މޫދަށްގޮސް ފީނަން އުޅުނު އަންހެނެއްގެ ކަންފަތަށް ވަދެފައިވާ ކަކުންޏެއް ނަގާ މަންޒަރު ދައްކުވައިދޭ ވީޑޯއެއް ގިނަބައެއްގެ ސަމާލުކަން ވަނީ ހުއްޓިގެން ގޮސްފައެވެ.
ޤުދުރަތީ ދިރުންތަކަށް ލޯބިކުރާ ފަރާތްތަކުން ފީނުމަށް ޚާއްސަ ޝައުޤުވެރިކަމެއް ބަހައްޓައެވެ. ކަނޑުގެ އަޑީގައި ވާ ދިރުންތަކަކީ އެމަންޒަރު ބަލާ ފޫހި ނުވާނެ ހިތްގައިމު މަންޒަރެކެވެ. ފަރުތަކުގެ ޤުދުރަތީ ރިތިކަން އަމިއްލަ ލޮލުން ދެކި، މުނިފޫހި ފިލުވުމުގެ މަޤްސަދުގައި ފީނަން އުޅުނު އަންހެނަކަށް، އެކަން ބިރުވެރިކަމަކަށް ބަދަލު ވެގެން ދިޔައީ، ކުޑަކުޑަ ދިރޭ ކަކުންޏެއް އެ އަންހެން މީހާގެ ކަންފަތުގެ ތެރެއަށް ވަނުމުންނެވެ،
މިކުޑަ ކުޑަ ދިރޭ ކަކުނި އަންހެންމީހާގެ ކަންފަތުން ނެރޭ މަންޒަރު ދައްކުވައިދޭ ވީޑިއޯއެއް އިންޓަނެޓްގައި ވައިރަލްވެފައި ވާއިރު، މިވީޑިއޯ ވެގެން ގޮސްފައިވަނީ، ވީޑިއޯ އޮންލައިންކޮށް ބެލި ގިނަ މީހުންނަށް ބިރުވެރި ވީޑިއޯ އަކަށެވެ. ދިރިއުޅުމުގައި ކޮންމެވެސް ހިސާބަކުން ފީނުމަށް އުންމީދު ކޮށްގެން ތިބި ބައެއް މީހުންވެސް، މިވީޑިއޯގެ ސަބަބުން ދެން އިތުރަށް އެކަން ނުކުރަން ވަނީ ނިންމާފައެވެ.
ޓިކްޓޮކް އެކައުންޓެއްކަމުގައިވާ "ވެސްޑެއިސީ" އީން ޕޯސްޓްކޮށްފައިވާ މި ވީޑީއޯ އެތަކެއް މިލިޔަން މީހުން ބަލާފައި ވާއިރު، ވީޑިއޯއިން ފެންނަގޮތުގައި، އަންހެނެއްގެ ކަންފަތު ކައިރީގައި މީހަކު ޓްވިޒަރެއް ހިފައިގެން، ކަންފަތުން އެއްޗެއް ނެގުމަށް ހަރަކާތްތެރިވާ މަންޒަރު ފެނިގެން ދެއެވެ. ވީޑިއޯ އިން ފެންނަގޮތުން، އަންހެން މީހާގެ ކަންފަތުގައި ރިއްސާތީ އުދަނގޫވެގެން އުޅޭ މަންޒަރު ފެނެއެވެ. އަދި ފިރިހެން މީހާ، އަންހެން މީހާ، މައިތިރިކޮށް ހަމަޔަކަށް އެޅުވުމަށް މަސައްކަތްކޮށް، ކަންފަތުން އެ އެއްޗެއް ނަގަން އުޅުމުގައި އަނިޔާއެއް ވެދާނެކަން ވިސްނުވައިދޭން މަސައްކަތްކުރާ ތަން ފެނިގެން ދެއެވެ. އަދި ކަންފަތުގެ ތެރެއިން އެއްޗެއް ނަގަން މަސައްކަތް ކުރާތާ ސިކުންތުކޮޅަކަށްފަހުން، ކަންފަތުގެ ތެރެއިން، ދިރޭ ކުޑަ ކަކުންޏެއް ބިންމައްޗަށް ވެއްޓިގެންދާ މަންޒަރު ފެނިގެން ދެއެވެ.
