ގދ.ފިޔޯރީ ކައުންސިލްގެ 1443 އަހަރުގެ ޤުރުއާން މުބާރާތުން ފެނިގެންދިޔައީ ފިޔޯރީ ސްކޫލްގެ ބެލެނެވެރިންގެ ހިތްތަކުގައި ކީރިތި ޤުރުއާނަށް އުފެދިފައިވާ ލޯބި ކަމުގައި ފިޔޯރީ ކައުންސިލްގެ ރައީސް ފައިޒަރު ރަޝީދު ވިދާޅުވެއްޖެއެވެ.
ފިޔޯރީ ސްކޫލް ހޯލުގައި ކުރިއަށް ދިޔަ މި މުބާރާތުގެ އިނާމްދިނުމުގެ ޖަލްސާގައި ވާހަކަ ދައްކަވަމުން ފައިޒަރު ވިދާޅުވީ މުޅި މުބާރާތުން ފާހަނގަވެގެން ދިޔަ އެއްކަމަކީ ދަރިވަރުންނާއި ބެލެނެވެރިންގެ ހިތްތަކުގައި ކީރިތި ޤުރުއާނަށް އުފެދިފައިވާ ލޯބި ކަމަށާއި މިިކަން ވަރަށް އުފަލާއެކީ ބަލައިގަންނަ ކަމަށެވެ.
ފައިޒަރު އިތުރަށް ވިދާޅުވީ ކާމިޔާބު ހޯދުމަށްވުރެ ކާމިޔާބު ދެމެހެއްޓުމަކީ ބުރަ ކަމެއް ކަމަށެވެ. އަދި މިމުބާރާތުގައި ވަނަވަނައަށް ދިޔަ ދަރިވަރުންނަށް ފައިޒަރު ދިން ނަސޭހަތަކީ ލިބޭ ކާމިޔާބު ދަމަހައްޓަން އިތުރު ހިތްވަރަކާއެކު މަސައްކަތް ކުރާށެވެ.
ފައިޒަރު ފާހަނގަކުރެއްވި ގޮތުގައި މިިމުބާރާތް ހާއްސަވި މައިގަނޑު ސަބަބަކީ ދަރިވަރުންނާއި، އެދަރިވަރުންގެ ބެލެނިވެރިންވެސް މުބާރާތުގައި ބައިވެރިވީތީއެވެ.
ފިޔޯރީ އެސޯސިއޭޝަން ފޯރ ކޮމިއުނިޓީ އެމްޕަވަރމެންޓް( ފޭސް) އާއި ޙަވާލު ކޮށްގެން މި މަހުގެ 22 ން 24 އަށް ކުރިއަށް ދިޔަ ޤުރުއާން މުބާރާތުގެ ކިޔެވުންތައް އަޑުއައްސަވައި، އިންސާފުކޮށް ދެއްވާފައި ވަނީ ދިވެހިރާއްޖޭގެ އިސްލާމިކް ޔުނިވަރސިޓީގެ ފަރާތުން ފޮނުއްވާފައިވާ ވަރަށް ޤާބިލު 3 ފަނޑިޔާރުންނެވެ.
އެހެންކަމުން ދިވެހިރާއްޖޭގެ އިސްލާމިކް ޔުނިވަރސިޓީއަށް ފިޔޯރީ ކައުންސިލްގެ ނަމުގައާއި ފޭސް ޖަމްޢިއްޔާގެ ނަމުގައާއި، މުބާރާތުގެ ބައިވެރިންގެ ނަމުގައި ފައިޒަރު ވަނީ ވަރަށް ހާއްސަ ޝުކުރެއް ދަންނަވާފައެވެ. މީގެއިތުރުން ފޭސް ޖަމްޢިއްޔާގެ އެންމެހާ ބޭފުޅުންނާއި، ފިޔޯރީ ކައުންސިލްގެ ހީވާގި މުވައްޒަފުންނާއި، ފިޔޯރީ ސްކޫލްގެ މެނޭޖްމަންޓާއި، މުދައްރިސުންނާއި، އަވަށްތަކުން މުބާރާތަށް އިސްނަގައި ކުދިން ތައްޔާރުކޮށްދިން ފަރާތްތަކުގެ އަގުހުރި މަސައްކަތް ފާހަގަކޮށް ފައިޒަރު ވަނީ އެފަރާތްތަކަށް ޝުކުރު އަދާކޮށްފައެވެ.
ފިޔޯރީގެ 3 އަވަށް ކަމުގައިވާ ލިލީ، ކަރަންކާ އަދި ޗާންދަނީ އަވަށް ވާދަކޮށް އެކި އުމުރުފުރާ ތަކަށް ހުޅުވާލައިގެން ފިޔޯރީ ކައުންސިލްގެ 1443 އަހަރުގެ ޤުރުއާން މުބާރާތުގެ ބަލައިގެން ކިޔެވުމުގެ ގޮފިން ފަޚުރުވެރި އެއްވަނަ ހޯދާފައިވަނީ މަރިޔަމް ޝާނާ ޙާރިސްއެވެ. މި މަހުގެ 22 ން 24 އަށް ކުރިއަށް ގެންދިޔަ ޤުރުއާން މުބާރާތަކީ ފިޔޯރީ ކައުންސިލް އިން 40000 ރުފިޔާ ޚަރަދު ކޮށްގެން ކުރިއަށްގެންދިޔަ މުބާރާތެކެވެ.
މީގެފަހުން މެދުނުކެނޑި ކޮންމެ އަހަރަކުވެސް މިއަށްވުރެ މާ އަގުހުރި އިނާމުތަކާއެކު މި މުބާރާތް ބާއްވާނެ ކަމަށް ފައިޒަރު ވަނީ ޔަޤީންކަން ދެއްވާފައެވެ.