ްޓެކާސް މައިލޯ ޗެމްޕިއަންޝިޕް މުބާރާތުގެ ދެކުނުގެ ޗެމްޕިއަން ވާދޫ ޓީމަށް ލިބުނު ފުރިހަމަ ކާމީޔާބީއާއެކު އެނބުރި ރަށަށް ދިއުމުން އެރަށުގެ ހުރިހާ ރައްޔިތުން ވަނީ އެ އުފަލުގައި ބައިވެރިވެ ރަށަށް ރީތި ނަން ހޯދައިދިން ޓީމަށް ރަތް ދޫލައިގެ ހޫނު މަރުޚަބާއެއް ކިޔާފައެވެ.
ޏ.ފުވައްމުލަކު ޓީމާއެކު ސެމީގައި ކުޅުމަށްފަހު ވާދޫ ޓީމް މިވަނީ 2-1 އިން މެޗު ކާމިޔާބުކޮށްފައެވެ. މިކާމިޔާބަށްފަހު ވާދޫ ޓީމް ވަނީ އިއްޔެ ހަވީރު ވަދޫއަށް ދަތުރުކޮށްފައެވެ.
ވާދޫގެ ހުރިހާ މުއައްސަސާތައް ހިމެނޭގޮތަށް ރަށުގެ ހުރިހާ ރައްޔިތުން ނުކުމެ ޓީމަށް ހޫނު މަރުހަބާއެއް ކިޔާފައިވެއެވެ. މިއީ ހުވަދު އަތޮޅަށް ހާއްސަކޮށް ވާދޫއަށް ލިބިގެންދިޔަ ބޮޑު ފަޚުރެކެވެ. އެހެންކަމުން ރައްޔިތުންވަނީ ޓީމަށް ޝުކުރު ދަންނަވާފައެވެ.
ރޭ ކުޅެން ހަމަޖެހިފައިވާ ފައިނަލް މެޗުުގައި ވާދޫ ޓީމާއި ވާދަކުރާ މ.މުލަކު ޓީމް ވަނީ ފައިނަލްގައި ނުކުޅެން ނިންމާ މެޗް ދޫކޮށްލާފައެވެ. އެހެންކަމުން ވާދޫ ޓީމް ވަނީ މުބާރާތުގެ ޗެމްޕިއަންކަން ހޯދާފައެވެ. ހަމައެގޮތަށް އުތުރުގެ ޗެމްޕިއަން ޓީމަކަށް ހޮވިފައިވަނީ ކުޅުދުއްފުށީ ޓީމެވެ.
މީގެ 10 ދުވަސްފަހުން ކުޅެން ހަމަޖެހިފައިވާ ފައިނަލް މެޗް ކުޅުމަށް ވާދޫ ޓީމް މާލެ ފުރުމަށް ވަނީ ހަމަޖެހިފައެވެ. މިމުބާރާތުގެ މުޅި ރާއްޖޭގެ ޗެމްޕިއަން ހޯދުމަށް ވާދޫ ޓީމާއި ކުޅުދުއްފުށީ ޓީމްގެ ފައިނަލް މެޗް އޮންނާނީ ކުޅުދުއްފުށީގައެވެ.
ރާއްޖޭގެ ސްޕޯޓްސް އިވެންޓް މެނޭޖްމަންޓް ކުންފުނި، ޓެކާސް އިން، ރާއްޖޭގެ ރިކްރިއޭޝަނަލް ކުޅިވަރުގެ މަންޒަރު ބަދަލުކޮށްލާނެ ފަދަ ބޮޑު ފުޓްސަލް މުބާރާތް “ޓެކާސް މައިލޯ ޗެމްޕިއަންޝިޕް”ގައި ހިމެނެނީ މާލެ ސަރަހައްދާއި ރިޒޯޓްތަކާއި ރަށްތަކަށް ހުޅުވާލައިގެން ބާއްވާ ތަފާތު ތިން މުބާރާތެކެވެ.
ސްޕޯޓްސް މިނިސްޓްރީ އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެންޑޯސްކޮށްފައިވާ މި މުބާރާތުގެ ޕްލެޓިނަމް ސްޕޮންސަރުގެ ގޮތުގައި ޓައިޓަލް ނަގާފައިވަނީ ރާއްޖޭގެ ކުޅިވަރަށް އަބަދަށްފެހި “މައިލޯ” އެވެ. ގޯލްޑް ޕާޓްނަރުންނަކީ އުރީދޫ މޯލްޑިވްސް، އަލް ޝާލީ މެރިން މޯލްޑިވްސް، އެމްޓީސީސީ، ވެލިގާ ހާޑްވެއާ، މޯލްޑިވްސް ގޭސް، މޯލްޑިވިއަން، ވެލްވޮލިން، މީޑިއާނެޓް އަދި ޕާސަނަލް ކޮމްޕިއުޓާސް އެވެ.