ދުވަސްވަރަކީ ގުދުރަތީ ގޮތުން ހަންގަނޑު އެންމެ ދުޅަހެޔޮކޮށް ހުންނަ ދުވަސްވަރެވެ. ނަމަވެސް މިއީ އަވިން ލިބޭ ގެއްލުންތައް ހަންގަނޑުގައި ޖަމާވާން ފަށާ ދުވަސްވަރުވެސް މެއެވެ. އެހެންކަމުން، ބޭރަށް ނުދިޔަ ނަމަވެސް ކޮންމެ ދުވަހަކު ސަންސްކްރީން ބޭނުންކުރުމަކީ ކޮންމެހެން ކުރަންޖެހޭ ކަމެކެވެ. މީގެ އިތުރުން ވިޓަމިން ސީ ފަދަ އެންޓިއޮކްސިޑެންޓްތައް ހިމެނޭ އުފެއްދުންތައް ބޭނުންކުރަން ފެށުމަކީ މުސްތަގުބަލުގައި ހަންގަނޑު ރީތިކޮށް ބެހެއްޓުމަށް އެޅޭ މުހިންމު ފިޔަވަޅެކެވެ.
އުމުރުން 30 އަދި 40 ގެ އަހަރުތަކުގައި ސަމާލުކަން ދޭންޖެހޭ ކަންކަން
އުމުރުން 30 އަހަރު ފުރުމުން ހަށިގަނޑުން ކޮލަޖަން އުފައްދާ މިންވަރު މަޑުމަޑުން ދަށްވާން ފަށައެވެ. މީގެ ސަބަބުން ލޮލާއި ނިތްކުރި ކައިރިން ކުދި ރޫތައް ފާޅުވާން ފަށައެވެ. މި ދުވަސްވަރު ރެޓިނޮއިޑްސް، ޕެޕްޓައިޑްސް އަދި ހަޔަލޫރޮނިކް އެސިޑް ފަދަ މާއްދާތައް ހަމުގެ ފަރުވާގެ ތެރެއަށް އިތުރުކުރުމަށް ޑޮކްޓަރުން ލަފާދެއްވައެވެ. ހަމައެއާއެކު، ނިދި މަދުވުމާއި، ދުންފަތުގެ އިސްތިއުމާލުކުރުމާއި، ސިއްހަތަށް ނުބައި ކާނާ ބޭނުންކުރުމުގެ ނޭދެވޭ އަސަރުތައް ހަންގަނޑުން ފެންނަން ފަށަނީވެސް މި އުމުރުގައެވެ. ގިނައިން ފެން ބުއިމާއި ހަމަނިދި ހޯދުމަކީ އެއްވެސް އަގުބޮޑު ކޮސްމެޓިކް އުފެއްދުމަކަށްވުރެ ބޮޑު ބަދަލެއް ހަންގަނޑަށް ގެނެސްދޭނެ ކަންކަމެވެ.
"އެންމެ ރަނގަޅު އެންޓި-އޭޖިންގ ފަރުވާއަކީ އަގުބޮޑު ކްރީމެއް ނޫން" ؛ އޭގެ ބަދަލުގައި އެއީ ގެއްލުން ލިބުމުގެ ކުރިން ހަންގަނޑު ރައްކާތެރިކުރުމެވެ.
"އެންމެ ރަނގަޅު އެންޓި-އޭޖިންގ ފަރުވާއަކީ އަގުބޮޑު ކްރީމެއް ނޫން" ؛ އޭގެ ބަދަލުގައި އެއީ ގެއްލުން ލިބުމުގެ ކުރިން ހަންގަނޑު ރައްކާތެރިކުރުމެވެ.
އުމުރުން 40 އަހަރަށްވުރެ މަތިވުމުން ހަންގަނޑު ކުރިއަށްވުރެ ބޮޑަށް ހިކިވެ، އޭގެ އިލާސްޓިކްކަން ކުޑަވެއެވެ. މި މަރުހަލާގައި ހަންގަނޑުގެ ތެތްކަން ދެމެހެއްޓުމަށްޓަކައި "ސެރަމައިޑްސް" ހިމެނޭ ބޯ މޮއިސްޗަރައިޒާތައް ބޭނުންކުރުން މުހިންމެވެ. އަދި ހަންގަނޑުގައި ހުންނަ ގުދުރަތީ ތެޔޮކަން ނައްތާލާ ފަދަ ބާރުގަދަ ސައިބޯނި ނުވަތަ ކްލެންޒާތަކާ ދުރުވާންޖެހެއެވެ. ކާނާގެ ތެރޭގައި ހަށިގަނޑަށް ފައިދާހުރި ފެޓްސް، މޭވާ، ތަރުކާރީ އަދި ޕްރޮޓީން ގިނަކުރުމަކީ ހަންގަނޑު އެތެރެއިން މަރާމާތުކޮށްދޭނެ ކަމެކެވެ.
