ގައިންގަޔަށް ނާރާ ބަލިތަކުން ރައްކާތެރިވުމަށް ހޭލުންތެރިކުރުމުގެ ޕްރޮގްރާމްތައް ހިންގައި، އެކަމަށް ބޮޑު ހޭދައެއް ކުރިނަމަވެސް ބަދަލެއް އަންނާނީ ރައްޔިތުންގެ ވިސްނުމާ ހިސާބުން ބަދަލު ގެނެވިގެން ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ އޭޑީކޭގެ އަހަރީ ހަފްލާ ޝަރަފްވެރިކޮށްދެއްވާ ވާހަކަފުޅު ދައްކަވަމުންނެވެ.
އޭޑީކޭ ހޮސްޕިޓަލްގެ 35 ވަނަ އަހަރީ ދުވަހުގެ މުނާސަބަތުގައި ބޭއްވި ޙަފްލާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ފައިސަލް ނަސީމް މިފަދައިން ވިދާޅުވުމުގެ އިތުރުން، ރާއްޖޭގައި ގައިން ގަޔަށް ނާރާ ބަލިތައް ގިނަ ކަމުގައި، އެމަނިކުފާނު ފާހަގަކުރެއްވިއެވެ. އެމަނިކުފާނު ވިދާޅުވީ މިފަދަ ބަލިތަކާއި ގުޅިގެން އުޅެންވީ ގޮތާމެދު ހޭލުންތެރިކުރުވުމުގެ ޕްރޮގްރާމް ހިންގައި އެކަމަށް ކިތަންމެ ބޮޑު ހޭދައެއް ކުރިނަމަވެސް ބަދަލެއް އަންނާނީ ރައްޔިތުންގެ ވިސްނުން މިކަމުގައި ބަދަލުކުރެވިގެންކަމަށެވެ. އެހެންކަމުން ބަލީގެ ކުރިއަށް ވިސްނާ ރައްކާތެރިކަމުގެ ފިޔަވަޅު އަޅަން އަވަސްވެގަންނަން ޖެހޭކަމަށް ނައިބު ރައީސް ވިދާޅުވިއެވެ.
އޭޑީކޭއިން ރާއްޖޭގެ ސިއްޙީ ދާއިރާއަށް ކޮށްދެއްވަމުންގެންދަވާ ޚިދުމަތްވެސް ނައިބު ރައީސް ފައިސަލް ނަސީމްވަނީ މި ޚާއްސަ ހަފުލާގައި، ފާހަގަކުރައްވާފައެވެ. އެގޮތުން މީހުން ބިނާކުރުމަށް އޭޑީކޭގެ ތަސައްވުރަކީ އެހެން ދާއިރާތަކުންވެސް ނަމޫނާ ބަލައިގަންނަންޖެހޭކަމެއްގެ ގޮތުގައި ނައިބު ރައީސްވަނީ ވިދާޅުވެފައެވެ. ދިވެހިން މަސައްކަތައް ނެރުމަށާއި ރާއްޖެއަށް ބޭނުންވާ އެކި ޚިދުމަތްތައް ގެނައުމަށް ކުރަމުންދާ މަސައްކަތް އެމަނިކުފާނުވަނީ ފާހަގަކުރައްވާފައެވެ.
މިރަސްމިއްޔާތުގައި ވާހަކަދައްކަވަމުން އޭޑީކޭގެ ސީއީއޯ އަޙްމަދު ނާޝިދު ވިދާޅުވީ ރާއްޖޭގެ ސިއްޙީ ނިޒާމަށް ބޮޑެތި ބަދަލުގެނައުމަށް އޭޑީކޭގެ ޓީމުން ތައްޔާރުވަމުންދާކަމަށެވެ. އެގޮތުން ކުރިއަށް އޮތް 9 ވަރަކަށް މަސްދުވަހުގެ ތެރޭގައި 10 މިލިއަން ޑޮލަރުގެ އެކި މަޝްރޫޢުތައް ހިންގުމަށް ނިންމާފައިވާކަމަށް ނާޝިދު ވިދާޅުވިއެވެ. އޭގެތެރޭގައި އެމްއާރްއައިގެ ޚިދުމަތާއި ޕެޓް ސްކޭނާއި ހައިޕަރބެރިކް ޗެމްބަރއާއި ފިޒިއޮތެރަޕީއާއި ފަރޓިލިޓީ ސެންޓަރާއި އެންޑޯސްކޮޕީ ސެންޓަރު ތަރައްޤީކޮށް އަޕްގްރޭޑްކުރުމުގެ މަސައްކަތް ނާޝިދުވަނީ ފާހަގަކުރައްވާފައެވެ.
އޭޑީކޭގެ 35 ވަނަ އަހަރީ ދުވަހުގެ ޖަލްސާގެ ތެރެއިން- ފޮޓޯ: ރައީސް އޮފީސް
އޭޑީކޭގެ 35 ވަނަ އަހަރީ ދުވަހުގެ މިހަފްލާގައި އެހޮސްޕިޓަލުގައި މަސައްކަތްކުރާ ޑޮކްޓަރުންނާއި ނަރުހުންނާއި އަދިވެސް ޚިދުމަތްތެރިންގެ ތެރެއިން ފާހަގަކޮށްލެވޭ ފަރާތްތަކަށްވަނީ އެވޯޑްދީފައެވެ. މީގެ ތެރެއިން އެންމެ ފާހަގަކޮށްލެވުނު އެވޯޑް ކަމަށްވާ އެމްޕްލޮއީ އޮފް ދަ އިޔަރ އެވޯޑް ޙާސިލުކޮށްފައިވަނީ އެތެރެ ހަށީގެ ޚާއްސަ ޑޮކްޓަރ، ޑރ.ނަޝީދާ ސައީދެވެ.