ކަންފަތުން ކަކުނި ނަގަން މަސައްކަތް ކުރާ މަންޒަރާއި ކަކުނި ނުކުންނަ މަންޒަރު
މި އަންހެންމީހާ، ކަންފަތައް ތަދުވެގެން އުޅޭ މަންޒަރު ވީޑިއޯއިން ފެންނައިރު، މިފަދަ ދިރޭ ކަކުންޏެއް އިންސާނެއްގެ ކަންފަތައް ވަތް ގޮތަކީ ޤަބޫލުކުރަން ދަތި ވާހަކައެކެވެ. ޓިކްޓޮކްގައި މަޝްހޫރު ލަވައެއް ކަމުގައިވާ "އޯހް ނޯ، އޯހް ނީ، އޯހް ނޯ، ނޯ، ނޯ" މިލަވަ ވީޑޯއަށް އަޅާފައިވާއިރު، މިހާދިސާ ކުރިމަތިވި އަންހެން މީހާ ހާމަކޮށްފައިވާ ގޮތުގައި މިކަން ހިގާފައިވަނީ ޕުއާޓޯ ރިކޯގެ، ސަން ޖުއާންގައި އޭނާ މޫދަށް އެރި، ފީނުމުގެ ތެރޭގައެވެ.
އޮރިޖިނަލް ވީޑިއޯއަށް ގާތްގަނޑަކަށް 2.5 މިލިއަން ވިއުސް އާއެކު، އެހެން ޕްލެޓްފޯމްތަކުގައި ވެސް މި ވީޑިއޯ ވަނީ ވައިރަލްވެފަ އެވެ. ޓިކްޓޮކްގައި އޭނާގެ ވީޑިއޯގެ ޒަރިއްޔާއިން ޑުއެޓް ޓްރެންޑެއް ގެނައުމުން އެތައް ބަޔަކު ވަނީ ކަކުނި ކަންފަތުން ނަނގާ ވީޑިއޯ އަށް ރިއެކްޝަން ޕޯސްޓްކޮށް، ވީޑިއޯ އިންޓަނެޓްގައި ހިންގުމަށް އަންހެންމީހާއަށް އެހީތެރިވެދީފައެވެ. އަދި ބައެއް މީހުންވަނީ މިވީޑޯ އާއި ގުޅުވައިގެން އަމިއްލަޔަށް ކެމެރާކޮށް ތަފާތު ގިގްސްތައްވެސް ހަދާފައެވެ.
މެޑިކަލް ޕްރޮފެޝަނަލުން ފެށިގެން އެހެން ކޮންޓެންޓް ކްރިއޭޓަރުންނާ ހަމައަށް ވެސް އެތައް ބަޔަކު ވަނީ ވީޑިއޯ އެޕްގައި ނުރުހުމުގެ ޝުއޫރުތަކާއި ބިރުވެރިކަން ފާޅުކުރުމުގެ އިތުރުން، ގިނަ ބަޔަކު މިއީ ގަބޫލު ކުރެވޭ ވީޑިއޯއެއް ނޫންކަން ވަނީ ހާމަކޮށްފައެވެ. ނަމަވެސް އެއީ މިއަންހެން މީހާއަށް އެކަނި ކުރިމަތިވީ ކަމެއް ނޫންކަމަށް ވުމުން މިއީ ނުހިގާނެ ހާދިސާއެއް ކަމަށް ނުބެލެވެއެވެ. ފާއިތުވީ އަހަރުގެ އޮކްޓޯބަރު މަހުގެ ތެރޭގައި ވެސް އެހެން އަންހެނަކަށްވެސް މިފަދަ ހާދިސާއެއް ޕުއާޓޯ ރީކޯގައި ފީނަން އުޅުމުގެ ތެރޭގައި މިފަދަ ހާދިސާއެއް ވަނީ ކުރިމަތިވެފަ އެވެ.
މި ވީޑިއޯ އާއި ގުޅުވައިގެން ޓްވިޓާގައި އެތައް ބަޔަކު، ހެއްވާ މަޖާ ކޮމެންޓް ކުރުމުގެ އިތުރުން، ބައެއް މީހުން ތަފާތު މީމްސްތައް މިވީޑިއޯއަށް ހަދާފައި ވެއެވެ.