ކޮވިޑް-19 ގެ ހަތަރުވަނަ ރާޅުގައި ހުވަދު އަތޮޅު ރައްޔިތުންނަށް ޚިދުމަތް ލިބިގަންނަން ހުރި ރީޖަނަލް ހޮސްޕިޓަލް (ޑރ އަބްދުއްސަމަދު މެމޯރިއަލް ހޮސްޕިޓަލް) ގައި ޚިދުމަތް ދެވޭނެ ކެޕޭސިޓީއެއް ނެތްކަމަށް ޑޮކްޓަރުން ވިދާޅުވާއިރު ސަރުކާރުން ރައްޔިތުންނާމެދު މިހާ ފަރުވާކުޑަކުރަނީ ކީއްވެތޯ ބުނެ ގދ އަތޮޅު ކައުންސިލް ރައީސް ޙަސަން ފައިހަތު ޤުދުރަތުﷲ ސަރުކާރަށް ފާޑުވިދާޅުވެއްޖެއެވެ.
ފައިހަތު މިހެން ވިދާޅުވެފައިވަނީ، ތިނަދޫގެ އިތުރުން ހުވަދު އަތޮޅުގައި ހަލުވިކަމާއެކު ކޮވިޑް ފެތުރެމުންދާއިރު، ހުވަދު އަތޮޅުގެ އެންމެ ގިނަ ރައްޔިތުން ޚިދުމަތް ހޯދަމުންދާ ރީޖަނަލް ހޮސްޕިޓަލް ގައި ކޮވިޑްގެ ހަތަރުވަނަ ރާޅު އަރާ ހަމަވިއިރު އެހޮސްޕިޓަލުގައި އެންމެ މުހިންމު ޑޮކްޓަރުން ނެތް ކަމަށާއި ފަރުވާ ދެވޭނެ ކެޕޭސިޓީ ނެތްކަމަށް ވިދާޅުވުމާއި ގުޅިގެންނެވެ.
ފައިހަތު ވިދާޅުވީ، މިއަދު ރައީސުލްޖުމްހޫރިއްޔާ އަށް ދަރުމަވަންތަ ހޮސްޕިޓަލުން އެންމެ މަތީ ފެންވަރުގައި ކޮވިޑަށް ފަރުވާދެވިދާނެ ކަމަށާއި، އެހެން ނަމަވެސް ހުވަދު އަތޮޅުގެ ރައްޔިތުންނަށް ހިދުމަތް ލިބިގަންނަން ހުރި ހޮސްޕިޓަލުން ފަރުވާދެވޭނެ ކެޕޭސިޓިއެއް ނެތް ކަމަށެވެ.
ހުވަދު އަތޮޅުގެ ރައްޔިތުން ޚިދުމަތް ލިބިގަންނަން ހުރި ރީޖަނަލް ހޮސްޕިޓަލުން ކޮވިޑުގެ ހަތަރުވަނަ ރާޅުގައި ރައްޔިތުންނަށް ޚިދުމަތް ދެވޭނެ ކެޕޭސިޓީއެއް ނެތްކަމަށް ޑޮކްޓަރުން ވިދާޅުވަމުންދާއިރު ސަރުކާރުން ރައްޔިތުންނާއި މެދު މިހާ ފަރުވާކުޑަކުރަނީ ކީއްވެގެންތޯ ކޮންކަމެއް ކިހާ ގޯސްވަންދެންތޯ ތިޔަ މަޑުކުރައްވަނީ؟ ފައިހަތު ވިދާޅުވިއެވެ.
ފައިހަތު މިހެން ވިދާޅުވެފައިވާއިރު، ތިނަދޫގައި ހުންނަ ޑރ އަބްދުއްސަމަދު މެމޯރިއަލް ހޮސްޕިޓަލުގައި ޑޮކްޓަރުންގެ މަދުވުމުން ގިނަ ބަޔަކު ފަރުވާހޯދުމަށް މާލެ ދާންޖެހޭ ވާހަކަ އަބަދުވެސް ދެކެެވެއެވެ. އެގޮތުން މިވަގުތުވެސް އެހޮސްޕިޓަލުގައި ތިއްބެވީ މަދު ޑޮކްޓަރުންނެއް ކަމަށާއި އެހޮސްޕިޓަލުގައި މިވަގުތު ފިޒީޝަނެއް އަދި އެނެސްތީޓިސްޓަކުވެސް ނެތެވެ.