ޑރ އަބްދުއްސަމަދު މެމޯރިއަލް ހޮސްޕިޓަލް (ޑީއޭއެސްއެމްއެޗް) އިން ޚާއްޞަ ގެބަލިތަކުގެ ޑޮކްޓަރުން ދާއިމީކޮށް ތިބޭ ގޮތަށް އަތޮޅު ޞިއްޙީ މަރުކަޒުތަކަށް ފޮނުވަން ފަށައިފިއެވެ.
ތިނަދޫ ގައި ހުންނަ ޑރ އަބްދުއްސަމަދު މެމޯރިއަލް ހޮސްޕިޓަލުގެ މީޑިއާ އޮފިޝަލް ސާލިމް އަލީ ހުވަދޫ ނިއުސް އަށް މައުލޫމާތު ދެއްވަމުން މިއަދު ވިދާޅުވީ މިއަދު ހަވީރު ގދ ގައްދޫ އިން ފަށާ ޚާއްޞަ ޕްރޮގްރާމަކީ އަތޮޅުގެ ހުރިހާ ރަށަކަށް ފަސޭހައިން ޚާއްޞަ ބަލިތަކަށް ފަރުވާ ދޭ ޑޮކްޓަރުންގެ ދާއިމީ އުސޫލެއް ގާއިމް ކުރުމަށް ފެށި ކަމެއް ކަމަށެވެ.
އެގޮތުން މިއަދު ވަނީ ކުޑަކުދިންގެ ޚާއްޞަ ޑޮކްޓަރަކާއި އަންހެނުންގެ ޚާއްސަ ޑޮކްޓަރެއްގެ އިތުރުން މެޑިކަލް އޮފިސަރެއް އެ ރަށުގައި ދާއިމީ ކޮށް ތިބޭނެ ނިޒާމު ހަމަޖައްސާފައެވެ.
ޑރ އަބްދުއްސަމަދު މެމޯރިއަލް ހޮސްޕިޓަލުގެ ޑެޕިއުޓީ ސީއީއޯ އަބްދުލް އަޒިޒް ރިފާއު ވިދާޅުވީ ހޮސްޕިޓަލުގެ އެންމެ ފުރަތަމަ އަމާޒަކަށްވީ ޑޮކްޓަރުންގެ އެކި ޑިޕާތްމަންޓްތަކުން މަދުވާ ޑޮކްޓަރުންގެ އަދަދު ހަމަކޮށް ޚިދުމަތަށް ނެރުން ކަމަށާއި ކުރެވުނު ގިނަ މަސައްކަތުން މިހާރު ޓާގެޓުގެ 90 އިންސައްތަ ހާސިލް ކުރެވިފައިވާ ކަމަށެވެ. އަދި ގައްދޫއަށް މިއަދު ފޮނުވުނު ޑޮކްޓަރުންނަކީވެސް އެމަސައްކަތުގެ ނަތީޖާ ކަމަށެވެ.
މާލެއިން ދެކުނުގެ އަތޮޅުގައި ފުރަތަމަ ފަހަރަށް ސިއްކީ މަރުކަޒެއްގައި ހާއްސަ ބަލިތަކުގެ ޑޮކްޓަރުން ޤާއިމުވެ ތިބެ ބަލިމީހުން ބަލާގޮތަށް މިގެނެވުނު ތާރީޚީ ބަދަލާއެކު، ގައްދުގެ އިތުރުން އެސަރަހައްދުގެ ރަށްތަކުގައި ދިރިއުލޭ ފަރާތްތަކަށް ޚިދުމަތް ލިބިގަތުމުގައި ނުހަނު ގިނަ ފަސޭހަތަކެއް ލިބިގެންދާނެއެވެ. މިގޮތުން ޚިދުމަތް ހޯދުމަށްްޓަކައި އަތޮޅުގެ މައި ހޮސްޕިޓަލަށް ކުރަންޖެހޭ ދަތުރުގެ ވަގުތު ވަރަށް ބޮޑަށް ކުޑަވެގެންދާނެ ކަމަށް ޑރ އަބްދުއްސަމަދު މެމޯރިއަލް ހޮސްޕިޓަލުން ވަނީ ބުނެފައެވެ.
ގދ.ގައްދޫ ހެލްތު ސެންޓަރަކީ 9 އޮކްޓޫބަރ 2018 ގައި މިނިސްޓްރީ އޮފް ހެލްތުން ގިންތި ކޮށްފައިވާ ލެވެލް 4 ގެ ސިއްޚީ މަރުކަޒެކެވެ. 24 ގަޑިއިރުގެ ޚިދުމަތް ފޯރުކޮށްދޭ މި މަރުކަޒުގައި މެޑިކަލް އޮފިސަރެއް މަސައްކަތް ކުރެއެވެ. ގައްދޫ ސިއްކީ މަރުކަޒުގައި ލެބޯޓަރީއެއް ޤާއިމުކެރެވިފައިވެއެވެ. އެހެންނަމަވެސް އެރަށުން ނުހެދޭ ޓެސްޓު ތަކުގެ ސާމްޕަލް ތިނަދުއަށް ފޮނުވައިގެން ޓެސްޓުތައް ހެދޭ ނިޒާމު ވަނީ ޤާއިމުކުރެވިފައެވެ.