ސަރުކާރުގެ އަމާޒަކީ ކުރިއަރާފައިވާ ޤައުމެއްގެ ގޮތުގައި ރާއްޖެ ބައްޓަން ކުރުމަށް ބޭނުންވާ ޢިލްމާއި ހުނަރު ހުރިހާ ރައްޔިތުންނަށް ލިބޭނެ މަގުތައް ތަނަވަސްކޮށްދިނުން ކަމަށް ތަޢުލީމާއި މަތީތަޢުލީމާ ހުނަރުތައް ތަރައްޤީކުރުމާ ބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ. ވަޒީރު މިހެން ވިދާޅުވީ “ޑިޖިޓަލް ފޯ އޯލް” ކެމްޕޭން އިފްތިތާޙް ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވަނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ތަސައްވުރަކީ 2040 ވަނަ އަހަރު އަންނަން ވާއިރަށް ރާއްޖެއަކީ ކުރިއަރާފައިވާ ޤައުމެއްގެ ގޮތުގައި ތަރައްޤީކުރެއްވުންކަން ފާހަގަކުރައްވާފައެވެ. އަދި ޑިޖިޓަލް ރާއްޖެއެއްގެ ގޮތުގައި ތަރައްޤީކުރުމަށް “މޯލްޑިވްސް 2.0” އަކީ މުހިއްމު މަޝްރޫޢެއް ކަމަށާއި، އެކަމަށް ރައްޔިތުން އަހުލުވެރިވުމަކީ ކޮންމެހެން ބޭނުންތެރި ކަމެއް ކަމަށްވެސް ވިދާޅުވިއެވެ.
ތިން އަހަރަށް ބަހާލައިގެން ކުރިއަށްގެންދާ “ޑިޖިޓަލް ފޯ އޯލް” ކެމްޕޭންގެ ނަތީޖާއަކަށް ވާނީ ދިވެހިންނަކީ ޑިޖިޓަލް ކަންކަމުގައި އަހުލުވެރި ބަޔަކަށް ވުމެވެ. ވަޒީރު ވިދާޅުވި ގޮތުގައި މި ބަދަލާއެކު ދުނިޔޭގެ އެހެން ކުރިއަރާފައިވާ ޤައުމުތަކާ އެއް ހަމައެއްގައި އިލްމުވެރި އާބާދީއެއް ބިނާވެގެންދާނެއެވެ. “ރާއްޖެގެ ހުރިހާ ޔިނިވަރސިޓީތަކާއި ކޮލެޖްތައް އަދި ކައުންސިލްތަކާއެކު ރާއްޖޭގެ ކޮންމެ ރައްޔިތަކީ އެހީތެރިކަން ދީގެން ޑިޖިޓަލް ނިޒާމްތައް ބޭނުންކުރެވޭނެ ހަމައަށް ގެންދިޔުމަކީ އަމާޒެއް،” ވަޒީރު ވިދާޅުވިއެވެ.
މި މަޝްރޫޢުގެ ސަބަބުން ގޭގައި ތިބެގެން މަސައްކަތް ކުރުމުގެ ފުރުޞަތުތައް ފަހިވެ، ޖިސްމާނީ އަދި ނަފްސާނީ ނުކުޅެދުންތެރިކަމަށް ރިއާތް ކުރުމެއް ނެތި، ހުރިހާ އެންމެނަށް އެއްހަމައެއްގައި މުޖުތަމަޢުގައި ޚިދުމަތް ކުރުމުގެ ފުރުޞަތު ލިބިގެންދާނެ ކަމަށްވެސް ޑރ. އިސްމާޢީލް ޝަފީޢު ފާހަގަކުރެއްވިއެވެ. މީގެ އިތުރުން، ކުދިކުދި ތަމްރީނުތަކާއި ހުނަރުތައް އެއްކޮށްލައިގެން ރަސްމީ ސެޓްފިކެޓާ ހަމައަށް ދިއުމުގެ މަގު ފަހިކުރުމަށް މަސައްކަތް ކުރަމުންދާ ކަމަށްވެސް ވަޒީރު ވިދާޅުވިއެވެ.
މި މަސައްކަތަކީ އެމްކިއުއޭ، މައިންޑްކޯ، މޯލްޑިވްސް ނޭޝަނަލް ސްކިލް ޑިވެލޮޕްމަންޓް އޮތޯރިޓީ އަދި ނޭޝަނަލް އިންސްޓިޓިއުޓް އޮފް އެޑިއުކޭޝަން ގުޅިގެން ޤައުމީ ފެންވަރުގައި ކުރިއަށްގެންދާ މަސައްކަތެކެވެ. ސަރުކާރުގެ މައިގަނޑު ސިޔާސަތަކީ ރައްޔިތުންނަށް ލުއިފަސޭހަކަމާއެކު ކުރިއަށްދެވޭނެ މަގު ފަހިކޮށްދީ، އުފެއްދުންތެރި ޖީލެއް ބިނާކުރުމަށް ބޭނުންވާ އެހީތެރިކަން ފޯރުކޮށްދިނުން ކަމަށް ވިދާޅުވެ ވަޒީރު ވާހަކަފުޅު ނިންމަވާލެއްވިއެވެ.