ދުންފަތް ކޮންޓްރޯލް ކުރުމާބެހޭ ޤާނޫނަށް ކެފޭތަކާއި ފިހާރަތައް ހިންގާ ފަރާތްތައް އަހުލުވެރިކުރުމަށް ޚާއްސަ އިންސްޕެކްޝަނެއް ހެލްތު ޕްރޮޓެކްޝަން އެޖެންސީ، އެޗްޕީއޭއިން ފަށައިފިއެވެ.
މި އިންސްޕެކްޝަނުގައި އެޗް.ޕީ.އޭގެ އިތުރުން ކަމާއި ގުޅުންހުރި ދައުލަތުގެ އެހެން ބައެއް އިދާރާތަކުންވެސް ބައިވެރިވާނެއެވެ.
މި އިންސްޕެކްޝަނުގެ އެންމެ ބޮޑު މަގްސަދަކީ މިހާރު ޤަވާއިދާއި ހިލާފަށް ހުރި ކަންކަން ދެނެގަނެ، މައުލޫމާތުދީ އިސްލާހު ކުރުމެވެ.
ކާބޯތަކެތީގެ މަސައްކަތްކުރާ ތަންތަނުގައި ތަނަށް ޒިޔާރަތްކުރާ ފަރާތްތަކާއި ކަސްޓަމަރުން ޢަމަލުކުރަންވީ ގޮތުގެ މަޢުލޫމާތު ފެންނަގޮތަށް ބަހައްޓަންޖެހޭއިރު، ކާބޯތަކެތީގެ ވިޔަފާރިކުރާ ތަންތަނުގައި ޝީޝާ އަދި ވޭޕް ފަދަ އީ-ސިނގެރޭޓްވެސް ހިމެނޭގޮތަށް ދުންފަތުގެ އިސްތިޢުމާލުކުރުމަކީ މަނާކަމެކެވެ.
އެހެންކަމުން ދުންފަތުގެ އިސްތިއުމާލް ކުރަން ކެފޭތަކުގައި ހާއްސަ ތަނެއް ނެތްނަމަ ނުވަތަ ފިހާރަތަކުން ސިނގިރޭޓް ވަކިން ވިއްކުން ފަދަ ކަމެއް ކުރާނަމަ އެއްލައްކަ ރުފިޔާއިން އެތަނެއް ޖޫރިމަނާ ކުރުމުގެ ބާރުވެސް އެޗްޕީއޭއަށް ލިބިފައިވެއެވެ.
2018 ވަނަ އަހަރުގެ ޖެނުއަރީ މަހު 31 ވަނަ ދުވަހު ގެޒެޓްކޮށް އަމަލުކުރަން ފެށި ޤަވައިދުގައިވާ ގޮތުން ހޮޓާ، ރެސްޓޯރެންޓް އަދި ކެފޭތަކުގައިވެސް ވަކިން ސިނގިރޭޓް ވިއްކުން މަނާވާނެއެވެ. މި ޤަވާއިދުގައިވާގޮތުން ރާއްޖޭގައި ވިއްކޭނީ މަދުވެގެން 20 ސިނގިރޭޓް ހިމެނޭ ފޮއްޓެވެ. ބިޑިނަމަ ވިއްކޭނީ މަދުވެގެން 50 ބިޑި ހިމެނޭ ފޮށި ނުވަތަ ބޮނޑިއެވެ. ދުންފަތުގެ އެހެން ބާވަތްތައް ވިއްކާނަމަ ވިއްކަންޖެހޭނީ މަދުވެގެން 30 ގްރާމް ހުންނަ ބާވަތްތަކެވެ.
ފިހާރަތަކުގެ އިތުރުން ޤަވާއިދުގައިވާ ގޮތުން ހޮޓާ، ރެސްޓޯރެންޓް އަދި ކެފޭތަކުގައިވެސް ވަކިން ސިނގިރޭޓް ވިއްކުން މަނާވާނެ އެވެ.
މި ޤަވައިދުގެ ދަށުން ދުންފަތް ހިމެނޭ ބާވަތްތައް ބަންދުކޮށްފައި ހުންނަ ޕެކެޓާއި ކާޓަނުގެ ބޭރުގައި، މިނިސްޓްރީ އޮފް ހެލްތުން ޢާންމުކޮށްފައިވާ ގޮތަށް ފޮޓޯ ޖެހި ޞިއްޙަތުގެ އިންޒާރު ޖެހުންވެސް ލާޒިމުވާނެއެވެ.
މި ޤަވާއިދާއި ހިލާފުވާ ފަރާތައް އެ ކުށްކުރުމަށް ބޭނުންކުރި މުދަލެއްގެ އަގާއި އޭގެ ޓެކުހާއި އެހެނިހެން ފީތަކުން ޖުމްލަ އަދަދުގެ 10 ގުނަ ޖޫރިމަނާ ކުރެވޭނެކަމަށް ޤަވައިދުގައިވެއެވެ. އަދި ދެވަނަ ފަހަރަށް ޤަވައިދާ ހިލާފުވެއްޖެނަމަ އިތުރަށް 5000 ރުފިޔާ އަދި ތިންވަނަ ފަހަރަށް 10000 ރުފިޔާއިން ޖޫރިމަނާ ކުރެވޭނެއެވެ. އަދި ހަތަރު ވަނަ ފަހަރަށް ކުށް ތަކުރާރުކޮށްފިނަމަ 20000 ރުފިޔާއިން ޖޫރިމަނާ ކުރާނެކަމަށްވެސް މި ޤަވައިދުގައިވެއެވެ.