އަޅުގަނޑުމެންގެ ކާބަފައިންގެ ދިރިއުޅުމަކީ ސާދާ ދިރިއުޅުމެކެވެ. ހެޔޮކަންތައްތަކާއި ރަނގަޅު އާދަތައް އެކުލެވޭ ދިރިއުޅުމެކެވެ. އެގޮތުން ތުއްތު ކުދިން މަޣްރިބް ނަމާދާއި އިޝާ ނަމާދާއި ދެމެދުގެ ވަގުތުގައި ބޭރަށް ނުނެރުމާއި ރޭގަނޑުގެ ވަގުތުތަކުގައި ވެސް ޒަރޫރީ ހާލަތެއް މެދުވެރިވެގެން ނޫނީ ކުދިން ބޭރަކަށް ނުނެރުން ހިމެނެއެވެ. ދެ ނަމާދު ދޭތެރޭގައި ޔާސީން ސޫރަތާއި އަދި މުލްކު ސޫރަތް ކުޑަކުދިން ލައްވާ ކިޔުއްވައެވެ.
ހިތާމަ އަކީ މިއަދު އަޅުގަނޑުމެންގެ މުޖުތަމައުގެ ތެރެއިން މި އާދަތައް ނެތިގެން ދާން ފަށައިފައިވާ ކަމެވެ. ކާބަފައިން އަޅުގަނޑުމެންނަށް ދޫކޮށްފައި ދިޔަ ރަނގަޅު އާދަތަކުން އަޅުގަނޑުމެން އަތް ދޫކޮށްލުމަކީ ހިތާމައިގެ ކޮޅެއް ނެތް ކަމެކެވެ.
ތުއްތު ކުދިންނަށް އެސްފީނާ ޖެހުމަކީ ވެސް މެދުވެރިވާ ކަމެކެވެ. އަދި އެކުދީންނަށް ސިހުރު ނުވަތަ ޖިންނީންގެ އުނދަގޫ ޖެހުމަކީ ވެސް މެދުވެރިވާ ކަމެކެވެ. ތިރީގައި މިބަޔާން ކުރަނީ މިފަދަ ކަމެއް ތުއްތު ކުއްޖަކަށް ދިމާވެއްޖެނަމަ ފެނިދާނެ ބައެއް ޢަލާމާތެވެ. ރޫޙާނީ ކަމެއްގެ އިތުރުން، މިފަދަ ޢަލާމާތެއް ފެންނަ ފަދަ ޖިސްމާނީ އެހެން ބަލިމަޑުކަމެއް ހުރެއްޖެ ނަމަވެސް މިފަދަ ޢަލާމާތެއް ފެނިދާނެއެވެ. ނަމަވެސް އެފަދަ ސަބަބެއްވެސް ނެތި މީގެ ތެރެއިން ގިނަ ކަންކަން ތަކުރާރުވާ ނަމަ ރޫޙާނީ ބަލިމަޑުކަމެއް ކަމުގައި ބެލެވޭނެއެވެ.
އަލާމާތްތައް
1- ކުއްޖާ ހިކި އަނަރޫފަވެ، ކެއުމާއި ދުރުވުން.
2- ރޭގަނޑުގެ ވަގުތުގައި ގިނައިން ރޮއެ ހަޅޭއްލަވާ ހެދުން. ނުވަތަ ހާސްވެ ނުނިދިގެން އުޅުން.
3- މޫނު ރީނދޫވުން.
4- ހަލަނިވުން
5- މައިންބަފައިންނަށް ނުކިޔަމަންވެ ބަސްނޭހުމާއި ކުއްޖާގެ އުޅުމަށް ބަދަލު އައުން.
6- ނިދާފައި އޮންނައިރު ހުވަފެނުގައްޔާއި، ހޭލާ ހުންނައިރު އެކިޒާތުގެ އެއްޗެހި ފެނުން. (އަސްލުގައި ފެންނަން ނެތް، ނަމަވެސް އެކުއްޖާއަށް އެފަދަ އެއްޗެއް ފެނުން.) ޚާއްސަކޮށް ޖަނަވާރުން.
7- ވިސްނުން ތޫނު ކުއްޖަކު ވިސްނުން ކޮށިވުމާއި ކަންކަމަށް ސަމާލުކަން ދިނުން ކުޑަވެ، ކަންކަން ހަނދާން ނެތޭލެއް އަވަސްވުން.
