ދީނާއި ޤައުމުގެ މިނިވަންކަމުގެ ދިފާޢުގައި މަސައްކަތްކޮށްގެން ވަޒީފާތަކުން ވަކިކުރާ ދިވެހި ކޮންމެ ރައްޔިތަކަށްމެ އެފަރާތްތަކުގެ ވަޒީފާ ޕީ.ޕީ.އެމް ގެ ވެރިކަމެއްގައި އަނބުރާ އިއާދަކޮށްދޭނޭ ކަމުގެ ޔަގީން ޕީޕީއެމުން ދީފިއެވެ.
ޕީޕީއެމްއިން ނެރުނު ބަޔާނެއްގައި ބުނެފައިވަނީ އިސްލާމް ދިނުގެ ދިފާޢުގައި މަދަރްސަތުލް ޢަރަބިއްޔަތުން އިސްލާމިއްޔާގެ މުދައްރިސަކު ވިދާޅުވި ބަސްފުޅަކާއި ގުޅިގެން، އެއީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނެރެފައިވާ ޤަރާރަކަށް ގޮން ޖެހީކަމަށް ބުނެ، އޭނާ ވަޒީފާއިން ސަސްޕެންޑް ކުރި ކުރުން އެންމެ ހަރުކަށި އިބާރާތުން ކުށްވެރި ކުރާކަމަށެވެ. އަދި އެ ވިދާޅުވާ ޤަރާރަކީ ދިވެހި ޖުމްހޫރިއްޔާގެ ޤާނޫނު އަސާސީން ރައީސުލްޖުމްހޫރިއްޔާ އަށް ރިޔާސީ ޤަރާރު ނެރުމަށް ބާރުދީފައިވާ 3 ޙާލަތުން ކުރެ ޙާލަތަކަށް ފެތޭ އެއްޗެއް ނޫންކަމަށެވެ.
އަދި އެ ބާޠިލު ޤަރާރާއި ގުޅިގެން ދައުލަތުގެ މުއައްސަސާތަކުގައްޔާއި ސިވިލް ސާރވިސް ވަޒީފާތަކުގައި ތިއްބެވި މުވައްޒަފުންނަށް ބިރުދައްކާ، ވަޒީފާއިން ސަސްޕެންޑްކޮށް އަދި ވަޒީފާއިން ވަކި ކުރަމުން ގެންދިއުމަކީ އެކޯލިޝަނުން އިންތިހާއަށް ކަންބޮޑުވާ ކަމެއްކަމަށެވެ.
މީގެ އިތުރުން އެބަޔާނުގައި ބުނެފައިވަނީ ރާއްޖޭގެ ދީނީ ޢިލްމުވެރިންގެ މަސްޢޫލިއްޔަތަށް ހުރަސް އަޅާ ދީނީ ޢިލްމުވެރިންނަށް ބިރު ދައްކަމުން ގެންދާ ގެންދިއުމަކީ އެއްގޮތަކަށް ވެސް ދިވެހި ރައްޔިތުން ބަލައިގަންނާނޭ ކަމެއް ނޫންކަމަށާއި، ދިވެހި ރައްޔިތުންނަށް މިވަގުތު އޮތް އެންމެ ބޮޑު ބިރަކީ، އިންޑިއާއެކު ހަދަމުން ގެންދާ ގޮތް ނޭނގޭ އެއްބަސްވުންތަކާއި، ދިވެހި ފަސްގަނޑުގައި އިންޑިއާގެ އަސްކަރިއްޔާގެ ބާރުގަދަކޮށް، ރާއްޖޭގެ މިނިވަންކަމާއި އިސްތިޤުލާލު ނުރައްކަލެއްގެ ތެރެއަށް ހުށަހެޅިގެން ދިއުންކަމަށެވެ.
އަދި ދިވެހި ރައްޔިތުން ހިންގާ އިންޑިއާ އައުޓްގެ ޙަރަކާތްތަކާއި ގުޅިގެން އަޅަމުން ގެންދާ ފިޔަވަޅު ތަކުގައި ޤާނޫނީ އެއްވެސް ބުރަދަނެއް ނުހުންނާނެކަންވެސް ޕީޕީއެމުން ވަނީ ބުނެފައެވެ. ރައީސުލްޖުމްހޫރިއްޔާއަށް ޤާނޫނުން މަތިކޮށްފައިވާ ޒިންމާތައް އަދާ ކުރެއްވުމަށާއި، ދިވެހިރާއްޖޭގެ މިނިވަންކަމާއި އިސްތިޤުލާލު ނެގެހެއްޓުމަށް ދިވެހި ރައްޔިތުން ކުރަމުން ގެންދާ ކަންކަމަށް ހުރަސް ނޭޅުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞަލިޙަށް އިދިކޮޅުން ވަނީ ގޮވާލާފައެވެ.
ހަމެއެއާއެކު ސަރުކާރުންނާއި ސިޔާސީ ފަރާތްތައް ރުއްސުމަށް އެފަރާތްތަކުން ކުރަމުން ގެންދާ ޣައިރުޤާނޫނީ ޢަމުރަށް ތަބާ ނުވުމަށާއި އެކަންކަން ތަންފީޒު ކުރުމާއި ދުރުހެލިވުމަށް ދިވެހި ފުލުހުންނާއި ސިފައިންނަށް ވަނީ އިލްތިމާސް ކޮށްފައެވެ.