ގދ. ތިނަދޫގައި ހުރި ހިލަތަކާއި، ހިލަވެލި ތިނަދޫ ޕަބްލިކް ވޯކްސްގެ ބެލުމުގެ ދަށަށް ގެންދަނިކޮށް އެމައްސަލަ ތިނަދޫ ކައުންސިލުން ކޯޓަށް ހުށައަޅައިފިއެވެ.
މި މައްސަލަ ތިނަދޫ ކައުންސިލުން ތިނަދޫ މެޖިސްޓްރޭޓް ކޯޓަށް ހުށަހަޅާފައި ވާތީ، އެމައްސަލަ އާއި ގުޅިގެން ބާއްވާ އަޑުއެހުން މިވަގުތު ތިނަދޫ މެޖިސްޓްރޭޓް ކޯޓުގައި ކުރިއަށް އެބަދެއެވެ. މި މައްސަލައާއި ގުޅިގެން ވަގުތީ އަމުރެއް ނެރުމަށް ބާއްވާ އަޑުއެހުން ތިނަދޫ މެޖިސްޓްރޭޓް ކޯޓުން ފަށާފައިވަނީ މިރޭ 8 ޖެހިއިރުއެވެ.
މައުލޫމާތު ލިބިފައިވާ ގޮތުގައި ތިނަދޫ ޕަބްލިކްވޯކްސް އިން ހިލަތައް ގެންދިޔުމުގެ މަސައްކަތް ފަށާފައިވަނީ އެންވާރަމެންޓް މިނިސްޓްރީން ޕްލޭނިން މިނިސްޓްރީގައި އެދިގެންނެވެ އަދި އެ ހިލަތައް މިނިސްޓްރީގެ އެންގުމާއި އެއްގޮތަށް ޕަބްލިކް ވޯކްސްގެ ސައިޓަށް ބަދަލުކުރުމަށް މަސައްކަތް ކުރަނިކޮށް އިއްޔެ ތިނަދޫ ކައުންސިލުން ވަނީ އެކަމަށް ހުރަސް އަޅާފައެވެ.
ތިނަދޫ ކައުންސިލުން ބުނި ގޮތުގައި އެ ހިލައާއި ހިލަވެއްޔާއި ދަގަނޑު ފަދަ އިމާރާތްކުރުމަށް ބޭނުންކުރާ ތަކެއްޗަކީ އެ ކައުންސިލުގެ ބިމެއްގައި ހުރި އެ ކައުންސިލުގެ ބެލުމުގެ ދަށުގައި ހުރި ތަކެއްޗެވެ. އަދި ޕަބްލިކްވޯރކްސްގެ ވެހިކަލްތައް ބޭނުންކޮށްގެން ޕަބްލިކްވޯރކްސްގެ ސައިޓަށް ޖަމާކުރަމުން ދަނީ ތިނަދޫ ކައުންސިލުގެ ހުއްދައެއް ނެތި ކަމަށްވެސް އެކައުންސިލުން ބުނެއެވެ.