މި އަހަރުގެ އަޟްހާ އީދު ނަމާދު ތިނަދޫގައި ކުރާނެ ކަމަށް ގދ. ތިނަދޫ ކައުންސިލުން ބުނެފިއެވެ.
އިސްލާމިކް މިނިސްޓްރީން އީދު ނަމާދު ކުރުމުގެ ހުއްދަ ދީފައިވަނީ މޮނިޓަރިންގެ ހާލަތުގައި ނެތް ރަށްރަށަށް ކަމުގައި ވިޔަސް ތިނަދޫގައި ކޮވިޑް ހާލަތު ރަގަޅުވެ، ޖަމާއަތުގައި ނަމާދު ކުރުމުގެ ހުއްދަ ދެވިފައިވުމާއެކު އީދު ނަމާދު ކުރުމުގެ ހުއްދަ ކައުންސިލުން ވަނީ ދީފައެވެ.
އީދު ނަމާދު ޖަމާއަތުގައި ކުރުމުގެ ހުއްދަދިން ކަމުގައިވިޔަސް މިފަހަރު އީދު ނަމާދު ބޮޑު ޖަމާއަތުގައި ކުރުމަށް ތަންނުދިނުމުގެ ސަބަބުން މި ފަހަރު އަޟްޙާ އީދު ނަމާދު ތިނަދޫގެ 5 މިސްކިތްތެއްގައި ކުރާނެ ކަމަށް ތިނަދޫ ކައުންސިލްގެ އިއުލާނުގައިވެއެވެ. މި އަހަރުގެ ފިތުރު އީދު ނަމާދުވެސް ކޮށްފައިވަނީ ރައްކާތެރި ކަމުގެ ފިޔަވަޅުތަކާއެކު މިސްކިތްތަކުގައެވެ.
އެގޮތުން މާދަމާ ތިނަދޫގައި އީދު ނަމާދު ކުރަން ހަމަޖެހިފައިވާ 5 މިސްކިތަކީ މަސްޖިދުލް އިޙްލާސް. މަސްޖިދުއް ޝައިހް ސިދުގީ ( އިސްލާމީ މަރުކަޒް)، މަސްޖިދު މަރިޔަމް އަދި މަސްޖިދުއް ރިޟްވާންގެ އިތުރަށް މަސްޖިދުއް ސަލާމްގައެވެ.
އަޟްޙާ ޢީދު ނަމާދު ކުރުމަށް، މިސްކިތަށްދާއިރު ގެއިން ވުޟޫ ކޮށްގެން މާސްކް އަޅުއްވައިގެން އަދި އަމިއްލަ މުސައްލަ އެއް ހިފައިގެން ދުރުވުމަށް ވަނީ އިލްތިމާސްކޮށްފައެވެ. އަދި މިސްކިތުގެ ޖަމާއަތް ހަދާނީ އެޗްޕީއޭގެ ގައީޑްލައިނާއި އެއް ގޮތަށް ގައިދުރު ކަމާއެކުއެވެ.