8- ގިނައިން އާފުރުން.
މިފަދަ ބަލިމަޑުކަމެއް ހުރެއްޖެނަމަ ފަރުވާގެ ގޮތުގައި ކުރެވިދާނެ ބައެއް ކަންތައްތައް
1- ގޭތެރެ އަބަދުވެސް ރައްކާތެރިކުރުން: ފުރާނަ އެޅުއްވި އެއްވެސް އެއްޗެއްގެ ސޫރަ (ބުދު، ފޮޓޯ ފަދަ) ފާޅުވާ ގޮތަށް ގޭގައި ނުބަހައްޓާށެވެ. އަދި މިއުޒިކާއި ލަވަ އަޑު ނީވޭ މާހައުލެއް ކަމުގައި ދަރިފުޅުގެ މާހައުލު ހަދާށެވެ. ގެއަށް ވަދެ ނުކުމެހަދާއިރު ސަލާމް ގޮވުމާއި ވީހާވެސް ގިނައިން ގޭގައި ސުންނަތް ނަމާދު ކޮށް ގިނައިން ޤުރުއާން ކިޔަވާށެވެ. ޚާއްސަކޮށް ބަޤަރާ ސޫރަތް ގޭގައި ކިޔަވާށެވެ.
2- ޝަރުޢީ ރުޤްޔާގެ އާޔަތްތައް ޒައިތޫނި ތެލަށް ކިޔަވައި، ހެނދުނު ހޭލާ ގަޑީގައި، އަދި ރޭގަނޑު ނިދާއިރު ކުއްޖާގެ ހަށިގަނޑުގައި އުނގުޅާށެވެ.
3- މުޢައްވިޛަތައިން (ސޫރަތުލް ފަލަޤި އަދި ސޫރަތުއް ނާސް) ކިޔަވައި ދެއަތްތިލައަށް ފުމެ، ރައްކާތެރިކަމުގެ ދުޢާތައް ކިޔަމުން ތުއްތު ކުއްޖާގެ ގައިގައި އަތްފިރުމާށެވެ.
4- ރުޤްޔާގެ އާޔަތްތައް ފެނަށް ކިޔަވައި އެފެނުން ކުއްޖާ ފެންވަރުވާށެވެ. ކޮންމެ ދުވަހަކު މިކަން ކޮށްލާށެވެ.
5- ރުޤްޔާގެ އާޔަތްތައް ފެނަށް ކިޔަވައި އެފެން ބޯންދިނުން.
6- ސުންނަތުގައި އައިސްފައިވާ ގޮތަށް ކުއްޖާ ރައްކާތެރިކުރާށެވެ.
7- ކުއްޖާ ގައިގައި ހުންނަ ރަނގަޅު، އެހެން މީހުން އަޖައިބުވާފަދަ ސިފަތަކުގެ ވާހަކަ ރަޙްމަތްތެރީންނާއި އެހެންވެސް މީހުންކައިރީ ދެއްކުމުގައި ސަމާލުވެ ރައްކާތެރިވާށެވެ.
މިގޮތަށް ކުރެވޭ ރުޤްޔާގެ ތެރޭގައި މި ދަންނަވާ ރުޤްޔާ ހިމެނެއެވެ.
ކުއްޖާގެ މުޅި ހަށިގަނޑު ތެމޭހާ ފެނަށް، ސޫރަތުލް ފާތިޙާ، އާޔަތުލް ކުރުސި، ސޫރަތުލް ބަޤަރާގެ ފަހު ދެއާޔަތް، ސޫރަތުލް ކާފިރޫން، ސޫރަތުލް އިޚްލާޞް، ސޫރަތުލް ފަލަޤް، ސޫރަތުއް ނާސް، މިސޫރަތްތައް ކިޔަވާ ފުމެ، އެފެން ކުއްޖާގެ ބޮލަށް މުޅި ހަށިގަނޑު ތެމޭގޮތަށް އެޅުން. މިގޮތަށް 3 ، 5 ، 7 ނުވަތަ ރަނގަޅު ވަމުން އަންނަނަމަ، މުޅިން ރަނގަޅުވަންދެން ފަރުވާ ކުރިއަށް ގެންދާނީއެވެ.
މަސްދަރު:މައިތިރި