ބިދޭސީން އުޅޭ ގެޔަކަށް ވަދެ ފޭރުނު މައްސަލައިގައި ދެ އަންހެނަކާއި ފިރިހެނަކު 24،000 ރުފިޔާއިން ޖޫރިމަނާކޮށް، ހަތަރު މަހާއި 24 ދުވަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.
ބިދޭސީން އުލޭ ގެޔަކަށް ވަދެ މިތިން މީހުންވަނީ ބިދޭސީ މީހެއްގެ އަތުން ފައިސާ އާއި މޯބައިލް ފޯނެއް ފޭރިގެންފައެވެ. އެހެންކަމުން ދައުލަތުން އެމީހުންގެ މައްޗަށް ކޮށްފައިވަނީ މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.
ފުލުހުން ހާމަކުރި ގޮތުގައި ދައުވާ ލިބުނު ތިން މީހުން ބަންގްލަދޭޝްގެ ރައްޔިތެއް ކަމަށްވާ ރޮބެލް މިއާ ދިރިއުޅޭ ގެއަށް އޭނާއާއެކު 2018 ވަނަ އަހަރު ވަދެ، އޭނާގެ އަތުން 3،335 އެމެރިކާ ޑޮލަރު (51259 ރުފިޔާ) އާއި 20،995 ރުފިޔާ އާއި ސެމްސަންގު އަށެއް ޕްލަސް ފޯނެއް ފޭރިގެންފައިވާ ކަމަށެވެ.
އެ މައްސަލާގައި ދައުވާ އުފުލި ތިން މީހުންނަކީ ހ. ލާމިޔާ، ފާތިމަތު ނަޝާޔާ އާއި އއ. ތޮއްޑޫ، ހުދުފިިނިފެންމާގޭ، ހަދީޖާ ޝައިމާ އަލީ އަދި ތ. ތިމަރަފުށި، އަނބުގަސްދޮށުގެ، އަހްމަދު ހައިސަމްއެވެ.
އެ މައްސަލަ ތަހުގީގު ކުރި އިރު އާއި އިބްތިދާއީ މަރުހަލާގައި ވެސް މައްސަލައިގައި ހިމެނޭ ނަޝާޔާ އާއި ޝައިމާ ކުށަށް އިންކާރު ކުރިއެވެ. އެކަމަކު ޝަރީއަތް ފަށައި ހެކިބަސް ނަގަން ފެށުމުގެ ކުރިން ދެ ފަރާތުން އިއްވަން ޖެހޭ އިފްތިތާހީ ބަޔާން ވެސް އިއްވި ފަހުން އެ ދެ މީހުން ވަނީ ކުށަށް އިއުތިރާފް ވެފައެވެ. އަދި ދައުވާ ކޮށްފައިވާ ފިރިހެން މީހާ ވަނީ ޝަރީއަތުގެ ފުރަތަމަ މަރުހަލާއިން ވެސް ކުށަށް އިއުތިރާފްވެފަ އެވެ.
ގާނޫނުލް އުގޫބާތުގައި އެ ކުށުގެ އަސާސީ އަދަބަކީ އެއް އަހަރާއި ހަތް މަހާއި ހަ ދުވަހަށް ޖަލަށް ލުމެވެ. އެކަމަކު ދެ ފަރާތުން ކުށަށް އިއުތިރާފްވުމުން ފަނޑިޔާރަށް ދީފައިވާ އިހުތިޔާރުގެ ތެރެއިން ވަނީ އަދަބު ލުއިކޮށްދީފަ އެވެ.
ކްރިމިނަލް ކޯޓުން އިއްވި ހުކުމުގައިވާ ގޮތުން މިމައްސަލައިގައި ދައުވާ ލިބޭ ދެއަންހެނުންގެ މައްޗަށް ކުށެއް ސާބިތުވެ ހުކުމެއް އިއްވޭ ފުރަތަމަ ފަހަރު ކަމަށްވާތީ އާއި މައްސަލާގައި އެހާ ގިނަ ދުވަސްވުމުންނާއި ދެ ފަރާތުގެ ދިރިއުޅުމުގެ ހާލަތްތަކަށް ރިއާޔަތް ކުރުމަށް ފަހު އަދަބު ލުއިކުރަން ނިންމެވީއެވެ.
މިގޮތުން ތަންފީޒު ކުރަން ޖެހޭ އަބަދުގެ ބާވަތަށް ވެސް ބަދަލު ގެނެސް ކޯޓުން ހުކުމް ކުރީ ހަތަރު މަހާއި 24 ދުވަހަށް ޖަލަށް ލުުމާއި، ކޮންމެ މީހަކު ވެސް ހަތަރު މަސް ދުވަހުގެ ތެރޭގައި މީރާއަށް 24،000 ރުފިޔާއިން ޖޫރިމަނާ ކުރުމުގެ އިތުރަށް 96 ގަޑިއިރަށް މުޖުތަމައަށް ހިދުމަތް ކުރަން ނުކުތުމަށެވެ.
މި މައްސަލާގައި ދައުވާ ކޮށްފައިވާ ފިރިހެން މީހާއަށް އިއްވި ހުކުމުގައި ވަނީ އެއް އަހަރާއި ހަ ދުވަހުގެ މުއްދަތަށް ޖަލަށް ލުމަށެވެ.