ގޭގައި ދިމާވާ ކަރަންޓް މައްސަލަތައް ހައްލުކުރަން ދަސްކޮށްދިނުމުގެ ޚާއްޞަ ޕްރޮގްރާމެއް މަޑަވެލީ ޑަބްލިޔު ޑީ ސީ އިން މިއަދު ކުރިޔަށް ގެންގޮސްފި އެވެ.
ހުވަދޫ ނިއުސް އަށް މައުލޫމާތު ދެއްވަމުން މަޑަވެލީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ރައީސާ ނަދީމާ ތައްޚާން ވިދާޅުވީ މިއަދުގެ މެންދުރުފަހު ކައުންސިލް އިދާރާގައި ދޮޅުގަޑިއިރަށް ކުރިއަށް ގެންދިޔަ މި ޕްރޮގްރާމަކީ އަންހެނުންގެ ދުވަހުގެ ހަރަކާތްތަކުގެ ތެރޭގައި އަންހެނުންނަށް ޚާއްސަ ކޮށްގެން، ފެނަކަ މަޑަވެލީ ބްރާންޗާއި ގުޅިގެން ކުރިއަށް ގެންދިޔަ ތަމްރީން ޕްރޮގްރާމެއް ކަމަށެވެ.
ޖުމްލަ 8 ފަރާތަކުން ބައިވެރި މި ޕްރޮގްރާމް ގައި ގޭގައި ދިމާވާ ކަރަންޓް މައްސަލަތައް ހައްލުކުރަން ދަސްކޮށްދިނުމުގެ އިތުރުން ކަރަންޓް ވައިރު ކުރުމާއި ގޭގައި ބޭނުން ކުރާ ކަރަންޓް ޚަރަދު ކުޑަ ކުރާނެ ގޮތްތަކާއި ނުރައްކާތެރި ހާދިސާ އެއް ހިގައިފިއްޔާ އެކަމުން ރައްކާތެރިވުމަށް ކުރަންޖެހޭ ކަންކަމާއި ރައްކާތެރި ކަމަށް އެޅިދާނެ މުހިއްމު ފިޔަވަޅުތައް ކިޔައިދެވުނެވެ.
ޕްރޮގްރާމް ގައި ބައިވެރިވި ފަރާތްތަކަށް ސެޓްފިކެޓް ދެވުނު މި ތަމްރީނަކީ މުހިންމު ފައިދާ ހުރި ޕްރޮގްރާމެއް ކަމުގައި މަޑަވެލި އަންހެނުންގެ ތަރައްޤީއަށް މަސައްކަތް ކުރާ ކޮމެޓީއިން ވިދާޅުވިއެވެ.
އަންހެނުންގެ ދުވަސް ފާހަގަކުރުމުގެ ގޮތުން ހުވަދު އަތޮޅުގެ ހުރިހާ ރަށެއްގައި ވެސް ވަނީ ތަފާތު ގިނަ ހަރަކާތްތައް ހިނގާފައެއެވެ. އެގޮތުން މަޑަވެލީގައި ވަނީ ދެޖިންސުގެ މީހުން ބައިވެރިވި ހިނގާލުމަކާއި އަންހެނުންނަށް ޚާއްސަކޮށް ހެނދުނުގެ ނާސްތާއެއް ކުރިއަށް ގެންގޮސްފައެވެ.
މީގެ އިތުރުން މުޅި އަތޮޅަށް ހުޅުވާލައިގެން ތިނަދޫ ގައި ހުންނަ ބިޒްނަސް ސެންޓަރުން އަންހެނުންގެ ދުވަހާއި ގުޅުވައިގެން އޮންލައިން ކޮށް ކުރިއަށް ގެންދިޔަ މައުލޫމާތު ސެޝަންގައި ވަނީ ބައިވެރިވެފައެވެ.
މިއަހަރުގެ އަންހެނުންގެ ދުވަހުގެ ޝިޔާރަކީ "ޖެންޑަރ އިކުއަލިޓީ ޓުޑޭ ފޯ އަ ސަސްޓެއިނަބަލް ޓުމޯރޯ" އެވެ.