މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ރިޔާސީ ވަޢުދުފުޅުގެ ދަށުން، އެ ރަށުގައި ބައިނަލްއަޤްވާމީ އަދި ދާޚިލީ ބަނދަރުގެ ކީ-ވޯލް ތަރައްޤީކުރުމުގެ މަސައްކަތް ޗައިނާ ހާބަރ އިންޖިނިއަރިންގ ކޮމްޕެނީ (ސީ.އެޗް.އީ.ސީ) އާ މިއަދު ހަވާލުކޮށްފިއެވެ.
މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ގެ މައި އޮފީހުގައި ބޭއްވި ރަސްމިއްޔާތެއްގައި މި އެއްބަސްވުމުގައި އެމް.ޕީ.އެލްގެ ފަރާތުން ސޮއިކުރެއްވީ ސީ.އީ.އޯ ކެޕްޓަން ހުސައިން ޝަފީޤެވެ. ސީ.އެޗް.އީ.ސީގެ ފަރާތުން ސޮއިކުރެއްވީ އެ ކުންފުނީގެ ކަންޓްރީ މެނޭޖަރު މާއޯ ބާއޯ އެވެ. މި މަޝްރޫޢުގެ ދަށުން ބައިނަލްއަޤްވާމީ ބޯޓުފަހަރަށް ޚާއްސަ 375 މީޓަރުގެ ދިގު ކީ-ވޯލްއަކާއި، އެތެރޭގެ އުޅަނދުފަހަރަށް ޚާއްސަ 820 މީޓަރުގެ ޑޮމެސްޓިކް ކީ-ވޯލްއެއް ބިނާކުރާނެއެވެ.
މި މަޝްރޫޢަކީ މާލޭ ބަނދަރަށް ދިމާވެފައިވާ ޖާގައިގެ ދަތިކަމާއި ތޮއްޖެހުމަށް ދާއިމީ ހައްލެއް ހޯދުމަށް ފަރުމާކޮށްފައިވާ މަޝްރޫޢެކެވެ. ތިލަފުށީގައި އަލަށް ތަރައްޤީކުރާ ބަނދަރަކީ މިހާރުގެ މާލޭ ބަނދަރަށްވުރެ 10 ގުނަ ބޮޑު ސަރަހައްދެކެވެ. މީގެ އިތުރުން، މިހާރު މާލޭ ބަނދަރުގައި ބޮޑެތި ބޯޓުފަހަރު ބޭރުގައި ބާއްވައިގެން ކުރިއަށްގެންދާ އޮޕަރޭޝަންތައް ނިމުމަކަށް އައިސް، 14.6 މީޓަރު ފުން މި ބަނދަރުގެ ސަބަބުން ބޮޑެތި އުޅަނދުފަހަރު ސީދާ ފާލަމަށް ކައިރިކުރެވޭނެއެވެ.
އައު ބަނދަރުގެ ޚިދުމަތްތަކާއެކު މުދާ ބޭލުމުގެ ދުވެލި ވަރަށް ބޮޑަށް އަވަސްވެގެންދާނެއެވެ. މިހާރު ކާގޯ ބޯޓަކުން މުދާ ބޭލުމަށް ހޭދަވާ 7 ދުވަސް، އައު ބަނދަރާއެކު 2 ދުވަހަށް ކުޑަވާނެ ކަމަށް ލަފާކުރެވެއެވެ. މީގެ އިތުރުން، ގެންޓްރީ ކެރޭނާއި ޒަމާނީ ވަސީލަތްތައް ބޭނުންކުރަން ފެށުމުން ޚިދުމަތުގެ ފެންވަރު މަތިވެ، ޝިޕިންގ ލައިންތަކަށް ބޮޑެތި ލުއިތަކެއް ލިބިގެންދާނެއެވެ.
މި މަޝްރޫޢުގެ ދަށުން އެމް.ޓީ.ސީ.ސީ އާ ވެސް ބައެއް މަސައްކަތްތައް ހަވާލުކޮށްފައިވާއިރު، މުޅި މަޝްރޫޢު ނިމޭއިރު ތިލަފުށީގައި 1,000 މީޓަރަށްވުރެ ދިގު ބައިނަލްއަޤްވާމީ ކީ-ވޯލްއަކާއި 2,000 މީޓަރުގެ ޑޮމެސްޓިކް ޓާމިނަލެއް އޮންނާނެއެވެ. ސަރުކާރުގެ އަމާޒަކީ 11 ނޮވެމްބަރު 2027 ގެ ނިޔަލަށް މުޅި ބަނދަރު ތިލަފުއްޓަށް ބަދަލުކޮށް ނިންމުމެވެ.
މި ބަދަލާއެކު ރާއްޖެއަށް އެތެރެކުރާ މުދަލުގެ ފްރައިޓް ޚަރަދު ކުޑަވެ، އާންމު ރައްޔިތުންނަށް މުދާ ލިބޭ އަގު ހެޔޮވެގެންދާނެ ކަމަށް ބެލެވެއެވެ. މިއީ ރާއްޖޭގެ ލޮޖިސްޓިކްސް ދާއިރާއަށް އަންނާނެ އިންގިލާބީ ބަދަލެއްގެ ގޮތުގައި އެމް.ޕީ.އެލް އިން ފާހަގަކުރެއެވެ.