ރިޔާސީ އިންތިހާބަށް ނުކުންނަވަން ރައީސް އިބްރާހިމް މުހައްމަދު ސޯލިހް ނިންމަވައިގެން ހުންނެވި ނަމަވެސް ޕާޓީތަކާ އެކު އެ މަޝްވަރާ ނުކުރައްވާ ކަމަށާއި، އެމަނިކުފާނުގެ ކެނޑިޑޭސީ އިއުލާނުކުރެއްވީ އަދާލަތު ޕާޓީއާއި، ޖުމްހޫރީ ޕާޓީ ވެސް އެކުގައި ތިއްބަވާނެ ކަމަށް ނިންމަވައިގެން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ މެމްބަރުން ތިއްބަވާ ގްރޫޕަަކަށް އެ ޕާޓީގެ ރައީސް، ނަޝީދު ފޮނުއްވި މެސެޖެއްގައި މިގޮތަށް ވިދާޅުވީ ދެ ވަނަ ދައުރަކަށް ވާދަކުރައްވާނެކަން ރައީސް އިބްރާހިމް މުހައްމަދު ސޯލިހް އިއުލާން ކުރެއްވުމަށް ފަހު، ޖުމްހޫރީ ޕާޓީގެ ރައީސް ގާސިމް އިބްރާހީމް އާއެކު މާމިގިލީގައި ބޭއްވުނު ބައްދަލުކުރެއްވުމާއި ގުޅިގެންނެވެ.
ނަޝީދު ވިދާޅުވީ ރައީސް އިބްރާހިމް މުހައްމަދު ސޯލިހް ދެ ވަނަ ދައުރަކަށް ކެންޑިޑެސީ އިއުލާން ކުރެއްވީ ސަރުކާރު ކޯލިޝަންގައި މިހާރު ހިމެނޭ ޖުމްހޫރީ ޕާޓީ އާއި އަދާލަތު ޕާޓީ ވެސް އެކުގައި ތިއްބަވާނެ ކަމަށް ނިންމަވައިގެން ކަމަށެވެ. ނަޝީދު ވިދާޅުވީ، ކުއްލިއަކަށް ގާސިމްއާ ބައްދަލުކުރެއްވުމުގެ މާނައަކީ، ޕާޓީތަކާ އެކު ގޮތެއް ނުނިންމަވައި އިއުލާން ކުރެއްވުމެވެ.
“މި ފެނުނީ ޖޭޕީއާ ވެސް އަދި އަދާލަތު ޕާޓީއާ ވެސް އެމްޑީޕީން މަޝްވަރާކޮށްފައި ނުވާކަން. ރައީސްގެ ކެންޑިޑެސީ އިއުލާން ކުރެއްވުމާ އެކު ފުރާވަޑައިގަތުމަށް ޖެހިވަޑައިގަތީ މާމިގިއްޔަށް، އެހެނަސް ޖޭޕީ އަދި ގޮތެއް ނިންމިތަނެއް ނުފެނޭ. މިހާރު ރައީސުލްޖުމްހޫރިއްޔާގެ ކެންޑިޑޭސީގެ އުންމީދު އެއްގޮތަކަށްވެސް ކުރިއަށްދާނީ ޖޭޕީ ނިންމާ ގޮތެއްގެ މައްޗަށް.” ނަޝީދު ވިދާޅުވިއެވެ.
ރިޔާސީ އިންތިހާބުގައި ވާދަކުރެއްވުމާ މެދު ގާސިމް ގޮތެއް ނިންމާފައި ނުވާއިރު، މިދިޔަ ބުރާސްފަތިދުވަހު ވިދާޅުވީ އިންތިޚާބުގައި ވާދަކުރައްވަން އަދި ނުކުރައްވަން ވެސް އެހާތަނަށް ނުނިންމަވާ ކަމަށެވެ.