ގިނަ މީހުންނަށް ދިމާވާ މައްސަލައަކީ އުމުރުން 20 އަހަރުގައި ބޭނުންކުރި އުފެއްދުންތައް 40 އަހަރުގައިވެސް ބޭނުންކުރުމެވެ. ނަމަވެސް އުމުރާއެކު ހަންގަނޑުގެ ބޭނުންތައް ބަދަލުވާކަން ދަނެގަންނަންޖެހެއެވެ. ހަންގަނޑު ދަމައިގަންނަ ގޮތްވުމާއި، ހިކިގެން ހިރުވުން ފަދަ ކަންކަމަކީ ހަންގަނޑަށް އިތުރު ތެތްކަމާއި ފަރުވާ ބޭނުންވާކަމުގެ ނިޝާންތަކެވެ. މި އުމުރުގައި ހަންގަނޑަށް އަންނަ ބަދަލުތަކަށް އިހުތިރާމްކޮށް، އެއަށް އެކަށީގެންވާ އަޅާލުން ދިނުމަކީ މުހިންމު ކަމެކެވެ.
ހަންގަނޑަށް އަންނަ ބަދަލުތަކަށް އިހުތިރާމްކޮށް، އެއަށް އެކަށީގެންވާ އަޅާލުން ދިނުމަކީ މުހިންމު ކަމެކެވެ
ދާއިމީ ރީތިކަމަކަށް އާދަކުރަންޖެހޭ މުހިންމު އުސޫލުތައް
އުމުރުގެ ކޮންމެ ހިސާބެއްގައި ހުރި ނަމަވެސް، ދުޅަހެޔޮ ހަންގަނޑެއް ހޯދުމަށްޓަކައި ހުރިހާ ޑާމަޓޮލޮޖިސްޓުންވެސް އެއްބަސްވާ ބައެއް އަސާސީ އުސޫލުތަކެއްވެއެވެ. އޭގެ ތެރޭގައި ކޮންމެ ދުވަހަކު ބްރޯޑް-ސްޕެކްޓްރަމް ސަންސްކްރީން ބޭނުންކުރުމާއި، ހަންގަނޑު ސާފުކުރުމުގައި މަޑުމައިތިރިވުމާއި، ހަމުގެ ބާވަތަށް ބަލައި މޮއިސްޗަރައިޒް ކުރުން ހިމެނެއެވެ. އަދި ހަށިގަނޑު އެތެރެއިން ދުޅަހެޔޮކޮށް ބެހެއްޓުމަށްޓަކައި އެކަށީގެންވާ ވަރަށް ފެން ބުއިމާއި، މޭވާއާއި ތަރުކާރީ ގިނައިން ކެއުމަކީ ކޮންމެހެން ކުރަންޖެހޭ ކަމެކެވެ.
ސޯޝަލް މީޑިއާގައި ފެންނަ ކޮންމެ ޓްރެންޑަކަށް ތަބާނުވުމަށްވެސް މާހިރުން އިންޒާރު ދެއްވައެވެ. މާ ގިނަ އުފެއްދުންތައް އެއްފަހަރާ ބޭނުންކުރުމަކީ ހަންގަނޑުގެ ގުދުރަތީ ދިފާއީ ނިޒާމު ހަލާކުވެ، ރަތްވުމާއި އެލާޖިކްވުން ފަދަ މައްސަލަތައް ކުރިމަތިވާ ކަމެކެވެ. ހަގީގީ ރީތިކަމަކީ ހަމައެކަނި ބޭރުފުށުން ފެންނަ ފެނުމެއް ނޫނެވެ. އެއީ މުޅި މީހާގެ ދުޅަހެޔޮކަމުގެ ރަމްޒެކެވެ. ކަސްރަތު ކުރުމާއި، ސްޓްރެސް މެނޭޖްކުރުމާއި، އެކަށީގެންވާ ނިދި ހޯދުމަކީ ހަންގަނޑަށް ގުދުރަތީ އުޖާލާކަމެއް ގެނެސްދޭނެ ކަންކަމެވެ.
ހަނދާން ބަހައްޓަންޖެހޭ ކަމަކީ، ދުޅަހެޔޮ ހަންގަނޑެއް ލިބެނީ އެއް ރެއަކުން ނޫން ކަމެވެ. އެއީ ދާއިމީ ގޮތެއްގައި ކުރާ މަސައްކަތުގެ ނަތީޖާއެވެ.
އުމުރުން ދުވަސްވުމަކީ ހަނގުރާމަ ކުރަންޖެހޭ ކަމެއް ނޫނެވެ. އޭގެ ބަދަލުގައި، ހަންގަނޑަށް އަންނަ ބަދަލުތަކާއެކު އެންމެ ދުޅަހެޔޮކޮށް ހަންގަނޑު ބެލެހެއްޓުމަކީ އަމާޒަކަށް ހަދަންޖެހެއެވެ.
އެންމެ ފައިދާހުރި ފަރުވާއަކީ އެންމެ އަގުބޮޑު ފަރުވާއެއް ނޫނެވެ. އެއީ ކޮންމެ ދުވަހަކު މެދުކެނޑުމެއް ނެތި އާދަކުރާ ސާދާ އަދި ރަނގަޅު އުސޫލުތަކެވެ.