ސަރަޙައްދީ ޤައުމުތަކުގެ މެދުގައި ގުޅުންބަދަހިކުރުމަށް އިސްރާއީލުގައި ޚާރިޖީ ވަޒީރުންގެ ފެންވަރުގެ ބައްދަލުވުމެއް ބާއްވައިފިއެވެ. އިސްރާއީލުގެ ދެކުނުގައި އޮންނަ ނަގަބުގައި ބޭއްވި ބައްދަލުވުމުގައި އެމެރިކާއާއި އިސްރާއީލާއި މިޞްރާއި ޔޫއޭއީއާއި މަޣްރިބާއި ބަޙްރައިނުގެ ޚާރިޖީ ވަޒީރުން ބައިވެރިވެވަޑައިގެން ސަރަޙައްދީ ސަލާމަތާއި ހަމަޖެހުމާއި އީރާނުގެ ނިޔުކްލިޔަރ މަޝްރޫޢުއާއި ރަޝިޔާއާ ދެކޮޅަށް އިޤްތިޞާދީ ދަތިކުރުމުގެ ފިޔަވަޅުތައް އެޅުމާ ގުޅޭގޮތުން މަޝްވަރާކުރައްވައިފައެވެ.
އެ ބައްދަލުވުމުގައި ވާހަކަދައްކަވަމުން އެމެރިކާގެ ޚާރިޖީ ވަޒީރު އެންތޮނީ ބުލިންކެންވަނީ ހަކަތައާއި ތިމާވެއްޓާއި ސަލާމަތާ ގުޅޭގޮތުން އިތުރު ޤައުމުތަކާ ގުޅުންބަދަހިކުރުން މުޙިއްމުކަން ފާހަގަކުރައްވައިފައެވެ. އޭނާ ވިދާޅުވި ފޮތުގައި މީގެ އަހަރުތަކެއް ކުރިން އެމެރިކާއާއި އިސްރާއީލާ އެއް މޭޒަކަށް ޢަރަބި ޤައުމުތައް ގެނައުމަކީ ކުރެވޭނެކަމެއް ނޫންކަމަށާއި ސަރަޙައްދީ ގުޅުންތައް ވަރަށް ބޮޑަށް ބަދަލުވެފައިވާކަމަށެވެ.
މިޞްރާއި ޔޫއޭއީއާއި މަޣްރިބާއި ބަޙްރައިނުން އިސްރާއީލާ ގުޅުންބަދަހިކޮށްފައިވަނީ އެމެރިކާއިން މެދުވެރިއެއްގެ ދަޢުރުޢަދާކޮށްގެންނެވެ. އިސްރާއީލާ ގުޅުންބަދަހިކޮށްފައިވާ ޢަރަބި ޤައުމުތަކުގެ ތެރެއިން އެ ބައްދަލުވުމަށް ޙާޒިރުނުވަނީ ހަމައެކަނި އުރުދުންނެވެ. އެގޮތުން އެ ބައްދަލުވުމުގައި ބައިވެރިވުމަށް ދިން ދަޢުވަތު ބަލައިގަތުމަށް އުރުދުންނުންވަނީ ދެކޮޅުހަދައިފައެވެ.
އޭގެ ބަދަލުގައި އުރުދުންގެ ރަސްގެފާނު ޢަބްދުﷲ ވަޑައިގެންނެވީ ފަލަސްޠީނުގެ ރާމަﷲއަށެވެ. އަދި އޭނާވަނީ ފަލަސްޠީނުގެ ރައީސް މަޙްމޫދު ޢައްބާސާ ބައްދަލުކުރައްވައިފައެވެ.
ސަރަޙައްދީ ސަލާމަތާއި ހަމަޖެހުން ކަށަވަރުކުރުމަށް ބުނެ އިސްރާއީލުގައި ބޭއްވި ބައްދަލުވުމުގައި ބައިވެރިވުމަށް ފަލަސްޠީނަށް ދަޢުވަތުދީފައެއް ނުވެއެވެ. އަދި ފަލަސްޠިނާ ގުޅޭގޮތުން އެ ބައްދަލުވުމުގައި އެއްވެސް މަޝްވަރާއެއް ކޮށްފައެއްވެސް ނުވެއެވެ.