މި ސަރުކާރުގެ ކޯލިޝަން ލީޑަރު އަދި މަޝްހޫރު ވިޔަފާރިވެރިޔާ ޤާސިމް އިބްރާހިމް އަށް ގދ.ހޯނޑެއްދޫ އިން ހުވަދޫ ފިޝަރީޒް ކޮމްޕްލެކްސް އޮޕަރޭޝަނަށް ގެނައުން ނުވަތަ ހޮރައިޒަން ފިޝަރީޒް ކޮމްޕްލެކްސް އެއް ހިންގުމަށް ދެވިފައިވާ ބިމުގެ އެގްރިމެންޓް ބާޠިލްކޮށް ދިނުމަށް އެދި ހުވަދުއަތޮޅު ދެކުނުބުރީ އަތޮޅުކައުންސިލުން ޤަރާރެއް ފާސްކޮށްފިއެވެ.
ހުވަދުއަތޮޅު ދެކުނުބުރީ އަތޮޅުކައުންސިލުން ނެރުނު ޤަރާރުގައި ބުނާގޮތުން 2005 ވަނަ އަހަރުން ފެށިގެން ގދ. ހޯނޑެއްދޫގައި ހޮރައިޒަން ފިޝަރިޒްއިން ހަދަން ފަށާފައިވާ މަސްފެކްޓަރީ ހުޅުވި މަސްކިރުމުގެ މައްސަލައަށް ހައްލެއް ލިބިގެން ދިއުމަކީ ހުވަދުއަތޮޅުގެ މަސްވެރިން ދެކެމުންއައި ވަރަށް ފޮނި އުންމީދެއް ކަމަށާއި، 16 އަހަރު ވީއިރުވެސް ހުވަދޫ ފިޝަރީޒް ކޮމްޕްލެކްސް އޮޕަރޭޝަނަށް ނުގެނެވި އޮތުމަކީ މަސްވެރިންނަށްވެވޭ ބޭއިންސާފެކެވެ.
ހުވަދޫ ފިޝަރީޒް ކޮމްޕްލެކްސްގެ ބޮޑުބައި ނިމިފައިވުމުގެ ސަބަބުން އެތަން އޮޕަރޭޝަނަށް ގެނެވިއްޖެނަމަ އަވަސް މުއްދަތެއްގެ ތެރޭގައި މަސްވެރިންނަށް ދިމާވެފައިވާ މަސްނުކިރުމުގެ މައްސަލައަށް ހައްލެއްލިބިގެންދާނެ ކަމަށް ކައުންސިލުގެ ޤަރާރުގައި ބުނެފައިވެއެވެ.
މީގެއިތުރުން ހުވަދު އަތޮޅަކީ މަސްވެރިން ގިނަ އަތޮޅަކަށް ވީހިނދު މިވަގުތު ހުވަދުއަތޮޅުގައި މަސްކިރުމަށް ހެދިފައިވަނީ ކޫއްޑޫ މަސްފެކްޓަރީ ކަމުގައިވާތީ، އާދައިގެ ދުވަސްވަރުގައިވެސް މަސްކިރުމުގައި މަސްވެރިންނަށް ތަކުލީފު އުފުލަންޖެހޭކަން ކައުންސިލުންވަނީ ފާހަނގަކޮށްފައެވެ.
އެހެންކަމުން ހުވަދޫ ފިޝަރީޒް ކޮމްޕްލެކްސް އޮޕަރޭޝަނަށް ގެނައުން ނުވަތަ ހޮރައިޒަން ފިޝަރީޒް ކޮމްޕްލެކްސްއަށް ދެވިފައިވާ ބިމުގެ އެގްރިމެންޓް ބާޠިލްކޮށް ދިނުމަށް ކުރަންހުރި މަސައްކަތްތައް ހަލުވިކޮށް ދިނުމަށް އެދި ކައުންސިލުން ވަނީ ސަރުކާރަށް ގޮވާލާފައެވެ.
ހޯޑެއްދޫގައި ތަރައްޤީކުރަމުންދާ ކޯލްޑް ސްޓޯރޭޖުގެ މަސައްކަތް ނިންމައި ޚިދުމަތް ފޯރުކޮށް ދިނުމަށް ބާރުއެޅުމަށް ހޯޑެއްދޫ ކައުންސިލުންވެސް ވަނީ ސަރުކާރުގެ ކަމާއި ގުޅޭ މުއައްސާތަކަށް ގޮވާލާފައެވެ. އަދި އެތަނުގެ މަސައްކަތް ނުނިމި ލަސްވަމުންދާތީ އާއި މިހާރު އޮތް ހާލަތަށް ރިޢާޔަތްކޮށް ވަގުތީގޮތުން ހުވަދޫ ފިޝަރީޒް ކޮމްޕްލެކްސްގައި މަސްކިރޭނެ އިންތިޒާމެއް ހަމަޖައްސައި ދިނުމަށްވެސް ހޯޑެއްދޫ ކައުންސިލުން ވަނީ ހޮރައިޒަން ފިޝަރީޒަށް ގޮވާލާފައެވެ.
ގދ.ހޯޑެއްދޫގައި މީގެ 16 އަހަރު ކުރިން ވިލާ ގުރޫޕުން ހަދަން ފަށާފައިވާ ކޯލްޑް ސްޓޯރޭޖް ހުވަދޫ ފިޝަރީޒް ކޮމްޕްލެކްސްގެ މަސައްކަތް ނުނިމި ގިނަ ދުވަސްވުމުން މިމައްސަލަ ހައްލުކޮށް އެތަނުގެ ޚިދުމަތް ލިބޭނެ ގޮތް ހަދައިދިނުމަށް ރައީސަށް ހުށަހެޅުމަށްޓަކައި ޕެޓިޝަނެއް ތައްޔާރުކޮށް އެޕެޓިޝަނުގައި ގިނަ ބަޔަކު ދަނީ ސޮއި ކުރަމުންނެވެ.