މިމަހުގެ 1 ވަނަ ދުވަހު ގދ ފިޔޯރީގައި ފެށިގެންދިޔަ އަތޮޅުގެ އެންމެ ބޮޑު ވޮލީބޯޅަ މުބާރާތް "ގދ އަތޮޅު ކައުންސިލް ފޭސް ވޮލީބޯޅަ މުބާރާތް 2021" ފިރިހެން ޑިވިޝަންގެ 5 ވަނަ މެޗުން، ފިޔޯރީއިން މޮޅު ކުޅުމެއް ދައްކައި ގައްދޫ ބަލިކޮށްފިއެވެ.
ފިޔޯރީ ޒުވާނުންގެ މަރުކަޒުގެ ވޮލީ ކޯޓުގައި މިރޭ ކުޅުނު މެޗުން ގައްދޫ ބަލިކޮށް ފިޔޯރީއިން މެޗު ކާމިޔާބު ކޮށްފައިވަނީ 3-0 ސެޓުންނެވެ.
ފުރަތަމަ ސެޓުގައި ދެޓީމުންވެސް ވަނީ މޮޅު ކުޅުމެއް ދައްކާފައެވެ. ނަމަވެސް އެސެޓު ފިޔޯރީ ޓީމުންވަނީ ކާމިޔާބުކޮށްފައެވެ. އެސެޓު ފިޔޯރީއިން ކާމިޔާބު ކުރީ 25-18 އިންނެވެ.
ދެވަނަ ސެޓު ފެށިގެން ގައްދޫ ޓީމުން ވަނީ ކުޅުން ވަރުގަދަކޮށް އެއްވަރެއްގައި ހިފެހެއްޓޭތޯ މަސައްކަތް ކޮށްފައެވެ. ނަމަވެސް ފިޔޯރީ ޓީމުން ދެއްކި މޮޅު ކުޅުމާއެކު އެސެޓުވެސް ވަނީ ކާމިޔާބު ކޮށްފައެވެ. އެގޮތުން ފިޔޯރީއަށް އެސެޓު ކާމިޔާބު ކުރެވުނީ 11-11 އިންނެވެ.
ފުރަތަމަ ދެސެޓުން ލިބުނު ތަޖުރިބާގެ އަލީގައި ތިންވަނަ ސެޓުގެ ކުޅުން ފެށިގެން ގައްދޫ ޓީމުން ވަނީ ކުޅުން ވަރުގަދަކޮށްފައެވެ. އަދި ވާދަވެރި ކުޅުމަކަށްފަހު ފަހު ސެޓުވެސް ކާމިޔާބުކޮށް ފިޔޯރީ ވަނީ މެޗު ކާމިޔާބުކޮށްފައެވެ. އެގޮތުން ފަހު ސެޓު ފިޔޯރީއަށް ކާމިޔާބު ކުރެވުނީ 25-23 އިންނެވެ.
ގައްދޫ އަދި ފިޔޯރީ ބައްދަލުކުރި މެޗުގެ ތެރެއިން — ހުވަދޫ ފޮޓޯ: ހިލްޓަން އާސިފް
މިމެޗުގެ މޮޅު ކުޅުންތެރިއަކަށް ހޮވިފައިވަނީ، ފިޔޯރީ ޓީމުގެ ޖަރޒީ ނަންބަރު 9 އިސްމައިލް ސާޖިދު އެވެ.
މިމެޗަކީ ފިޔޯރީ ފިރިހެން ޓީމުން މިމުބާރާތުގައި ކުޅުނު ދެވަނަ މެޗެވެ. ފުރަތަމަ މެޗު ރަތަފަންދޫ އާދެކޮޅަށް ކުޅެ 3-0 ސެޓުން ފިޔޯރީ ޓީމުން ވަނީ ކާމިޔާބުކޮށްފައެވެ.
މިމުބާރާތުގައި މާދަމާ ކުޅުމަށް ހަމަޖެހިފައިވަނީ، އަންހެން ޑިވިޝަންގެ ފިޔޯރީ އަދި ގައްދޫ ބައްދަލުކުރާ މެޗާއި، ފިރިހެން ޑިވިޝަންގެ ރަތަފަންދޫ އަދި ފަރެސްމާތޮޑާ ބައްދަލު ކުރާ މެޗުގެ އިތުރުން އަންހެން ޑިވިޝަންގެ ފަރެސްމާތޮޑާ އަދި ރަތަފަންދޫ ބައްދަލު ކުރާމެޗެވެ.
"ގދ.އަތޮޅު ކައުންސިލް ފޭސް ވޮލީބޯޅަ ޓޯނަމެންޓް 2021" ގެ އެސޯސިއޭޓް ޕާރޓްނަރަކީ ފިޔޯރީ ކައުންސިލް އިދާރާ އާއި، ފިޔޯރީ ޔޫތް ސެންޓަރެވެ. އަދި ޕްލެޓިނަމް ޕާޓްނަރެއްގެ ގޮތުގައި އެސްޓިއޯ ހަމަޖެހިފައިވާ އިރު މި މުބާރާތުގެ މީޑިއާ ޕާރޓަނަކީ ހުވަދޫ މީޑިއާއެވެ. މުބާރާތުގެ ފޮޓޯ ތައް ނެގުމަށް ނަލަފޮޓޯ ވަނީ ފޮޓޯގްރަފީ ޕާޓްނަރެއްގެ ގޮތުގައި ހަމަޖައްސާފައެވެ. އަދި ޕްރިންޓިންގ ޕާޓްނަރެއްގެ ގޮތުގައި ނޯވާޓެކް ވަނީ ހަމަ ޖައްސާފައެވެ. މި މުބާރާތުގެ އޮފިޝަލް ކިޓް ޕާޓްނަރެއްގެ ގޮތުގައި ހަމަޖައްސާފައިވަނީ ވައިޓްރެބިޓެވެ.