އެމްޑީޕީގެ ޗެއާޕާސަންގެ މަޤާމަށް ވާދަކުރައްވާ އިމްތިޔާޒު ފަހުމީއަށް ތާއީދު ނުކުރާ އެންމެންނަށް ވަގު ތުހުމަތު އަޅުވާ ކޮރަޕްޓް ކަމަށް ކިޔުމަކީ އެމްޑީޕީއަށް އެންމެ ފައިދާ ހުރި ގޮތެއްނޫން ކަމަށް ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސެއިން ވިދާޅުވެއްޖެއެވެ.
ފިރިކަލުން ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލްގެ ބޮލުގައި އަޅުވަމުންދާ ވައްކަމާއި، ކޮރަޕްޝަންގެ ކަންކަމާއި ގުޅިގެން ހިސާން ކުރެއްވި ޓްވީޓެއްގައި ވިދާޅުވެފައިވަނީ އިންތިއަށް ތާއީދު ނުކުރައްވާ ބޭފުޅުންނަކީ ވަގުން ކަމަށާއި ކޮޮރަޕްޓްވެފައިތިބި ބައެއް ކަމަށް ބުނުމަކީ ޕާޓީއަށް އެންމެ ރަނގަޅުގޮތް ނޫން ކަމަށެވެ.
އެމްޑީޕީގެ އެތެރޭގެ އިންތިޚާބުގައި ޕާޓީގެ ޗެއަރޕާސަނަކަށް ވާދަކުރައްވާ ދެބޭފުޅުން ކަމަށްވާ އިންތި އާއި ފައްޔާޒުގެ ޓީމުން ދަނީ ވަރަށް ވަރުގަދައަށް ކެމްޕެއިން ޖައްސަމުންނެވެ. މިދެބޭފުޅުންނަކީ ޕާޓީގެ ދެފެކްޝަނުގެ ބޭފުޅުން ކަމަށްވުމުން އިންތިއަށް ތާއީދު ކުރާ ބޭފުޅުން ދަނީ ފައްޔާޒުގެ ޓީމަށް ބޮޑެތި ތުހުމަތްތަކެއް އަޅުވަމުންނެވެ. މިއިންތިޚާބުގެ ސަބަބުން އެމްޑީޕީ ބައިބައިވެ ޕާޓީތެރޭ މަސްލަހަތު މިހާރުވަނީ ގެއްލިފައެވެ.
އެގޮތުން ހިސާންގެ ފިރިކަލުން ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލްގެ ބޮލުގައި އަޅުވަމުންދާ ވައްކަމާއި، ކޮރަޕްޝަންގެ ކަންކަމާއި ގުޅިގެން ފިރިކަލުންގެ ދިފާއުގައި ހިސާން މިވަނީ ނުކުމެފައެވެ. ހިސާން ވިދާޅުވީ ފިރިކަލުން ނާޒިލްއަކީ މިސަރުކާރުގެ އެއްވެސް މަޝްރޫޢެއް ނަގައިގެން މަސައްކަތް ކުރައްވާ ބޭފުޅެއް ނޫންކަމަށާއި، އަދި ސަރުކާރުން އިއުލާން ކުރާ ބިޑްތަކަށް ކުރިމަތިލައިގެން އެޕްރޮޖެކްޓްތައްވެސް ހޯދަން އުޅޭ މީހެއް ނޫންކަމަށެވެ.
މިއިންތިޚާބުގައި މިސަރުކަރުން ހިންގާ މަސައްކަތްތަކުގައި އިކޮނޮމިކް މިނިސްޓަރ ފައްޔާޟުގެ ނުފޫޒާއި، ބާރު އޮންނަކަމަށް ހުޅުދޫ ދާއިރާގެ މެމްބަރު އިލްޔާސް ލަބީބުވެސް ވަނީ ވިދާޅުވެފައެވެ. މިވާހަތަކާއި ގުޅިގެން ރައްޔިތުންގެ މަޖިލީހުގެ ހެންވޭރު ދެކުނު ދާއިރާ ހުސެއިން ޝަހީމް (އަނދުން ހުސެއިން) ވިދާޅުވެފައިވަނީ މިސަރުކާރުން ހިންގާ 5،000 މިލިޔަނެއްހާ ރުފިޔާގެ ޕްރޮޖެކްޓް ހިންގާ އެފްކޯން ކޮމްޕެނީގެ ލޯކަލް އެޖެންޓަކީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސްގެ އާއިލީ ކުންފުނިކަމަށެވެ. މަޖިލީހުގެ އެސްއީ ކޮމެޓީއައި ހަވާލުވެ އިންނަވައި، ކުންފުނިތަކުގެ ތެރެއަށާއި، ބޮޑެތި ޕްރޮޖެކްޓްތަކުގައި ނުފޫޒު އިންތިހާއަށް އޮތް ބޭފުޅަކު މިފަދަ ވާހަކަ ދައްކަވަމުން ލަދު ގަންނަންޖެހޭކަމަށް ހުސެއިން ވިދާޅުވިއެވެ.