ޒުވާނުން އަނބުރާ މުޖުތަމައަށް ގެނައުމަށްޓަކައި ޚާއްސަ “ނޭޝަނަލް ސާވިސް ޕްރޮގްރާމް”އެއް ފައްޓަވާނެކަން އިއުލާންކުރައްވައިފިއެވެ.
“ދަ ޕަލްސް” ޕޮޑްކާސްޓްގެ މި ހަފްތާގެ ޕްރޮގްރާމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ވަނީ ތައުލީމު ނުވަތަ ވަޒީފާގެ ފުރުސަތެއް ނެތި މުޖުތަމައުން އެކަހެރިވެފައިވާ ޒުވާނުން އަނބުރާ މުޖުތަމައަށް ގެނައުމަށްޓަކައި ޚާއްސަ “ނޭޝަނަލް ސާވިސް ޕްރޮގްރާމް” އެއް ފެށުމަށް ތައްޔާރުވަމުންދާކަން ހާމަކުރައްވާފައެވެ
ރައީސް ވަނީ، ޒުވާނުންގެ ނަފްސާނީ ދުޅަހެޔޮކަމާއި އިޖުތިމާޢީ މައްސަލަތަކާ ގުޅޭގޮތުން ވެސް ވާހަކަފުޅު ދައްކަވާފައެވެ. އެމަނިކުފާނު ވިދާޅުވީ، ސްކޫލްތަކާއި މަސައްކަތުގެ މާހައުލުގައި ކުރިމަތިވާ ގަނާކުރުން ނުވަތަ ބުލީކުރުމުގެ މައްސަލަތައް ހައްލުކުރުމަށް ސަރުކާރުން ހާއްސަ ސިޔާސަތުތަކެއް އެކުލަވާލަމުންދާ ކަމަށެވެ. އަދި ނަފްސާނީ ބަލިތަކަށް ފަރުވާ ހޯދުމަށް ފަސޭހަކޮށްދިނުމުގެ ގޮތުން އާސަންދައިގެ ތެރެއިން އެކަންކަމަށް މަގުފަހިކޮށްދެއްވާނެ ކަމަށް ވިދާޅުވިއެވެ.
ކޭޝިއަރުންނާއި ފޮޓޯގްރާފަރުން ފަދަ ވަޒީފާތަކުގައި ބިދޭސީންގެ ބަދަލުގައި ދިވެހިންނަށް އިސްކަންދިނުމަށް ގާނޫނީ އޮނިގަނޑުގެ ތެރެއިން މަސައްކަތްތަކެއް ކުރެވެމުންދާކަމަށްވެސް އެމަނިކުފާނު ވިދާޅުވެފައިވެއެވެ.
އެމަނިކުފާނު ވިދާޅުވީ، ރާއްޖޭގައި ބިދޭސީން އަދާކުރަމުންދާ ބައެއް ވަޒީފާތަކަށް ދިވެހި ޒުވާނުން ނެރުމަކީ ސަރުކާރުގެ ވަރަށް ބޮޑު އަމާޒެއް ކަމަށެވެ
ރައީސްގެ ވާހަކަފުޅުގައި އެންމެ ބޮޑަށް އަލިއަޅުއްވާލެއްވީ ރާއްޖޭގައި ކްރިއޭޓާ އިކޮނޮމީއެއް ބިނާކުރެއްވުމަށެވެ. އޭގެ ތެރޭގައި ޓެކްނޮލޮޖީއާއި އުފެއްދުންތެރި ދާއިރާތަކުން ޒުވާނުންނަށް ކުރިއަށްދެވޭނެ މަގުފަހިކޮށްދިނުމަށް ސަރުކާރުން ހާއްސަ ޖާގަތަކާއި ވަސީލަތްތައް ގާއިމުކޮށްދެއްވާނެ ކަމަށް އެމަނިކުފާނު ވިދާޅުވިއެވެ.
މިއީ ގައުމީ އުފެއްދުންތެރިކަން ނުވަތަ ޖީޑީޕީއަށް ޒުވާނުންގެ ފަރާތުން ލިބޭ މަންފާ އިތުރުކުރުމަށް ކުރިއަށް ގެންދަވާ ކަމެއް ކަމަށްވެސް އެމަނިކުފާނު ވިދާޅުވިއެވެ. މީގެ އިތުރުން، ތަޢުލީމާއި ވަޒީފާގެ ފުރުސަތުތައް ފޯރުކޮށްދިނުމުގައި މެރިޓަށް އިސްކަންދެއްވާނެ ކަމުގެ ޔަޤީންކަންވެސް ރައީސް ދެއްވިއެވެ.