ބައިނަލްއަގުވާމީ ގޮތުން ފާހަގަކުރާ މަސްތުވާތަކެއްޗާ ދެކޮޅަށް މަސައްކަތްކުރާ ދުވަސް ގދ.ތިނަދޫ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރީހެބިލިޓޭޝަން ސެންޓަރުގައި ފާހަނގަކޮށްފިއެވެ.
މަސްތުވާ ތަކެއްޗާއި ދެކޮޅަށް މަސައްކަތްކުރާ ދުވަސް ފާހަނގަ ކުުރުމުގެ ގޮތުން ތިނަދޫ ޑިޓޮކްސް ސެންޓަރުން އިސްނަގައިގެން މިއަދު ހަވީރު ވަނީ ސައިކަލް ބުރެއް ބާއްވާފައެވެ. މިސައިކަލް ބުރުގައި ޑީޑީސީއާރުސީގެ މުވައްޒަފުންގެ އިތުރުން ތިނަދޫގައި ތިބި ރިކަވަރީ އެޑިކްޓުން ވަނީ ބައިވެރިވެފައެވެ.
ސައިކަލްބުރު ކުރިޔަށް ދިޔައިރު މަސްތުވާ ތަކެއްޗާއި ބެހޭ މައުލޫމާތު ފޯރުކޮށްދޭން ލީފްލެޓްތައް ވަނީ ބަހާފައެވެ. މައުލޫމާތު ލީފްލެޓްތައް ބެހުމުގެ މައިގަނޑު މަޤްސަދަކީ ތިނަދޫ ޑިޓޮކްސްގެ ޚިދުމަތްތަކާއި ބެހޭގޮތުން މައުލޫމާތު ފޯރުކޮށްދިނުމާއި މަސްތުވާ ތަކެތީގެ ނުރައްކަލާއި ބެހޭގޮތުން އާންމުންނަށް މައުލޫމާތު ފޯރުކޮށްދިނުމެވެ.
މީގެއިތުރުން މިދުވަސް ފާހަނގަ ކުރުމުގެ ގޮތުން 26 ޖޫން 2022 ވަނަ ދުވަހު ވަނީ ޑީޑީސީއާރުސީގައި ޑިނާ ނައިޓެއްވެސް ބާއްވާފައެވެ. ޑިޓޮކްސް ސެންޓަރުން ފަރުވާ ހޯދަމުންދާ ފަރާތްތަކާއި ތިނަދޫގައި ތިބި ރިކަވަރީ އެޑިކްޓުންގެ އާއިލާގެ އިތުރުން އެމުވައްސަސާގެ ސްޓާފުން ވަނީ މިއިވެންޓުގައި ބައިވެރިވެފައެވެ.
ޑީޑީސީއާރުސީއަކީ 2019 ވަނަ އަހަރު ތިނަދޫގައި ޤާއިމުކުރެވި ޚިދުމަތް ދޭން ފެށުނު ރީހެބިލިޓޭޝަން ސެންޓަރެވެ. ހުވަދު އަތޮޅުގެ އިތުރުން ރާއްޖޭގެ އެކި ކަންކޮޅުތަކުން ޑިޓޮކްސިފިކޭޝަން ފަރުވާ ހޯދުމަށް ތިނަދޫ ޑީޑީސީއާރުސީއަށް މީހުން އާދެއެވެ.
ފެށުނީއްސުރެ ގިނަ ގޮންޖެހުންތަކާއެކު ރައްޔިތުންނަށް ޚިދުމަތް ފޯރުކޮށްދެމުން ގެންދާ ތިނަދޫ ޑިޓޮކްސްގެ ޖާގައިގެ ދަތިކަން އިންތިހާއަށް ހުރިކަން އެސެންޓަރުން ވަނީ މީގެކުރިން ފާހަނގަކޮށްފައެވެ.
އެގޮތުން ސެންޓަރުގައި އައިސޮލޭޝަން ރޫމެއްވެސް ނެތުމުން ފަރުވާއަށް އަންނަ ކުދިންނަށް ޚިދުމަތް ދިނުމުގައި ވަކިން ހާއްސަކޮށް ކައުންސިލިންގ ދޭނެ ވަކި ރޫމެއް ނެތުމުން ވަރަށް ގިނަ ދަތިތަކާއި ކުރިމަތިލާން ޖެހޭ ކަމަށާއި މުވައްޒަފުންގެ ދަތިކަން ހުރިކަމަށް ވަނީ ފާހަނގަކޮށްފައެވެ.
މަސްތުވާތަކެއްޗަށް ފަރުވާދޭ މަރުކަޒުތަކުގެ ޚިދުމަތުގެ ފެންވަރު ރަނގަޅުކޮށް، ޚިދުމަތް ފުޅާކުރުމަށް ސަރުކާރުން ދަނީ މަސައްކަތްތައް ކުރަމުންނެވެ. އޭގެތެރޭގައި މިކަމާ ގުޅޭ ބޭސްފަރުވާގެ ނިޒާމު ރަނގަޅުކުރުމާއި އިތުރު ސެންޓަރުތައް ތަރައްޤީކުރުމުގެ މަސައްކަތް ހިމެނެއެވެ. މީގެއިތުރުން ސަރުކާރުން ދަނީ ރާއްޖޭގެ ފަސް ސަރަހައްދެެެއްގައި ރީހެބިލިޓޭޝަން ސެންޓަރުތައް ހިންގަމުންނެވެ. އެގޮތުން މާލެ އަތޮޅުގެ އިތުރުން ހދ.ހަނިމާދޫ، ގދ.ތިނަދޫ، ސ.ހިތަދޫ އަދި ޏ.ފުވައްމުލަކުގައި ވަނީ ރީހެބިލިޓޭޝަން ސެންޓަރުތައް ޤާއިމުކުރެވިފައެވެ. އެހެންނަމަވެސް އެންޑީއޭގެ ފަރުވާ ހޯދުމަށް ދާންޖެހެނީ ކ.ހިންމަފުށީގައި ހުންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރަށެވެ.